ރާއްޖޭގެ ރިސޯޓްތަކުގެ މެދުގައި ބާއްވާ އެންމެ ބޮޑު ފުޓްސަލް މުބާރާތް، ރިސޯޓް ލީގު 2025 ގެ އެންމެ ފޯރިގަދަ އެއް ޒޯން ކަމަށްވާ ބ. އަތޮޅުގެ ބުރުގެ ފުރަތަމަ މޮޅު، މިލައިދޫ މޯލްޑިވްސް އާއި ފިނޮޅު މޯލްޑިވްސް އިން ހޯދައިފި އެވެ.
ތިން ޓީމު ވާދަކުރާ ގްރޫޕް އޭގައި އިއްޔެ، މުބާރާތް ހޯސްޓް ކުރާ އަވަނި+ފަރެސް އަތުން މިލައިދޫ މޮޅުވީ 2-1 އިންނެވެ. އިޝާން އިބްރާހިމް (ސައްޓު)ގެ ކޯޗުކަމުގައި ކުޅޭ މިލައިދޫގެ ލަނޑުތައް ޖަހައިދިނީ، ޔޫސުފް މުހައްމަދު އާއި މުހައްމަަދު އަޖުފާން (އަޖޭ) އެވެ.
މި މެޗުގައި، އަވަނި+ފަރެސްގެ ހަމައެކަނި ލަނޑު ޖެހީ، މަންސޫރު މުހައްމަދު އެވެ.
މި މެޗުގެ މޮޅު ކުޅުންތެރިޔާގެ މަގާމު ހޯދައިފައިވަނީ، މިލައިދޫގެ އުނައިސް ޒުބައިރު އެވެ. މި ގްރޫޕްގެ ދެ ވަނަ މެޗުގައި، މިލައިދޫން މިއަދު ކުޅޭނީ ފޯ ސީޒަންއާ އެވެ.
ފިނޮޅު މޯލްޑިވްސް އަށް ލަނޑެއް ޖަހައިދިނުމަށް ފަހު އެ ޓީމުގެ ކުޅުންތެރިން އުފާފާޅުކުރަނީ.--- ފޮޓޯ: އިމޭޖަސް.އެމްވީ
ހަތަރު ޓީމު ހިމެނޭ ގްރޫޕްގައި، ފިނޮޅުން ވައްކަރު މޯލްޑިވްސްގެ މައްޗަށް ކުރިހޯދީ، 7-2 އިންނެވެ. ރާއްޖޭގެ މަޝްހޫރު ފުޓްބޯޅަ ތަރި، މުހުތާރު ނަސީރު (ޓޫކިލޯ)ގެ ކޯޗުކަމުގައި ކުޅޭ ފިނޮޅަށް މި މެޗުގައި ލަނޑުތައް ޖަހައިދިނީ، ހަސަން ޝާމް ހެޓްރިކެއްގެ އިތުރުން، އިބްރާހިމް އަފްލާހު ދެ ގޯލާއި އަބްދުލް ރަހުމާން ސަމާއު އެވެ. މުހައްމަަދު އައްޒާމްގެ ކޯޗުކަމުގައި ކުޅޭ ވައްކަރުގެ ލަނޑުތައް ޖެހީ، ހަސަން ނާއިލް ދާއޫދު އެވެ. މި މެޗުގެ މޮޅު ކުޅުންތެރިއަކަށް ހޮވުނީ، ފިނޮޅުގެ ޝާމް އެވެ.
މި ގްރޫޕްގެ ދެ ވަނަ މެޗުގައި، މިއަދު، އަމިއްލަ އިން ކުޅޭނީ އަނަންތަރާއާ އެެވެ.
ބ. އަތޮޅު ޒޯނުގެ ސެމީ ފައިނަލް މެޗުތައް މި މަހުގެ 15 ވަނަ ދުވަހު ކުޅޭއިރު، ފައިނަލް މެޗު އޮންނާނީ މި މަހު 17 ވަނަ ދުވަހު އެވެ.
