ރާއްޖޭގެ ރިސޯޓްތަކުގެ މެދުގައި ކުރިއަށްދާ އެންމެ ފޯރިގަދަ ފުޓްސަލް މުބާރާތް، ރިސޯޓް ލީގުގެ ނޯތު މާލެ ޒޯންގައި، ބަނޑޮސް މޯލްޑިވްސް އާއި ފޯ ސީޒަން ރިސޯޓް މޯލްޑިވްސް އެޓް ކުޑަހުރާ އިން ރަނގަޅު މޮޅަކާ އެކު ފެށުން ވަރުގަދަކޮށްފި އެވެ.
ގްރޫޕް އީގައި އޮބްލު އެކްސްޕީރިއަންސް އަތުން ކުޑަހުރާ މޮޅުވީ، 4-3 އިންނެވެ. މި މެޗުގައި، ކުޑަހުރާގެ ލަނޑުތައް ޖެހީ، ހަސަން މައުރޫފް ދެ ގޯލާއި މުހައްމަދު ސިވާޒު އަބްދުﷲ އަދި މުހައްމަދު ޒިހާން ގޯލެކެވެ. އޮބްލު އެކްސްޕީރިއަންސްގެ ލަނޑުތައް ޖެހީ، ޝަމްވީލް އިބްރާހިމް، ހުސެއިން ޝަޒީމް އަދި މުހައްމަދު ސަހާއު އެވެ.
ހަަތަރު ޓީމު ވާދަކުރާ ގްރޫޕް އެފްގައި، ބަނޑޮސް އިން ސަމާ އައިލެންޑް މޯލްޑިވްސް ބަލިކުރީ 5-3 އިންނެވެ. ބަނޑޮސްގެ ލަނޑުތައް ޖެހީ، އަހުމަދު ޝަމާލް ހެޓްރިކެއްގެ އިތުރުން، މުހައްމަދު ޒާހިދު ސައީދު (ޒާޑު) ދެ ގޯލެވެ. ސަމާ އައިލެންޑްގެ ލަނޑުތައް ޖެހީ، އިބްރާހިމް ސޮލާހު ދެ ގޯލުގެ އިތުރުން، ރީހާން ޝަހީދު އަތުން ބައިކޮޅަށް ވަން ގޯލެކެވެ.
މުބާރާތުގެ ފުރަތަމަ ބުރު ގްރޫޕް ސްޓޭޖު ނިމުމަށް ފަހު، ތިން ޓީމު ހިމެނޭ ގްރޫޕްތަކުގެ ދެ ވަނަ އާއި ތިން ވަނަގެ މެދުގައި ޕްލޭއޮފެއް ކުޅޭނެ އެވެ. ޕްލޭއޮފުން މޮޅުވާ ޓީމުތަކާއި ގްރޫޕްތަކުގެ އެއް ވަނަ އަދި ގްރޫޕް އެފްގެ ދެ ވަނަ ހިމެނޭ ގޮތަށް ދެ ވަނަ ބުރުގައި ކުޅޭނީ ގަދަ 12 ޓީމެވެ. އެ އަށް ފަހު ދެން އޮންނާނީ ގަދަ ހަ ޓީމުގެ ބުރެކެވެ. އެ ބުރުގެ އެންމެ ފުލަށް ދާ ދެ ޓީމުގެ މެދުގައި، ސެމީ ފައިނަލުގެ ޖާގަ އަކަށް ޕްލޭއޮފެއް ކުޅޭނެ އެވެ. މި ޒޯންގެ ސެމީ ފައިނަލް މި މަހު 23 ވަނަ ދުވަހު ކުޅޭއިރު، ފައިނަލް މެޗު އޮންނާނީ މި މަހުގެ 25 ވަނަ ދުވަހު އެވެ.
މުބާރާތުގައި މިއަދު ކުޅޭ ދެ މެޗަށް ބަލާއިރު، އަމީންގިރި ކުޅޭނީ ވަރުއާ އެވެ. އަދި، ސަންގެލިން ޖޯއި އައިލެންޑާ ބައްދަލުކުރާނެ އެވެ.
