އިންޓަނޭޝަނަލް ޓެނިސް ފެޑެރޭޝަން (އައިޓީއެފް) އިން ރުހުންދީފައިވާ ޓެނިސް މުބާރާތެއް، މޯލްޑިވްސް ޖޫނިއާ އޯޕަންގެ ނަމުގައި އަންނަ ހަފްތާގައި ފަށަން ތައްޔާރުވެއްޖެ އެވެ.
މާލޭ ޓެނިސް ކޯޓުގައި މިދިޔަ އަހަރުގެ ޑިސެމްބަރު މަހު ވަނީ އޭޝިއަން ޓެނިސް ފެޑެރޭޝަން (އޭޓީއެފް)ގެ ޖޫނިއާ ދެ މުބާރާތް ކަމަށްވާ އޭޓީއެފް މޯލްޑިވްސް އޯޕަން އާއި އޭޓީއެފް މޯލްޑިވްސް ޖޫނިއާ އޯޕަން (16 އަހަރުން ދަށުގެ ދެ މުބާރާތް) ހޯސްޓްކޮށްފަ އެވެ.
މި މަހު 16-30 އަށް މާލޭގައި ބާއްވަން ޝެޑިއުލްކޮށްފައިވާ، ދުނިޔޭގެ ޓެނިސް ޖަމިއްޔާ، އައިޓީއެފްގެ މޯލްޑިވްސް ޖޫނިއާ އޯޕަންގައި، ރާއްޖޭގެ އިތުރުން، 23 ގައުމެއްގެ ކުޅުންތެރިން ފެނިގެންދާނެ އެވެ. ވާދަކުރާ ގައުމުތަކުގެ ތެރޭގައި، ދުނިޔޭގެ ޓެނިހުގައި މަޝްހޫރު ގައުމުތައް ވެސް ހިމެނެ އެވެ.
އެ ގޮތުން، ގައުމުތަކަށް ބަލާއިރު، ޖަޕާން، ޗައިނާ، ދެކުނު ކޮރެއާ، ސްވިޒަލެންޑް، މިސްރު، އިންޑިއާ، ސްޕެއިން، އޮސްޓްރޭލިއާ، ތައިލެންޑް، ހޮން ކޮންގް، ޕާކިސްތާން، ކަޒަކްސްތާން، ޗައިނީސް ޓައިޕޭ، ފިލިޕީންސް، އެމެރިކާ، ރަޝިއާ، ފްރާންސް، އިންގްލެންޑް، ސިންގަޕޫރު، އިޓަލީ، ޕޮލެންޑް، ނެދަލެންޑްސް އަދި ޔޫކްރެއިން ހިމެނެ އެވެ.
މިދިޔަ އަހަރު ރާއްޖޭގައި ބޭއްވި، އޭޓީއެފްގެ ޖޫނިއާ ދެ މުބާރާތުގައި ވެސް ރާއްޖޭގެ ކުޅުންތެރިން ރަނގަޅު ކާމިޔާބެއް ހޯދި އެވެ. އެ ގޮތުން، އޭޓީއެފްގެ ޖޫނިއާ ދެ މުބާރާތުގެ ވެސް ސިންގަލްސް ޗެމްޕިއަންކަން ހޯދައި، ގައުމީ ޓެނިސް ޓީމުގެ ތަރި، އާރާ އާސާލް އާޒިމް ތާރީހުން ޖާގަ ހޯދި އެވެ.
