ކޮވިޑް-19 އާ ގުޅިގެން ސަރުކާރުން ގެންނަން ހަވާލުކުރި ވެންޓިލޭޓަރުތައް ނުލިބުނު މައްސަލާގައި ފުރިހަމަ ތަހުގީގެއްކޮށް އެކަމުގައި ޝާމިލްވާ ފަރާތްތައް އިންސާފުގެ ކުރި މައްޗަށް ގެނައުމަށް ގޮވާލައި، އިދިކޮޅުގެ ފަރާތުން ކުއްލި މައްސަލައެއް މިއަދު ރައްޔިތުންގެ މަޖިލީހަށް ހުށަހަޅައިފި އެވެ.
ވެންޓިލޭޓަރުތަކުގެ މައްސަލާގައި އޭރުގެ ހެލްތު މިނިސްޓަރު އަބްދުﷲ އަމީން ހިމެނޭ ގޮތުން 11 މީހެއްގެ މައްޗަށް މަގާމުގެ ނާޖައިޒު ފައިދާ ނަހަމަ ގޮތުގައި ބޭނުން ކުރި ކަމުގެ ދައުވާ ކުރަން އޭސީސީއިން ބޮޑު ތަހުގީގެއް ހިންގުމަށްފަހު ފޮނުވި އެވެ. ނަމަވެސް އެ މައްސަލާގައި ދައުވާ ކުރެވެން ނެތް ކަމަށް ޕީޖީ އޮފީހުން ނިންމި އެވެ. އެ ނިންމުމާ ގުޅިގެން އޭސީސީއިން ހިތްހަމަނުޖެހުން ފާޅުކޮށް ރިވިއުކޮށްދޭން އެދުނު ނަމަވެސް ނިންމުން ބަދަލު ކުރެވެން ނެތް ކަމަށް ޕީޖީއިން ވަނީ އަންގާފަ އެވެ.
ޕީޖީގެ ނިންމުމާއެކު، އާއްމުންގެ އިތުރުން ސަރުކާރު ހިންގާ ކޯލިޝަންގެ މައި ޕާޓީ އަދި މަޖިލީހުގެ ސާފު އަގުލަބިއްޔަތު އޮންނަ އެމްޑީޕީގެ ތެރޭގައި އެ މައްސަލަ ހޫނުވެފައިވަނިކޮށް، އިދިކޮޅު ޕީއެންސީގެ ނައިބު ރައީސް އަދި މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފް ހުށަހެޅުއްވި އެ މައްސައިގައި އެންމެ ބޮޑު ކަންބޮޑުވުމެއްގެ ގޮތުގައި ފާހަގަކުރައްވާފައިވަނީ، ރައްޔިތުންގެ ގިނަ އަދަދެއްގެ ފައިސާ އެކަމުގައި ގެއްލިފައި ވާއިރު، އެންމެ ކުޑަމިނުން އެ ފައިސާ އަނބުރާ ހޯދަން ސަރުކާރުން މަސަައްކަތް ނުކުރުމެވެ.
އެކަމުގައި އެމްޑީޕީގެ މެންބަރުންގެ ކަންބޮޑުވުން ބޮޑުއިރު، އާދަމް ޝަރީފް ހުށަހެޅުއްވި މައްސަލަ ބަލައިގެންފައިވަނީ، އެމްޑީޕީގެ މެންބަރުންގެ ވޯޓާއެކު، އެ ވޯޓުގައި ބައިވެރިވެވަޑައިގެންނެވި 32 މެންބަރުންގެ އިއްތިފާގުންނެވެ.
ވެންޓިލޭޓަރުތައް ހޯދަން ހަވާލުކުރި ގޮތުގެ މައްސަލައިގައި ކުރީގެ ހެލްތު މިނިސްޓަރު އަބްދުالله އަމީން އާއި އެ މިނިސްޓްރީގެ 11 މުވައްޒަަފަކަށް ދައުވާ ނުކުރަން ޕީޖީގެ ނިންމެވުން ތިން ވަނަ ފަހަރަށް މުރާޖައާކޮށްދޭން އެދޭނެ ކަަމަށް އޭސީސީން ވަނީ ބުނެފަ އެވެ. ދައުވާކުރަން ބޭނުންވާ އުންސުރުތައް އެ މައްސަލައިގައި ހަމަނުވާ ކަމަށް ޕީޖީ ވިދާޅުވި ނަމަވެސް އޭސީސީން އެކަން ގަބޫލެއް ނުކުރެ އެވެ. އެ ކޮމިޝަނުން ބުނަނީ އެ މައްސަލައިގައި މިހާތަނަށް ހޯދިފައިވާ ކަންކަމުން ދައުވާ ނުކުރެވެންވީ ސަބަބެއް ނެތް ކަމަށެވެ.
ދުބާއީގެ އެގްޒެކިއުޓާސްއާ ހަވާލުކުރީ 75 ވެންޓިލޭޓަރު ހޯދުމަށެވެ. މީގެތެރެއިން ރާއްޖެއަށް ފޮނުވީ 15 ވެންޓިލޭޓަރެވެ. ބާކީ ވެންޓިލޭޓަރުތައް ފޮނުވާނެ ކަމުގެ ޔަގީންކަމެއް ހެލްތު މިނިސްޓްރީއަށް ނެތުމުން މައްސަަލައިގައި އެޓާނީޖެނެރަލްގެ ލަފައަކަށް ވަނީ އެދިފަ އެވެ.
