ފައިނަލުގައި ޕެނަލްޓީ ޖަހައިގެން އެލީޓް އެކަޑަމީ ބަލިކޮށް އެސްޕަޔާ ފުޓްބޯލް އެކަޑަމީން ކްލަބް މޯލްޑިވްސް އިން ބޭއްވި ކިޑްސަލް މުބާރާތުގެ ޗެމްޕިއަންކަން ހޯދައިފި އެވެ.
ޖުމްލަ އެކު، 10 ޓީމު ވާދަކުރި ކިޑްސަލް މުބާރާތުގެ ފައިނަލް މެޗުގެ ފުރިހަމަ ވަގުތު ހަމަވިއިރު އޮތީ 2-2 އިން އެއްވަރުވެފަ އެވެ. އެ ގޮތުން، އެސްޕަޔާގެ ލަނޑުތައް ޖެހީ، އަހުމަދު ޔާލް ސުޖާއު އާއި ޔަލްސަން ބިން ހިސާން އެވެ. އެލީޓުން ލަނޑުތައް ކާމިޔާބުކުރީ އާދު ބިން މުހައްމަދު ނިޔާޒް އެވެ.
ނަތީޖާ ނެރެން ޕެނަލްޓީ ޖެހިއިރު، އެސްޕަޔާ މޮޅުވީ 4-2 އިންނެވެ.
ޕެނަލްޓީގައި އެސްޕަޔާ އިން ހަތަރު ޕެނަލްޓީ ވެސް ކާމިޔާބުކުރި އެވެ. އެ ޓީމުން ޕެނަލްޓީތައް ޖެހީ، ޔަލްސަންގެ އިތުރުން، އަހުމަދު އާހިލް ހުސެއިން، އައްމާރު ބިން ނަވާޒް އަދި މިކާ މުހައްމަދު ކަލީމް އެވެ. އެލީޓުން ހަތަރު ޕެނަލްޓީގެ ތެރެއިން ތިން ޕެނަލްޓީ ވައްދާލިއިރު، އެ ޓީމަށް ނާކާމިޔާބުވީ އާދު އާއި ޝައިމަން އަހުމަދު ރިޒާ ޖެހި ޕެނަލްޓީތަކެވެ. އެ ޓީމުން ޕެނަލްޓީތައް ކާމިޔާބުކުރީ ޔޫސުފް ލުގްމާން ނަސީމް އާއި އަލީ ޒިހާން ޒިޔާދު އެވެ.
އެސްޕަޔާގެ ކީޕަރު، އަބްދުﷲ ރައުޝަމް އިބްރާހިމް މުޖާހު ވަނީ މޮޅު ކުޅުމެއް ދައްކައިފަ އެވެ. މޮޅު ފަސް ކުޅުންތެރިންގެ ތެރޭގައި އޭނާގެ އިތުރުން ދެން ހިމެނެނީ، އައްމާރު އާއި ރާއިޝް ރަމީޒު، އާދު އަދި މުހައްމަދު ރައުޝަމް ރަމީޒް އެވެ.
އެންމެ މޮޅު ކުޅުންތެރިޔާގެ މަގާމު އެލީޓްގެ އާދު އަށް ލިބުނުއިރު، އެންމެ ގިނަ ލަނޑު ޖަހައި ރަން ބޫޓު ހޯދީ ވެސް އޭނާ އެވެ. އެއީ، 17 ލަނޑެވެ.
އެންމެ މޮޅު ކޯޗަކީ އެސްޕަޔާގެ ނައުފަލް މުހައްމަދު އެވެ. ފެއާ ޕްލޭ ޓީމަކީ ހުޅުމާލެ ޔޫތު ސްޕޯޓްސް ކްލަބް އެވެ. ފެއާ ޕްލޭ ކުޅުންތެރިއަކީ ނިއު ރޭޑިއަންޓްގެ މުހައްމަދު އަޒުހާން އަލީ އެވެ.
