ރިސޯޓް ލީގުގެ އަރި ޒޯނުގައި ކޮންރެޑް މޯލްޑިވްސް ރަންގިލި އައިލެންޑުން، ވިލަމެންދޫ އައިލަންޑް ރިސޯޓް އެންޑް ސްޕާ ބަލިކޮށް ފައިނަލާ ގާތަށް ޖެހިލައިފި އެވެ.
މި މުބާރާތުގެ އަރި ޒޯނުގައި ކޮންރެޑުން ކުޅުނު ފުރަތަމަ މެޗުގައި ބާސެލޯ ވޭލް ލެގޫން މޯލްޑިވްސްއާ އެއްވަރުވީ 1-1 ގެ ނަތީޖާ އަކުންނެވެ. އެކަމަކު ޖެހިގެން އައި ދެ ވަނަ މެޗުގައި ލިލީ ބީޗް ރިސޯޓް އެންޑް ސްޕާ 1-0 ގެ ނަތީޖާ އަކުން ބަލިކުރި އެވެ.
އިއްޔެ ހަވީރު ވިލަމެންދޫގެ މައްޗަށް ކޮންރެޑުން ކުރިހޯދީ 4-1 ގެ ނަތީޖާ އަކުންނެވެ.
މި މެޗުގެ ހަތަރު ވަނަ މިނިޓްގައި ކޮންރެޑުން ވަނީ ގޯލު ޖަހައި ލީޑު ނަގައިފަ އެވެ. މި ގޯލު އެ ޓީމަށް ޖަހައިދިނީ މުހައްމަދު ރިފާއު ހަސަން އެވެ. އަދި އޭގެ ހަތް މިނިޓް ފަހުން، މެޗުގައި މޮޅު ކުޅުމެއް ދެއްކި ރިފާއު ވަނީ އިތުުރު ގޯލެއް ޖަހައި ކޮންރެޑަށް ލީޑު ފުޅާކޮށްދީފަ އެވެ.
ކޮންރެޑްގެ ތިން ވަނަ ގޯލު މެޗުގެ 33 ވަނަ މިނިޓްގައި އެ ޓީމަށް ޖަހައިދިނީ ހުސެއިން އީސަ އެވެ. އެކަމަކު އޭގެ ހަތަރު މިނިޓް ފަހުން ވިލަމެންދޫގެ އިބްރާހީމް ރިފާއު ވަނީ ގޯލެއް ޖަހައި ފަރަގު ކުޑަކޮށްފަ އެވެ.
ކޮންރެޑްގެ ހަތަރު ވަނަ ގޯލު މެޗުގެ ފަހު ވަގުތުކޮޅުގެ ތެރޭގައި އެ ޓީމަށް ޖަހައިދިނީ ވެސް އީސަ އެވެ.
ލީގު އުސޫލުން ކުޅޭ މި ޒޯނުގައި ކޮންރެޑަށް ބާކީ އޮތީ އެންމެ މެޗެކެވެ. އެއީ މާދަމާ ހަވީރު ކުރަމައްޗާ ދެކޮޅަށް ކުޅޭ މެޗެވެ. މި މެޗުން މޮޅުވެގެން ކޮންރެޑަށް ފައިނަލަށް ދިޔުމުގެ ފުރުސަތު އޮންނާނެ އެވެ.
ރިސޯޓް ލީގުގެ އަރި ޒޯނުގެ އެންމެ ކާމިޔާބު ޓީމަކީ ކޮންރެޑް މޯލްޑިވްސް އެވެ. ކޮންރެޑުން ވަނީ އަރި ޒޯނުގެ ތަށި ހަތް ފަހަރު ކާމިޔާބުކޮށްފަ އެވެ. އަދި ކޮންރެޑް ނޫން ޓީމަކުން މި ޒޯނުގެ ތަށި ނެގުނު ހަމައެކަނި ޓީމަކީ ވިލަމެންދޫ އެވެ.
އަރި ޒޯނުގައި މި ފަހަރު ޖުމްލަ ފަސް ރިސޯޓުން ވާދަކުރާނެ އެވެ. އެއީ މި ޒޯނުގެ މެޗުތައް ކުރިއަށްދާ ރިސޯޓް ކޮންރެޑް މޯލްޑިވްސްގެ އިތުރުން، ބާސެލޯ، ވިލަމެންދޫ، ކުރަމަތި އަދި ލިލީ ބީޗް އެވެ.
