ވެރިކަން ކުރާ ޕީއެންސީން މިދިޔަ ހޮނިހިރު ދުވަހުގެރޭ ބޭއްވި ޖަލްސާގައި ކުރީގެ ރައީސް އަބްދުﷲ ޔާމީން އަބްދުލްގައްޔޫމްއަށް އެއްޗެހި ކިޔަމުން، މިނިސްޓަރު އަމީން ދެއްވި މެސެޖެއް ކަމަށް ބުނެ ބާރަށު ދާއިރާގެ މެންބަރު، އިބްރާހިމް ސުޖާއު ހެއްދެވީ ދޮގެއްކަން ފަޅާ އަރައިފި އެވެ.
އެކަން ފަޅާއެރީ ޔާމީނަށް ރައްދުކޮށްދިނުމަށް އެދި މެންބަރު ސުޖާއުއަށް އެއްވެސް މެސެޖެއް ދީފައިވާނެތޯ މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ސަންގު ޓީވީގެ ނޫސްވެރިޔާ ސުވާލުކުރުމުންނެވެ.
އެ ސުވާލުގެ ޖަބާގައި އަމީން ވަނީ އެފަދަ މެސެޖެއް ސުޖާއުއަށް ދީފައި ނުވާނެކަމަށް ވިދާޅުފަ އެވެ.
"އަޅުގަނޑަކީ އެއްވެސް މީހަކު މެދުވެރިކޮށް އެއްވެސް މީހަކަށް މެސެޖެއް ދީގެން މިހައިތަނަކަށް، އަޅުގަނޑަށް ދޭން ބޭނުންވާ މެސެޖެއް އަޅުގަނޑަށް ދެވޭނެ އެފަރާތަކަށް އިނގޭތޯ؟" އަމީން ވިދާޅުވި އެވެ.
ޕީއެންސީން ބޭއްވި ޖަލްސާގައި ޔާމީންއަށް އެއްޗެހިކިޔަމުން، ސުޖާއު ވިދާޅުވީ ޔާމީންއަށް ރައްދުކޮށްދެއްވުމަށް އެދި އަމީން މެސެޖެއް ދެއްވި ކަމަށެވެ.
"[އަމީން ވިދާޅުވީ] ވައިޑްބޮޑީ ދެވަނަ ފްލައިޓު އެބަ ގެންނަމޭ، ޓާގެޓަށް ﷲ ގެ ހެޔޮ ރަހުމަތުން، ޓޫރިޒަމް އެރައިވަލް ރީޗުވާނެޔޭ ދަންނަވައްޗޭ ޕެސިފިކަށް ދަތުރުކުރަން ފަށައިފީމޭ. [ޔާމީނަށް] ނުވެ އޮތް ކަމެއްވީމާ ހަމަ އެ ވާހަކަ ބުނެލީޔޭ،" ސުޖާއު ވިދާޅުވި އެވެ.
އަމީންގެ އިތުރުން ވެސް ވަރަށް ގިނަ ބޭފުޅުން ދެއްވި މެސެޖުތައް ކަމަށް ވިދާޅުވެ ސުޖާއު ޔާމީނަށް އެއްޗެހި ކިޔުއްވި އެވެ.
އެރޭގެ ޖަލްސާގައި ސުޖާއު ޔާމީންއަށް ކުޑައިމީސްކޮށް ހުތުރުކޮށް އެއްޗެހި ކިޔުއްވި ނަމަވެސް، އޭނާއަކީ ޔާމީންގެ ދިފާއުގައި އެންމެ ގަދައަށް ވާހަކަދެއްކެވި އެކަކެވެ.
