ސައުތު އޭޝިއަން ގޭމްސް އަންނަ އަހަރުގެ އޭޕްރީލް މަހު ޕާކިސްތާންގެ ތިން ސިޓީއެއްގައި ހޯސްޓްކުރާ ގޮތަށް ނިންމާފައިވާ ކަމަށް ޕާކިސްތާންގެ މީޑިއާ ރިޕޯޓްތައް ބުނެފި އެވެ.
ދެކުނު އޭޝިއާގެ ގައުމުތަކުން، އުޒްބެކިސްތާންގައި ކުރިއަށްދިޔަ އޮލިމްޕިކް ކައުންސިލް އޮފް އޭޝިއާ (އޯސީއޭ)ގެ ޖެނެރަލް އެސެމްބްލީގެ ހަވާސާގައި ބޭއްވި ބައްދަލުވުމުގައި މީގެ ކުރިން ނިންމާފައިވަނީ، އަންނަ އަހަރު މާޗް މަހުގެ 23-31 އަށް ކުރިން ވެސް ރޭވުނު ގޮތަށް ޕާކިސްތާނުގައި ސައުތު އޭޝިއަން ގޭމްސް ހޯސްޓްކުރުމަށެވެ. އެކަމަކު، އަނެއްކާ ވެސް މި ވަނީ ގޭމްސް ބާއްވާ ތާރީހު ބަދަލުކޮށްފަ އެވެ.
ސައުތު އޭޝިއަން ގޭމްސް އަންނަ އަހަރުގެ މާޗް މަހަށް ތާވަލުކޮށްފި
ތަކުރާރުކޮށް އެކި ސަބަބުތަކާ ހެދި ފަސްކުރަން ޖެހުނު، ސައުތު އޭޝިއަން ގޭމްސް އަންނަ އަހަރުގެ މާޗް މަހު ޕާކިސްތާންގައި ބާއްވާ ގޮތަށް ވަނީ ތާވަލުކޮށްފައި.
އުޒްބެކިސްތާންގައި ބޭއްވި ބައްދަލުވުމުގައި، ޕާކިސްތާނުން ވަނީ ދެކުނު އޭޝިއާގެ ގައުމުތަކުގެ އޮފިޝަލުންނަށް ޕާކިސްތާނަށް ދައުވަތު ދީފަ އެވެ.
ފާއިތުވި ދެ ދުވަހު ޕާކިސްތާންގެ އިސްލާމްއާބާދުގައި ވަނީ ސައުތު އޭޝިއަން އޮލިމްޕިކް ކައުންސިލް (އެސްއޭއޯސީ)ގެ ބައްދަލުވުންތަކެއް ކުރިއަށްގޮސްފަ އެވެ.
އެ ބައްދަލުވުމުގައި ވަނީ، މިދިިޔަ އަހަރުގެ ފެބްރުއަރީ މަހު، 25 ވަނަ ދުވަހު ޕާކިސްތާންގެ ލާހޯރުގައި ބޭއްވި ދެކުނު އޭޝިއާގެ އޮލިމްޕިކް ކައުންސިލް، އެސްއޭއޯސީގެ އެގްޒެކްޓިވް ކޮމިޓީ ބައްދަލުވުމުގައި ނިންމުނު ކަންތައްތައް ފުރިހަމަވެފައިވޭތޯ ކަންކަން ބަލައިފަ އެވެ. އަދި، އަންނަ އަހަރުގެ ސައުތު އޭޝިއަން ގޭމްސްގެ އެންމެ ފަހުގެ ތައްޔާރީތަކާ ގުޅޭގޮތުން ވެސް ވަނީ މަޝްވަރާކޮށްފަ އެވެ.
ސައުތު އޭޝިއަން އޮލިމްޕިކް ކައުންސިލުން މިދިޔަ ދެ ދުވަހު ބޭއްވި ބައްދަލުވުމުގައި، ބަންގްލަދޭޝް، ރާއްޖެ، ނޭޕާލް، ސްރީ ލަންކާގެ އޮފިޝަލުން ޕާކިސްތާނަށް ގޮސް ބައިވެރިވިއިރު، އިންޑިއާ އިން ވަނީ ވީޑިއޯގެ ޒަރިއްޔާ އިން ބައްދަލުވުމުގައި ބައިވެރިވެފަ އެވެ.
ޕާކިސްތާން މީީޑިއާ ރިޕޯޓްތައް ބުނާގޮތުން، ސައުތު އޭޝިއަން އޮލިމްޕިކް ކައުންސިލްގެ މި ބައްދަލުވުމުގައި ޕާކިސްތާން އޮލިމްޕިކް ކޮމިޓީން ވަނީ، އަންނަ އަހަރުގެ އޭޕްރީލް މަހު 3-11 އަށް ޕާކިސްތާންގެ ތިން ސިޓީއެއްގައި ގޭމްސް ކުރިއަށްދާނެކަން އިއުލާނުކޮށްފަ އެވެ. އެ ތިން ސިޓީ އަކީ، އިސްލާމްއާބާދު، ލާހޯރް އަދި ޕެޝާވަރު އެެވެ.
ބައްދަލުވުމުގައި ރާއްޖޭގެ ފަރާތުން ބައިވެރިވީ، މޯލްޑިވްސް އޮލިމްޕިކް ކޮމިޓީ (އެމްއޯސީ)ގެ ރައީސް، މުހައްމަދު އަބްދުއްސައްތާރު (ޗަމްޕީ) އާއި ސެކްރެޓަރީ ޖެނެރަލް، ތަމޫހު އަހުމަދު ސައީދު (ތަމޫ) އެވެ.
މީގެ ކުރިން، ސައުތު އޭޝިއަން ގޭމްސްގެ އަންނަ އަހަރުގެ އެޑިޝަންގައި ޖުމްލަ އެކު، 27 ކުޅިވަރު ހިމަނާފައިވާ ކަމަށް ޕާކިސްތާން އޮލިމްޕިކް އެސޯސިއޭޝަން (ޕީއޯއޭ)އާ ހަވާލާދީ އެ ގައުމުގެ މީޑިއާ އިން ވަނީ ރިޕޯޓްކޮށްފަ އެވެ. އެކަމަކު، މިހާރު ރިޕޯޓްތައް ބުނާގޮތުން، 28 ކުޅިވަރު ބާއްވާއިރު، މި ކުޅިވަރުތަކުގައި ބައިވެރިވުމަށް ޕާކިސްތާނަށް 3200 އެއްހާ އެތުލީޓުން އަންނާނެ ކަމަށް ބެލެެވެ އެވެ.
އެންމެ ފަހުން، ސައުތު އޭޝިއަން ގޭމްސް ބޭއްވީ 2019 ވަަނަ އަހަރުގެ ޑިސެމްބަރު މަހު ނޭޕާލްގެ ކަތުމަންޑޫ އާއި ޕޮކާރާގަ އެވެ. އެ އަށް ފަހު، އެންމެ ފުރަތަމަ 2023 ވަނަ އަހަރު ބާއްވަން ނިންމި ސައުތު އޭޝިއަން ގޭމްސްގެ 14 ވަނަ އެޑިޝަން، އެކި ސަބަބުތަކާ ހުރެ ހަ ފަހަރެއްގެ މަތިން މި ވަނީ ފަސްކޮށްފަ އެވެ.
މީގެ ކުރިން، ޕާކިސްތާނުގައި ސައުތު އޭޝިއަން ގޭމްސް ބޭއްވީ 1989 ވަނަ އަހަރާއި 2004 ވަނަ އަހަރު އެވެ.
