ރާއްޖޭގައި މިހާރު ކުރިއަށްދާ އިންޓަނޭޝަނަލް ޓެނިސް ފެޑެރޭޝަން (އައިޓީއެފް) އިން ރުހުންދީފައިވާ ޓެނިސް މުބާރާތެއް ކަމަށްވާ މޯލްޑިވްސް ޖޫނިއާ އޯޕަންގެ ދެ ވަނަ ހަފްތާގެ މުބާރާތުން ވެސް އަންހެން ޑަބަލްސް ކެޓަގަރީން ރާއްޖޭގެ އާރާ އާސަލް އާޒިމް އާއި ތައިލޭންޑްގެ ޓެރީޓާ ހޮން ޔޮންގެ ޕެއާ އިން ރަން މެޑަލް ހޯދައިފި އެވެ.
ފުރަތަމަ ހަފްތާގެ މުބާރާތުގައި، އަންހެން ޑަބަލްސް ކެޓަގަރީގެ ފައިނަލުން ރާއްޖޭގެ އާރާ އާއި ތައިލޭންޑްގެ ޓެރީޓާގެ ޕެއާ އިން ވާދަކުރީ ދެކުނު ކޮރެއާގެ ސެއުން އާއި ޗައިނާގެ ޔިޝާންގެ ޕެއާއާ އެވެ. ގަޑިއިރަކަށް ދިގުދެމިގެންދިޔަ މި މެޗުން، އާރާ އާއި ޓެރީޓާ މޮޅުވީ، 6-2، 6-1 އިންނެވެ. ދެ ވަނަ މުބާރާތުގައި ވެސް އާރާ އާއި ޓެރީޓާ ނުކުތީ ސެއުން އާއި ޔިޝާންގެ ޕެއާއާ ދެކޮޅަށެވެ. މި މެޗުން މޮޅުވީ، 6-1، 6-3 އިންނެވެ.
އެހެންކަމުން، އާރާ މި ވަނީ، މިދިޔަ އަހަރުގެ އޭޓީޕީ މުބާރާތުގައި ހޯދި ފަދަ ކާމިޔާބެއް މި ފަހަރުގެ އައިޓީއެފް މުބާރާތުގައި ވެސް ހާސިލްކޮށްފަ އެވެ. މިދިޔަ އަހަރު ރާއްޖޭގައި ބޭއްވި، އޭޓީއެފްގެ ޖޫނިއާ ދެ މުބާރާތުގައި ވެސް ސިންގަލްސް ޗެމްޕިއަންކަން ހޯދައި، ގައުމީ ޓެނިސް ޓީމުގެ ތަރި، އާރާ ތާރީހުން ޖާގަ ހޯދި އެވެ. މި ފަހަރު އޭނާ ކާމިޔާބީގެ ހަރުފަތް މަތިކުރީ ދުނިޔޭގެ މުބާރާތުގަ އެވެ.
ސިންގަލްސް އަށް ބަލާއިރު، އައިޓީއެފް މުބާރާތުގައި ރާއްޖޭން އެންމެ ރަނގަޅު ކުޅުމެއް ދެއްކީ ނަބާ ނިޝާން އެވެ. ދެ މުބާރާތުގައި ވެސް ނަބާ ވަނީ ސެމީ ފައިނަލުގައި ކުޅެފަ އެވެ. ފުރަތަމަ މުބާރާތުގެ ސެމީގައި، ދެކުނު ކޮރެއާގެ ސިއުންޔަންއާ ދެކޮޅަށް ހަތަރު ގަޑިއިރަށް ވުރެން ދިގުދެމިގެންދިޔަ މެޗުން ނަބާ ބަލިވީ، 6-2، 6(4)-7(7) އަދި 7-5 އިންނެވެ. ދެ ވަނަ މުބާރާތުގެ ސެމީގައި ޓެރީޓާއާ ކުޅެގެން ނަބާ ބަލިވީ، 7-6، 6-0 އިންނެވެ. މި މެޗުގެ ދިގު މިނަކީ، ދެ ގަޑިއިރާއި 10 މިިނިޓެވެ.
