ކްލަބް މޯލްޑިވްސްގެ ކިންގްސް ކަޕް ފައިނަލަށް ރޯޑް ރެކްރިއޭޝަން ކްލަބް (އާރްއާރްސީ) އިން ނުކުތީ މެޗުން މެޗަށް ކުރިއެރުން ހޯދައިގެން ދިއުމަށް ކަމަށާއި ފައިނަލުގައި ސީސީ ސްޕޯޓްްސް ކްލަބާ ދެކޮޅަށް ނުކުންނައިރު، އާރްއާރްސީ އަކީ ކޮންމެ މުބާރާތެއްގައި ވެސް ތަށްޓަށް ކުޅޭ ޓީމެއް ކަމަށް އާރްއާރްސީގެ ކޯޗު، އިސްމާއިލް ޝަރީފް (އިއްސެ) ބުނެފި އެވެ.
ކިންގްސް ކަޕްގައި އާރްއާރްސީން ކުޅުނު ފުރަތަމަ މެޗުގައި 6-3 އިން ޖޯލި މޯލްޑިވްސް އަތުން ބަލިވި އެވެ. އޭގެ ފަހުން، ގްރޫޕް ސްޓޭޖުގެ ދެ ވަނަ މެޗުގައި، 6-2 އިން ކުޅިވަރު ވުޒާރާ ކްލަބް ބަލިކުރިއިރު، ނަތީޖާ ނެރެންޖެހޭ މެޗަކަށް ގްރޫޕްގެ ފަހު މެޗުގައި ނުކުމެ، އެންމެ ފަހުގެ ޗެމްޕިއަން، ކްލަބް ވެމްކޯއާ 1-1 އިން އެއްވަރުކޮށް ސެމީ ފައިނަލަށް ދަތުރުކުރި އެވެ.
ސެމީ ފައިނަލުގައި، 4-2 އިން ޓީމު ނައިވާދޫ އަތުން މޮޅުވި މެޗަށް ފަހު، އިއްސެ ބުނީ، ކިންގްސް ކަޕްގައި މި ކުޅެނީ ޕްރީ ސީޒަން ތެރޭގައި ކަމަށްވާއިރު، އެކި ޓާގެޓްތަކެއް ހުންނާނެ ކަމަށެވެ.
"މިއީ އަނެއްހެން މަސައްކަތަށް ބަލާއިރު ޕްރީ ސީޒަން ތެރޭގައި މި އުޅެނީ، ފުދޭ ވަރަކަށް ފިޓްނަސްއާ ހުރިހާ އެއްޗެއް މެނޭޖްކޮށްގެން، ވަރަށް ބޮޑަށް އެކަހަލަ ކަންތައްތަކަށް ބަލައިގެން މި ހިސާބަށް މި އާދެވުނީ އަޅުގަނޑުމެންނަށް، ދެން، ހުރިހާ، ޕްލޭޔަރުން، ވީ ވަަރަކަށް ރޮޓޭޓްކޮށްގެން ބެލެންސް ކޮށްގެން، އެ ގޮތަށް ބަލާއިރު މަސައްކަތް މިއީ ހަމަ،" އިއްސެ ބުންޏެވެ.
އިއްސެ ބުނީ، ކަންކަން ރަނގަޅު ކުރަން ބަލާއިރު، އާރްއާރްސީން ދިޔައީ މެޗަކަށް ފަހު މެޗެއް ކުރިއަށް ކަމަށެވެ. އެއީ، ފައިނަލަށް ނުކުންނައިރު ހިތްހަމަޖެހުމެއްކަން އިއްސެ ފާހަަގަކުރި އެވެ.
"މެޗުން މެޗަށް އަޅުގަނޑުމެން ކުރިއަރަމުން މި ދަނީ ވެސް. އަޅުގަނޑުމެން ވިސްނައިގެން ވެސް ތިބީ އެ ގޮތަށް ދާން ހަަމަ. ޕްރީ ސީޒަން ފަށައިގެން އެ މެޗުތަކުން އެހެން ދަމުން ދަމުން ގޮސް ފަހަރަކު ސްޓޭޖެއް ގިރާކުރަމުން ގޮސް ދާން،" އިއްސެ ބުންޏެވެ.
"ތަށި ވަރަށް މުހިންމު، ރޯޑަކީ (ރޯޑް ރެކްރިއޭޝަން ކްލަބަކީ) އަބަދުވެސް ތަށްޓަށް ނުކުންނަ ޓީމެއް ކްލަބް މޯލްޑިވްސްގަ ވެސް އެ ގޮތަށް މި ދަނީ، އެހެންވީމަ މި މުބާރާތުގައި ވެސް އެ މުހިންމުކަން ކުޑައެއް ނުވާނެ. ހަމަ ތަށްޓަށް އަޅުގަނޑުމެން ނުކުންނާނީ. ޓީމުގެ ގޯލަކީ ތަށްޓަށް ނުކުންނާނީ،"
މި ފަހަރުގެ ކިންގްސް ކަޕްގައި، އާރްއާރްސީގެ ކެޕްޓަން، އިބްރާހިމް އަސްވަދު (ގަބޭ) އަންނަނީ މޮޅު ކުޅުމެއް ދައްކަމުންނެވެ. ސެމީ ފައިނަލުގައި ނައިވާދޫ އަތުން މޮޅުވި މެޗުގެ މޮޅު ކުޅުންތެރިޔާގެ މަގާމު ހޯދި ގަބޭ ބުނީ، މުބާރާތުގެ ފެށުން އާރްއާރްސީ އަށް ދަށްކޮށް ދިޔަސް، މިހާރު އެ ޓީމުގެ ލެވަލް ރަނގަޅުވަމުން އަންނަ ކަމަށެެވެ.
"އަލްހަމްދުލިއްލާހި އެންމެ ފުރަތަމަ މި މެޗު ދެން މަަސައްކަތުން މި މޮޅުވީ، ދެން، އަސްލު މުބާރާތް ފައްޓަައިގެން އެންމެ ފުރަަތަމަ މެޗު ދިޔައީ ވަރަށް ދަށްކޮށް، ވަރަށް މަދު ޕްރެކްޓިސްތަކަކާ އެކީގައި މީހުންތައް ތަންކޮޅެއް ހަމަނުވާތީވެ، އުނދަގޫކޮށް ދިޔައީ ޕްރެކްޓިސްތައް އެކަމަކު ވެސް އިރާދަކުރެއްވިއްޔާ އެއް މެޗަށް ފަހު އަނެއް މެޗު ރަނގަޅުކުރަމުން މިހާރު، އިރާދަކުރެއްވިއްޔާ މި ހުރީ މި ހިސާބަށް (ފައިނަލަށް) އައިސް،" ގަބޭ ބުންޏެވެ.
ގަބޭ ބުނީ، އާރްއާރްސީ ކުރިއަށްދިއުމަކީ، ޓީމު ހުރިހާ އެންމެންގެ މަސައްކަތް ކަމަށާއި އޭގެ ތެރޭގައި މެނޭޖްމަންޓާއި ސަޕޯޓަރުން ވެސް ހިމެނޭ ކަމަށެވެ.
"އިރާދަކުރެއްވިއްޔާ ރެޑީ ވެވެން އޮތް އެންމެ ރަނގަޅަކަށް ރެޑީވާނަން. ކުޅެން ޖެހޭ ވަކި ބަޔަކަށް ނުބަލައި، އިންޝާﷲ މީތި (ކިންގްސް ކަޕް) ނަގަން ނުކުންނާނީ،" ގަބޭ ބުންޏެވެ.
އާރްއާރްސީ އާއި ސީސީ ކުޅޭ ފައިނަލް މެޗު ފަށާނީ މިރޭ 21:00 ގަ އެވެ.
