ރާއްޖޭގެ ރިސޯޓްތަކުގެ މެދުގައި ކުރިއަށްދާ އެންމެ ފޯރިގަދަ ފުޓްސަލް މުބާރާތް، ރިސޯޓް ލީގުގެ ނޯތު މާލެ ޒޯންގެ ދެ ވަނަ ބުރުގެ ޖާގައެއް ވަން އެންޑް އޮންލީ ރީތި ރަށާއި ބަރޮސް މޯލްޑިވްސް އިން ހޯދައިފި އެވެ.
ނޯތު މާލެ ޒޯންގައި މިހާރު ކުރިއަށްދަނީ ގްރޫޕް ސްޓޭޖުގެ ފަހު މެޗުތަކެވެ. އެ ގޮތުން، އިއްޔެ ވަނީ، ގްރޫޕް ސީ އާއި ގްރޫޕް ޑީގެ މެޗުތައް ނިމި އެއް ވަނަ ހޯދި ޓީމަށް ދެ ވަނަ ބުރު (ގަދަ 12) ޓީމު ކުޅޭ ބުރުގެ ޖާގައެއް ޔަގީންވެފަ އެވެ.
ގްރޫޕް ސީން އެއް ވަނަ ހޯދީ އިއްޔެ ތާޖު ކޮރަލް ރީފް އަތުން 3-0 އިން މޮޅުވި ރީތި ރަށެވެ. ރީތި ރަށަށް މި މެޗުގައި ލަނޑުތައް ޖަހައިދިނީ، އަލީ މާޖިދު ދެ ގޯލާއި ރިޝްވާން އިބްރާހިމް ރަޝީދު އެވެ.
މި ގްރޫޕްގައި ރީތި ރަށުން ވަނީ ޖުމެއިރާ އޮޅަހާލި އަތުން ފުރަތަމަ މެޗުގައި 3-2 އިން މޮޅުވެފަ އެވެ. ރީތި ރަށުން އެއް ވަނަ ހޯދިއިރު، ދެން، މި ގްރޫޕްގައި އޮތް އޮޅަހާލި އާއި ތާޖު ކޮރަލް އިން ޕްލޭއޮފެއް ކުޅެ، އަނެއް ބުރަށް ދާ ޓީމެއް ކަނޑައަޅާނެ އެވެ.
ގްރޫޕް ޑީގައި ބަރޮސް އާއި ކޮކޯ ބޮޑު ހިތި ކުޅުނު މެޗު ނިމުނީ 1-1 އިން އެއްވަރުވެގެންނެވެ. ބަރޮސްގެ ލަނޑު ޖެހީ، މުހައްމަދު ނަޒީހު އެވެ. އަދި، ބޮޑު ހިތީގެ ލަނޑު ޖެހީ، އިޔާދު މުހައްމަދު އެވެ. ބަރޮސް އިން މި ގްރޫޕް ފުރަތަމަ މެޗުގައި ވަނީ، 5-2 އިން ސެންޓާރާ ގްރޭންޑް ލެގޫން މޯލްޑިވްސް ބަލިކޮށްފަ އެވެ. އެހެންވެ، ބަރޮސް ވަނީ އެއް ވަނައިގެ ގޮތުގައި އަނެއް ބުރަށް ދަތުުރުކޮށްފަ އެވެ. ދެން، މި ގްރުޕްގައި އޮތް ސެންޓާރާ އާއި ބޮޑު ހިތިން ޕްލޭއޮފްގައި ކުޅެގެން މޮޅުވާ ޓީމަކަށް އަނެއް ބުރުގެ ޖާގަ ލިބޭނެ އެވެ.
މުބާރާތުގެ ފުރަތަމަ ބުރު ގްރޫޕް ސްޓޭޖު ނިމުމަށް ފަހު، ތިން ޓީމު ހިމެނޭ ގްރޫޕްތަކުގެ ދެ ވަނަ އާއި ތިން ވަނަގެ މެދުގައި ޕްލޭއޮފެއް ކުޅޭނެ އެވެ. ޕްލޭއޮފުން މޮޅުވާ ޓީމުތަކާއި ގްރޫޕްތަކުގެ އެއް ވަނަ އަދި ގްރޫޕް އެފްގެ ދެ ވަނަ ހިމެނޭ ގޮތަށް ދެ ވަނަ ބުރުގައި ކުޅޭނީ ގަދަ 12 ޓީމެވެ. އެ އަށް ފަހު ދެން އޮންނާނީ ގަދަ ހަ ޓީމުގެ ބުރެކެވެ. އެ ބުރުގެ އެންމެ ފުލަށް ދާ ދެ ޓީމުގެ މެދުގައި، ސެމީ ފައިނަލުގެ ޖާގަ އަކަށް ޕްލޭއޮފެއް ކުޅޭނެ އެވެ. މި ޒޯންގެ ސެމީ ފައިނަލް މި މަހު 23 ވަނަ ދުވަހު ކުޅޭއިރު، ފައިނަލް މެޗު އޮންނާނީ މި މަހުގެ 25 ވަނަ ދުވަހު އެވެ.
މުބާރާތުގައި މިއަދު ކުޅޭނީ ގްރޫޕް އީގައި، އޮބްލު އެކްސްޕީރިއަންސް އާއި އޯގާ ކުޅޭ މެޗާއި ގްރޫޕް އެފްގައި، ވަރު އާއި ބަނޑޮސް ބައްދަލުކުރާ މެޗެވެ.
