ސަރުކާރުން ކޮންޓްރެކްޓަރުންނަށް ދޭން ޖެހޭ ފައިސާ ދެމުންދާ ކަމަށް ރައީސް ޑރ. މުހައްމަދު ވިދާޅުވި ނަމަވެސް ރާއްޖޭގެ ގިނަ ކުންފުނިތައް ތިބީ ސަރުކާރުން ފައިސާ ނުދޭތީ ބަނގުރޫޓުވުމުގެ ހާލަތުގައި ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
ހުވަދޫ އަތޮޅަށް ކުރައްވާ ދަތުރުގައި ގދ. ހޯނޑެއްދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ރައީސް މުއިއްޒު ވިދާލުވީ އެތެރޭގެ ދަރަނިތައް ދެއްކުމުގެ ގޮތުން މި ހަފްތާ ތެރޭގައި ފިނޭންސް މިނިސްޓްރީން ދިވެހި ވިޔަފާރިތަކަށް 500 އަށް ވުރެ ގިނަ މިލިއަން ރުފިޔާ ދޫކުރާނެ ކަމަށެވެ.
ރައީސްގެ އެ ވާހަކަތަކަށް ރައްދު ދެއްވައި އަމީރު ކުރެއްވި ޓްވީޓެއްގައި ވަނީ އޮގަސްޓު 31، ގައި ރާއްޖޭގެ ޓީވީ ޗެނަލަކަށް ރައީސް ދެއްވި އިންޓަވިއުގައި ކޮންޓްރެކްޓަރުންނަށް ފައިސާ ދޫކުރުމާ ގުޅޭގޮތުން ދެއްކި ވާހަކަތަކުގެ ވީޑިއޯއެއް ހިމަނާފަ އެވެ.
"އަޅުގަނޑުގެ ޓާގެޓަކީ ނޮވެމްބަރު މަސް ނިމެންވާއިރަށް މިހާރު ޕެންޑިންގައި ހުރި ފައިސާ މީހުންނަށް ދީ ނިންމޭނެ އިރާދުކުރެއްވިއްޔާ،" އެ އިންޓަވިއުގައި ރައީސް މުއިއްޒު ވިދާޅުވި އެވެ.
ރައީސް ދެއްވި މުއްދަތު ފަހަނައަޅައި ގޮސް ތިން މަސް ދުވަސް ހޭދަވެގެންދާއިރު ވެސް ފައިސާ ނުދޭކަން އަމީރު ފާހަގަކުރެއްވި އެވެ. އެއާ ހިލާފަށް އެމްޑީޕީގެ ސަރުކާރުން ކޮވިޑުގެ ދުވަސްވަރާއި ރަޝިޔާ-ޔޫކްރެއިން ހަނގުރާމަ ފެށިގެން އައި ދުވަސްވަރު ވެސް ބިލުތަކަށް ފައިސާ ދެއްކި ކަމަށް އަމީރު ވިދާޅުވި އެވެ.
"ރައީސް އެއް ދޮގެއް މާ ގިނައިން ތަކުރާރު ކުރީމަ މީހުންނަށް އޮޅުވާލެވޭނެ ކަމަށް ހީކުރިޔަސް ހަގީގަތް އޮޅުވައި ނުލެވޭނެ. މި ސަރުކާރު އައިސް މި ވީ ދުވަސްތަކުގައި ގިނަ ކޮންޓްރެކްޓަރުންނަށް އެއްވެސް ގޮތަކަށް ޕޭ ނުކުރޭ. ގިނަ ކުންފުނިތައް މިހާރު ތިބީ ބަނގުރޫޓްވުމުގެ ހާލަތުގައި،" އަމީރު ވިދާޅުވި އެވެ.
ޖުމްހޫރީ ދުވަހުގެ ޖަލްސާގައި ވާހަކަ ދައްކަވަމުން ރައީސް މުއިއްޒު ވަނީ ދެ ހަފުތާއަށް ވުރެ ގިނަ ދުވަސްވެފައި ހުރި ފަސް މިލިއަން ރުފިޔާއިން ދަށުގެ ހުރިހާ ބިލުތަކަށްވާ 501 މިލިއަން ރުފިޔާ ދަައްކާ ނިންމާފައިވާ ކަމަށް ވިދާޅުވެފަ އެވެ.
އެހެން ނަމަވެސް، ފަސް މިލިއަނުން ދަށުގެ ބިލުތަކަށް ފައިސާ ނުލިބޭ އެތައް ކުންފުންޏެއް އޮތްކަން ވަނީ އެނގިފަ އެވެ.
ކުންފުނިތަކުން ކޮށްފައިވާ ސަރުކާރުގެ މަސައްކަތްތަކަށް ދޭން ޖެހޭ އަގު ދެމުންދާ ކަމަށް ރައީސް ތަކުރާރުކޮށް ޕޯޑިއަމްގައި ވިދާޅުވި ނަމަވެސް އަމިއްލަ ކޮންޓްރެކްޓަރުންނަށް ފައިސާ ނުލިބުމުގެ ކަންބޮޑުވުން މި ސަރުކާރު ފެށުނީއްސުރެ ގެންދަނީ ފާޅުކުރަމުންނެވެ. އެ ކަމުގެ ޒިންމާ ރައީސް މުއިއްޒުގެ ސަރުކާރުން މަތިކުރަނީ މިދިޔަ ސަރުކާރާ އެވެ.
މިދިޔަ އަހަރު ދައުލަތަކަށް ރެކޯޑު އާމްދަނީ ލިބުނުއިރު ވެސް ބަރާބަރަށް ބިލުތަކަށް ފައިސާ ނުލިބި ބައެއް ކޮންޓްރެކްޓަރުން ކުރަމުންދިޔަ ވިޔަފާރިތަކަށް ވެސް ވަނީ ބުރޫ އަރާފަ އެވެ. "އަދަދު" ނޫހަށް މައުލޫމާތު ދިން ބައެއް ކޮންޓްރެކްޓަރުން ބުނި ގޮތުގައި ބައެއް ބިލުތަކަށް ފައިސާ ނުދޭތާ އަހަރަކަށް ވުރެ ގިނަ ދުވަސް ވަނީ ފާއިތުވެފަ އެވެ.
