ލަންޑަން (އޭޕްރީލް 26) - ކެންޏާގެ ދުވުންތެރިޔާ، ސަބެސްޓިއަން ސާވޭ، ދެ ގަޑިއިރަށް ވުރެން އަވަހަށް މެރަތަން އެއް ނިންމައި، ދުނިޔޭގެ ރެކޯޑް މުގުރާލައިފި އެވެ.
އުމުރުން 30 އަހަރުގެ ސާވޭ، 1 ގަޑިއިރު، 59:30 އިން މެރަތަން (ގާތްގަނޑަކަށް 42 ކިލޯމީޓަރުގެ ރޭސް) ނިންމިއިރު، އޭނާ އަކީ ދެ ގަޑިއިރަށް ވުރެން އަވަހަށް މެރަތަން އެއް ނިންމި ފުރަތަމަ އެތުލީޓެވެ.
އެންމެ ފަހުން، މެރަތަންގެ ރެކޯޑް އޮތީ މިދިޔަ އަހަރު އެކްސިޑެންޓެއްގައި ނިޔާވި ކެލްވިން ކިޕްޓަމް އަތުގަ އެވެ. އެއީ، 2023 ވަނަ އަހަރު، ދެ ގަޑިއިރު، 00:35 އިން މެރަތަން ދުވެގެން ހަދާފައި އޮތް ރެކޯޑެކެވެ.
ކެންޏާގެ އެތުލީޓު، އެލިއޫޑް ކިޕްޗޯގޭ ވަނީ 2019 ވަނަ އަހަރު ދެ ގަޑިއިރަށް ވުރެން އަަވަހަށް މެރަތަން އެއް ދުވެފަ އެވެ. އެކަމަކު، އެ ރެކޯޑް ބަލައިނުގަތީ، ކޮންޓްރޯލް ކުރެވޭ ހާލަތެއްގައި އޮތް ރޭހެއް ކަމަށްވާތީ އެވެ. އޮސްޓްރިއާގެ ވިއޭނާގައި ކުރިއަށްދިޔަ އެ ރޭހަކީ، އޯޕަން މުބާރާތަކަށް ނުވުމުގެ އިތުރުން، ކިޕްޗޯގޭ ދުވުނީ ރޮޓޭޓިން ޕޭސްމޭކާސްގެ އެހީގަ އެވެ.
ބީބީސީ އަށް ދިން އިންޓަވިއުގައި، ސާވޭ ބުނީ، މިއީ ކުރިން ހަމައެކަނި ދެކުނު ހުވަފެނެއް ކަމަށާއި ހަގީގަތަކަށް ހެދުމާ އެކު، ހުރިހާ ކަމެއް ހާސިލްވި ދުވަހެއްގެ ގޮތުގައި މި ދުވަސް މުޅި އުމުރަށް ހަނދާނުގައި ހުންނާނެ ކަމަށެވެ.
"މިއީ އަހަރެންގެ ދުވަހެއް. މުޅި އުމުރަށް ހަނދާނުގައި ހުންނާނެ،" ސާވޭ ބުންޏެވެ.
ލަންޑަން މެރަަތަންގައި ސާވޭ ދުނިޔޭގެ ރެކޯޑް މުގުރާލި ރެކޯޑް ހެދިއިރު، އޭނާ ތަފާތު ދައްކާފައިވަނީ، ފަހު 10 ކިލޯމީޓަރުގަ އެވެ. އެއާ އެކު، އޭނާ ވަނީ ދެ ވަނައިގައި ނިންމި އިތިއޯޕިއާގެ ޔޮމީފް ކެޖެލްޗާ ފަހަތަށް ޖައްސާލައިފަ އެެވެ. ސާވޭގެ އިތުރުން ކެޖެލްޗާ އަށް ވެސް ވަނީ ދެ ގަޑިއިރަށް ވުރެން އަވަހަށް ވާދަވެރި މެރަތަން ރޭހެއް ނިންމުމުގެ ޝަރަފް ލިބިފަ އެވެ. އޭނާ ވަނީ، 1 ގަޑިއިރު، 59:41 އިން ރޭސް ނިންމައިފަ އެވެ.
އަދި، މީގެ އިތުރުން، ދުނިޔޭގެ ހާފް މެރަތަން ރެކޯޑް ހޯލްޑަރު، ޔޫގާންޑާގެ ޖޭކަބް ކިޕްލީމޯ ވެސް ވަނީ ކުރިން މެރަތަންގެ އޮފިޝަލް ރެކޯޑް އޮތް ކިޕްޓަމް އަށް ވުރެން އަވަހަށްނިންމައިފަ އެވެ. ކިޕްލީމޯ، ލަންޑަން މެރަތަން ރޭސް ނިންމީ، ދެ ގަޑިއިރު، 00:28 އިންނެވެ.
