މާލޭ ވިޔަފާރި ބަނދަރު ތިލަފުށި އިންޑަސްޓްރިއަލް އައިލެންޑަށް ބަދަލު ކުރުމުގެ މަސައްކަތް ފަށައި، މުދަލާއެކު ހުރިގޮތަށް ކަނޑުމަގުން ކޮންޓޭނާ ކްލިއާ ކުރުމުގެ މަސައްކަތް ތިލަފުށިން ދޭ ގޮތަށް ހަމަޖައްސައިފި އެވެ.
އެމްޕީއެލްއިން ބުނީ އެ މަސައްކަތްތައް ފަށާފައި ވަނީ އެމްޓީސީސީއާ ހަވާލުކޮށްގެން ތިލަފުށީގައި ހެދި 100 މީޓަރުގެ ކީވޯލް ސަރަހައްދުގައި ކަމަށެވެ. އެއީ، ތިލަފުށީގައި ތަރައްގީކުރާ ވިޔަފާރި ބަނދަރުގެ ކާގޯ ޓާމިނަލް ސަރަހައްދުކަމަށް އެ ކުންފުނިން ބުންޏެވެ.
ޑައިރެކްޓު ޑެލިވަރީ ނުވަތަ ޑީއާރްގެ ގޮތުގައި ކަނޑުމަގުން ކޮންޓޭނާ ކްލިއާ ކުރުމުގެ މަސައްކަތް ތިލަފުށީގައި ފެށި ނަމަވެސް، ކާބޯތަކެއްޗާއި ބޭހުގެ ބާވަތްތައް މާލެ އާއި ހުޅުމާލެއިން ޑީއާރްގެ ގޮތުގައި ކްލިއާ ކުރެވޭނެކަމަށް އޭނާ ވިދާޅުވި އެވެ.
މާލެ ބަނދަރަށް ގެންނަ ކޮންޓޭނަރުތަކުގެ ބޮޑު ބަޔަކީ ޑީއާރް ކޮންޓޭނާތައް ކަމަށާއި އެ ކޮންޓޭނަރުތައް މިހާރު ކްލިއާ ކުރަނީ ހުޅުމާލެ ޓާމިނަލުން ކަމަށް އެމްޕީއެލްއިން ބުންޏެވެ. ނަމަވެސް، އެ ހިދުމަތް ތިލަފުށްޓަށް ބަދަލުކުރުމާއެކު ހުޅުމާލެ ޓާމިނަލްގެ ލޯކަލް ކީވޯލްގެ އޮޕަރޭޝަންތަކަށް ލުއި ލިބޭނެ ކަމަށް އެ ކުންފުނިން ބުންޏެވެ.
ތިލަފުށީ ބަނދަރު ހެދުމުގެ ފުރަތަމަ ފޭސް ސަރުކާރުން ހަވާލު ކުރީ ޗައިނާ ހާބާ އިންޖިނިއަރިން ކޮމްޕެނީއާ ހަވާލު ކުރީ ފެބްރުއަރީ، 2026، ގަ އެވެ.
ތިލަފުށީ ބަނދަރު ހެދުމުގެ ފުރަތަމަ ފޭސްގެ ދަށުން ޗައިނާ ކުންފުންޏާ ހަވާލު ކުރީ ބަނދަރު ހެދުމުގެ ދިރާސާ އާއި ޑިޒައިންގެ މަސައްކަތެވެ. އޭގެ އިތުރުން ބަނދަރުގެ ކީވޯލް އެޅުން އެމްޓީސީސީއާ ވަނީ ހަވާލުކޮށްފަ އެވެ.
ބަނދަރުގެ މަސައްކަތް ޗައިނާއާ ހަވާލު ކުރުމުން އެމެރިކާ އާއި އިންޑިއާއިން ވަނީ ކަންބޮޑުވުން ފާޅުކޮށްފަ އެވެ. ބަނދަރުގެ މަސައްކަތް ޗައިނާ ކުންފުންޏަކާ ހަވާލު ކުރީ ވަކި ގައުމެއް އިސް ކުރުމުގެ ނިޔަތުގައި ނޫންކަން މި ފަހުން ދިވެހި ސަރުކާރުން ވަނީ ބުނެފަ އެވެ.
