ރާއްޖޭގެ ރިސޯޓްތަކުގެ މެދުގައި ކުރިއަށްދާ އެންމެ ފޯރިގަދަ ފުޓްސަލް މުބާރާތް، ރިސޯޓް ލީގުގެ ނޯތު މާލެ ޒޯންގައި ވަން އެންޑް އޮންލީ ރީތި ރަށާއި ބަރޮސް މޯލްޑިވްސް އިން ކުޅުނު ފުރަތަމަ މެޗުތަކުން މޮޅުވެއްޖެ އެވެ.
ގްރޫޕް ސީގެ ފުރަތަމަ މެޗުން ރީތި ރަށުން އިއްޔެ ވަނީ 3-2 އިން ޖުމެއިރާ އޮޅަހާލި އައިލެންޑް މޯލްޑިވްސް ބަލިކޮށްފަ އެވެ. އަދި ގްރޫޕް ޑީގައި، ބަރޮސް މޯލްޑިވްސް އިން ވަނީ 5-2 އިން ސެންޓާރާ ގްރޭންޑް ލެގޫން މޯލްޑިވްސް ބަލިކޮށްފަ އެވެ.
ރީތި ރަށަށް އިއްޔެގެ މެޗުގައި ލަނޑުތައް ޖަހައިދިނީ، އަހުމަދު ޝަމީމް ދެ ގޯލާއި ޝަމްހާން އަބްދުލް ރަހުމާން އެވެ. ޖުމެއިރާ އޮޅަހާލިގެ ލަނޑުތައް ޖެހީ، މުހައްމަދު އިޝާން އެވެ.
ބަރޮސް އަށް އިއްޔެގެ މެޗުގެ ލަނޑުތައް ޖަހައިދިނީ، މުހައްމަދު އިރުފާން ދެ ގޯލާއި ރިފާއު މޫސާ ފަހުމީ، ހަސަން ސަލީމް އަދި އަހުމަދު މިރުސާދު އެވެ. ސެންޓާރާ ގްރޭންޑް ލެގޫންގެ ދެ ލަނޑު ވެސް ޖެހީ، މުހައްމަދު އިޔާން އިސްމާއިލް އެވެ.
ނޯތު މާލެ ޒޯންގައި ޓީމުތައް ބެހިފައިވަނީ، ހަ ގްރޫޕަކަށެވެ. ފުރަތަމަ ފަސް ގްރޫޕްގެ ތެރެއިން ކޮންމެ ގްރޫޕެއްގައި، ތިން ޓީމު ހިމެނޭއިރު، ހަ ވަނަ ގްރޫޕްގައި ހަތަރު ޓީމު ވާދަކުރެ އެވެ.
ގްރޫޕް އޭގައި ރިޓްޒް ކާލްޓަން، ސަންގެލި އަދި ޖޯއި އައިލެންޑް ހިމެނޭއިރު، ގްރޫޕް ބީގައި ހިމެނެނީ، ޕަޓިނާ، ހެލެންގެލި އަދި ހުވަފެންފުށި އެވެ. ގްރޫޕް ސީގައި ހިމެނެނީ، ރީތި ރަށް، ޖުމެއިރާ އަދި ތާޖު ކޮރަލް އެވެ. ގްރޫޕް ޑީގައި ހިމެނެނީ ބަރޮސް، ސެންޓާރާ އަދި ބޮޑު ހިތި އެެވެ. ގްރޫޕް އީގައި އޮބްލު އެކްސްޕީރިއަންސް، ކުޑަ ހުރާ އަދި އޯގާ ހިމެނޭއިރު، ގްރޫޕް އެފްގައި އޮތީ ބަނޑޮސް، ސަމާ އައިލެންޑް، އަމީންގިރި އަދި ވަރު އެވެ.
މުބާރާތުގެ ފުރަތަމަ ބުރު ގްރޫޕް ސްޓޭޖު ނިމުމަށް ފަހު، ތިން ޓީމު ހިމެނޭ ގްރޫޕްތަކުގެ ދެ ވަނަ އާއި ތިން ވަނަގެ މެދުގައި ޕްލޭއޮފެއް ކުޅޭނެ އެވެ. ޕްލޭއޮފުން މޮޅުވާ ޓީމުތަކާއި ގްރޫޕްތަކުގެ އެއް ވަނަ އަދި ގްރޫޕް އެފްގެ ދެ ވަނަ ހިމެނޭ ގޮތަށް ދެ ވަނަ ބުރުގައި ކުޅޭނީ ގަދަ 12 ޓީމެވެ. އެ އަށް ފަހު ދެން އޮންނާނީ ގަދަ ހަ ޓީމުގެ ބުރެކެވެ. އެ ބުރުގެ އެންމެ ފުލަށް ދާ ދެ ޓީމުގެ މެދުގައި، ސެމީ ފައިނަލުގެ ޖާގަ އަކަށް ޕްލޭއޮފެއް ކުޅޭނެ އެވެ. މި ޒޯންގެ ސެމީ ފައިނަލް މި މަހު 23 ވަނަ ދުވަހު ކުޅޭއިރު، ފައިނަލް މެޗު އޮންނާނީ މި މަހުގެ 25 ވަނަ ދުވަހު އެވެ.
