ފްރާންސްގައި ކޮވިޑުގެ ކޭސްތައް އިތުރުވަމުން ދާތީ ލޮކްޑައުންގެ ފިޔަވަޅުތައް ވަރުގަދަކޮށް ގާތްގަނޑަކަށް އެއް މަސް ދުވަހަށް ސްކޫލުތައް ބަންދުކޮށްފި އެވެ.
ރައީސް އިމޭނުއެލް މެކްރޯން ވިދާޅުވީ މަދުވެގެން ތިން ހަފްތާއަށް ސްކޫލުތައް ބަންދުކުރަން ނިންމާފައިވާ ކަމަށާއި އަންނަ ހަފްތާއިން ފެށިގެން ދަރިވަރުންގެ ކިޔެވުން ކުރިއަށް ދާނީ އޮންލައިންކޮށް ކަމަށެވެ.
ޓީވީ މެދުވެރިކޮށް ގައުމާ މުހާތަބު ކުރައްވަމުން މެކްރޯން ވިދާޅުވީ ގައުމު އޮތީ ނާޒުކު ހާލަތެއްގައި ކަމަށާއި އޭޕްރިލް މަސް ވާނީ ކޮވިޑާ ދެކޮޅަށް ކުރާ ހަނގުރާމައިގައި މުހިއްމު މަހަކަށް ކަމަށެވެ.
"މި ވަގުތު ހަރަކާތްތެރިވާން ނުފަށައިފި ނަމަ އަޅުގަނޑުމެންގެ އަތުން ކޮންޓްރޯލް ދޫވެގެން ދާނެ،" މެކްރޯން، 43، ވިދާޅުވި ކަމަށް ބީބީސީގައި ރިޕޯޓުކޮށްފައިވެ އެވެ.
މާޗް މަހުގެ ކުރީކޮޅު ފްރާންސްގެ ބައެއް ހިސާބުތަކުގައި ލޮކްޑައުންގެ ފިޔަވަޅުތަކަށް އަމަލު ކުރަން ފެށިއިރު، ހުރިހާ ޑިސްޓްރިކްޓުތަކުން ވެސް މިހާރު ވަނީ އެ ފިޔަވަޅުތަކަށް އަމަލުކުރަން ފަށާފަ އެވެ.
އެގޮތުން ޒަރޫރީ ބޭނުމަށް ތަކެތި ވިއްކާ ފިހާރަތައް ނޫން އެހެން ހުރިހާ ފިހާރައެއް ބަންދުކޮށްފައި ވާއިރު، މަގްބޫލް ސަބަބެއް ނެތި ދިރިއުޅޭ ގެއާ 10 ކިލޯމީޓަރު ދުރުގެ ސަރަހައްދުތަކަށް ދިޔުން ވަނީ މަނާކޮށްފަ އެވެ.
އޭގެ އިތުރުން ރޭގަނޑު 07:00 ގެ ފަހުން ކާފިއު ހިންގަމުން ދާއިރު، އޮފީސްތައް ބަންދުކޮށް ގޭގައި ތިބެގެން މަސައްކަތް ކުރުމަށް ވަނީ އަންގާފަ އެވެ.
ފްރާންސްގައި ކޮވިޑުގެ ކޭސްތައް އިތުރުވެ، 5،000 އަށް ވުރެ ގިނަ މީހުންނަށް މި ވަގުތު ވެސް ދަނީ އައިސީޔޫގައި ފަރުވާދެމުންނެވެ.
އިއްޔެ އެކަނިވެސް 59،038 މީހުންނަށް ކޮވިޑް ޖެހިފައިވާ ކަމަށް އެ ގައުމުގެ ހެލްތު މިނިސްޓްރީން ބުނެފައިވެ އެވެ.
ކޮވިޑުގެ ހާލަތު ގޯސްވުމާއެކު ލޮކްޑައުންގެ ފިޔަވަޅުތައް ވަރުގަދަ ކުރުން ލަސްވެފައިވާ ކަމަށް ފްރާންސްގެ ބައެއް ފަރާތްތަކުން ގަބޫލުކުރެ އެވެ.
"މިހާރު ވެސް އަޅުގަނޑުމެން އެތައް ވަގުތެއް ބޭކާރުކޮށްފިން. އޭގެ ސަބަބުން ފިޔަވަޅުތައް ހަރުކަށިވެފައި އަމަލުކުރަން ޖެހޭ މުއްދަތު ދިގުވާނެ،" ޕެރިސްގެ ޓެނޮން ހޮސްޕިޓަލުގެ އިންފެކްޝަސް ޑިޒީޒަޒް ޑިޕާޓްމަންޓުގެ ވެރިޔާ ގިލްސް ޕިއަލޫ ވިދާޅުވި ކަމަށް ބީބީސީގައިވެ އެވެ.
ފްރާންސް ލޮކްޑައުން ކުރުމަށް އެ ގައުމުގެ ގިނަ ބަޔަކު ތާއީދު ކުރާ ކަމަށް ހިޔާލު ހޯދުމުގެ ދިރާސާތަކުން ދައްކަ އެވެ. އެގޮތުން އިލޭބް އިންސްޓިޓިއުޓުގެ ދިރާސާގައި ބައިވެރިވި މީހުންގެ 54 އިންސައްތަ ތާއީދު ކުރީ ލޮކްޑައުން ކުރުމަށެވެ.
މިހާތަނަށް ޖުމްލަ 4.6 މިލިއަން މީހުން ފްރާންސްގައި ކޮވިޑަށް ޕޮޒިޓިވްވެފައި ވާއިރު، 95،495 މީހުން ވަނީ މި ބަލީގައި މަރުވެފަ އެވެ.
