އުތުރުގެ ޗެމްޕިއަން، ހދ. ދިއްދޫ ސްޕޯޓްސް ކްލަބް 1-0 އިން ބަލިކޮށް، މާލެ ރީޖަން ލީގުގެ (ދެ ވަނަ ޑިވިޝަން ފުޓްބޯޅަ މުބާރާތުގެ) ޗެމްޕިއަން، ބިސް ބުރު ސްޕޯޓްސް ކްލަބުން ދިވެހި ޕްރިމިއާ ލީގުގައި ފުރަތަމަ މޮޅު ހޯދައިފި އެވެ.
މިދިޔަ ސީޒަނަށް ފަހު ބޭއްވި، ދިވެހި ޕްެރިމިއާ ލީގުގެ ކޮލިފިކޭޝަންގެ ފަހު މެޗުގައި ދިއްދޫން ވަނީ 6-2 އިން ބިސް ބުރު ބަލިކޮށްފަ އެވެ. މި ދެ ޓީމަށް ވެސް ދިވެހި ޕްރިމިއާ ލީގުގެ މި ސީޒަނުން ޖާގަ ލިބުނީ ކޮލިފިކޭޝަންގެ ގަދަ ހަތަރެއްގައި ނިންމުމުންނެވެ.
މި ފަހަރުގެ ދިވެހި ޕްރިމިއާ ލީގުގައި ދިއްދޫން ކުޅުނު ފުރަތަމަ މެޗުން ބުރު ސްޕޯޓްސް ކްލަބް އަތުން 1-0 އިން މޮޅުވި ނަމަވެސް ދެ ވަނަ މެޗުން ވަރުގަދަ ވިކްޓަރީ ސްޕޯޓްސް ކްލަބް އަތުން ދިއްދޫ ބަލިވީ 4-3 އިންނެވެ. އަނެއްކޮޅުން، ބިސް ބުރު ފުރަތަމަ މެޗުން ވަނީ 3-1 އިން ކްލަބް އީގަލްސް އަތުން ބަލިވެފަ އެވެ.
ގަލޮޅު ދަނޑުގައި މިރޭ ކުޅުނު މެޗުން ބިސް ބުރު މޮޅުވިއިރު، އެ ޓީމުގެ ހަމައެކަނި ލަނޑު ޖެހީ ދެ ވަނަ ހާފުގަ އެވެ. މިއީ، ހާފުގެ މެދެއްހާ ހިސާބުން ލިބުނު ހިލޭ ޖެހުމަކުން ބިސް ބުރުގެ ބާނަބާސް ފްރައިޑޭ އަކަންމީޑޫ ޖެހި ގޯލެކެވެ. އެ ޓީމުން ދެ ވަނަ ލަަނޑެއް ޖަހަން ކުރި މަސައްކަތް ކާމިޔާބެއްނުވި އެވެ. އަނެއްކޮޅުން، މި މެޗުން ބިސް ބުރު މޮޅުކޮށްދޭން އެ ޓީމުގެ ގޯލްކީޕަރު، އަހުމަދު ލިޒްފާން ލަތީފް ވަނީ ރަނގަޅު ކުޅުމެއް ދައްކައި، މުހިންމު ސޭވްތަކެއް ކޮށްފަ އެވެ.
މި މެޗަށް ފަހު، ދިވެހި ޕްރިމިއާ ލީގުގެ ކުޅުން އަންނަ މަހުގެ ނުވަ ވަނަ ދުވަހާ ހަމައަށް މި ވަނީ ފީފާ އިންޓަނޭޝަނަލް ބްރޭކަށް މެދުކަނޑާލައިފަ އެވެ. ގައުމީ ޓީމުން، ޗައިނާ، ކިރްގިސްތާން އަދި ލެބަނަންއާ ކުޅޭ މެޗުތަކަށް މިއަދު ހަވީރު ވަނީ ފުރައިފަ އެެވެ.
ދިހަ ޓީމު ވާދަކުރާ ދިވެހި ޕްރިމިއާ ލީގުގައި ދިއްދޫ އާއި ގައްދޫން، ކޮންމެ ޓީމެއް ތިން މެޗުން ކުޅެފައިވާއިރު، ބާކީ އަށް ޓީމުން ކުޅެފައިވަނީ ކޮންމެ ޓީމެއް ދެ މެޗެވެ.
ލީގުގެ އެއް ވަނައިގައި އޮތް ވިކްޓަރީ އާއި ދެ ވަނައިގައި އޮތް އީގަލްސް އަދި ތިން ވަނައިގައި އޮތް ނިއު ރޭޑިއަންޓަށް ވަނީ ދެ މެޗުން ތިން ޕޮއިންޓް ލިބިފަ އެވެ. ހަތަރު ވަނައިގައި އޮތް އޮޑި ސްޕޯޓްސް ކްލަބާއި ފަސް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނާއި ހަ ވަނައިގައި އޮތް ދިއްދޫ އާއ ހަތް ވަނައިގައި އޮތް ބިސް ބުރު އަދި އަށް ވަނައިގައި އޮތް ޓީސީ ސްޕޯޓްސް ކްލަބަށް ވަނީ ކޮންމެ ޓީމަކަށް ތިން ޕޮއިންޓް ލިބިފަ އެވެ.
ލީގުގައި މިހާތަނަށް ޕޮއިންަޓެއް ނުލިބި އޮތީ ބުރު އާއި ގައްދޫ އެވެ.
އަންނަ މަހު ނުވަ ވަަނަ ދުވަހު ދިވެހި ޕްރިމިއާ ލީގު އަލުން ފަށާއިރު، ފުރަތަމަ މެޗުގައި ބިސް ބުރުން ކުޅޭނީ ބުރު ސްޕޯޓްސް ކްލަބާ އެވެ.
