ލެސްޓާ (އޭޕްރީލް 22) - އިނގިރޭސި ދެ ވަނަ ޑިވިޝަން، ޗެމްޕިއަންޝިޕްގައި ރޭ ކުޅުނު މެޗުން ހަލް ސިޓީއާ 2-2 އިން އެއްވަރުވެ، ލެސްޓާ ސިޓީ، އިނގިރޭސި ތިން ވަަނަ ޑިވިޝަން، ލީގު ވަން އަށް ރެލިގޭޓްވެއްޖެ އެވެ.
ލެސްޓާ އިން ވަނީ 2016 ވަނަ އަހަރު އިނގިރޭސި ޕްރިމިއާ ލީގުގެ ޗެމްޕިއަންކަން ހޯދައިފި އެވެ. ލެސްޓާ އިން އަންނަ ސީޒަނުގައި އިނގިރޭސި ތިން ވަނަ ޑިވިޝަނުގައި ކުޅޭއިރު، މިއީ، އެ ކްލަބްގެ. 142 އަހަރުވީ ތާރީހުގައި ތިން ވަނަ ޑިވިޝަންގައި ކުޅޭނެ ދެ ވަނަ ފަހަރެވެ. މިދިޔަ ދެ ސީޒަނަށް ބަލާއިރު، 82 މެޗުގެ ތެރެއިން ލެސްޓާ މޮޅުވީ އެންމެ 17 މެޗުންނެވެ.
ސައުވީސް ޓީމު ވާދަކުރާ އިނގިރޭސި ޗެމްޕިއަންޝިޕްގެ ތާވަލުގައި ލެސްޓާ އޮތީ 23 ވަނައިގަ އެވެ. ލެސްޓާ އަށް ރެލިގޭޓްވުމުން ސަލާމަތްވުމުގެ ކުޑަ އުންމީދެއް އޮތީ ވެސް ރޭ ހަލް ސިޓީ ބަލިކޮށްގެންނެވެ. އެކަމަކު، ހަލް އަތުން މޮޅެއް ނުލިބުމުން، ލެސްޓާ އަށް ބޮޑު ވެއްޓުމަކާ ކުރިމަތިލާން ޖެހުނީ އެވެ.
ކިންގް ޕަވާ ސްޓޭޑިއަމްގައި ރޭ 18 ވަނަ މިނިޓްގައި ހަލް ސިޓީން ލީޑުނެގީ ލިއަމް މިލާ ޖެހި ގޯލުންނެވެ. ދެ ވަނަ ހާފުގައި ލެސްޓާ އިން ގާތްގާތުގައި ދެ ގޯލު ޖަހައި ނަތީޖާ އަނބުރާލި އެވެ. އެ ގޮތުން، މެޗުގެ 52 ވަނަ މިނިޓްގައި ލެސްޓާ އިން އެއްވަރުކުރި ލަނޑަކީ ޖޯޑަން ޖޭމްސް ޕެނަލްޓީ އަކުން ކާމިޔާބުކުރި ގޯލެކެވެ. އޭގެ ދެ މިނިޓް ފަހުން، ލޫކް ތޯމަސް ވަނީ ލަނޑެއް ޖަހައި، ލެސްޓާ އަށް ލީޑުނަގައިދީފަ އެވެ. އެކަމަކު، ލެސްޓާގެ އެ ހިތްހަމަޖެހުން މާ ދިގުލައިގޮސްފައިނުވެ އެވެ. މެޗުގެ 63 ވަނަ މިނިޓްގައި އޮލީ މެކްބާނީ ވަނީ ލަނޑު ޖަހައި، ހަލް އަށް އެއްވަރުކޮށްފަ އެވެ.
ލެސްޓާ އިން ތިން ވަނަ ޑިވިޝަނަށް ރެލިގޭޓްވިތާ ފުރަތަމަ ސީޒަނުގައި 2009 ވަނަ އަހަރު އަލުން ދެ ވަނަ ޑިވިޝަނަށް ޕްރޮމޯޓްވި އެވެ. ތައިލެންޑްގެ ބިލިއަނަރު ވިޗާއި ސްރިވަދަަނަޕްރަބަގެ ކިންގް ޕަވާ ގްރޫޕުން ލެސްޓާ ގަތީ 2010 ވަނަ އަހަރު އެވެ. އަދި، އޭގެ ފަހުން ކްލަބްގެ ހިންގުމުގެ މޮޑެލަށް ބަދަލު ގެނެސް، 2014 ވަަނަ އަހަރު ލެސްޓާ، ޕްރިމިއާ ލީގަށް ޕްރޮމޯޓްވި އެވެ. އޭގެ ފަހުން، 2016 ގައި ޕްރިމިއާ ލީގު ކާމިޔާބުކުރިއިރު، 2021 ވަނަ އަހަރު އެފްއޭ ކަޕް ކާމިޔާބުކުރި އެވެ. އެކަމަކު، 2023 ވަނަ އަހަރު ޕްރިމިއާ ލީގުން ރެލިގޭޓްވި ނަމަވެސް އެއް ސީޒަން ތެރޭ އެނބުރި ޕްރިމިއާ ލީގުގެ ޕްރޮމޯޝަނެއް ހޯދި އެވެ. އެކަމަކު، މިދިޔަ އަހަރު އަނެއްކާ ދެ ވަަނަ ޑިވިޝަނަށް ރެލިގޭޓްވިއިރު، ދެ ވަނަ ޑިވިޝަނުގައި އެއް ސީޒަން ހިފަހައްޓައިލެވި، ތިން ވަނަ ޑިވިޝަނަށް ސޮއްސާލީ އެވެ.
