ޓެނިސް އެސޯސިއޭޝަން އޮފް މޯލްޑިވްސް (ޓީއޭއެމް) އިން ކުރަމުން އަންނަ މަސައްކަތުގެ ސަަބަބުން ރާއްޖޭގެ ޓެނިސް ދެން އޮތް ލެވަލަށް ދާ ކަމުގެ މަންޒަރުތައް މިހާރު ފެންނަމުން އަންނަ ކަމަށް ސްޕޯޓްސް މިނިސްޓަރު، އަބްދުﷲ ރާފިއު (ރާއްޕެ) ވިދާޅުވެއްޖެ އެވެ.
ރާއްޖޭގައި ފުރަތަަމަ ފަހަރަށް އޭޝިއަން ޓެނިސް ފެޑެރޭޝަން (އޭޓީއެފް)ގެ ޖޫނިއާ ލެވަލްގެ ދެ މުބާރާތް ފާއިތުވި 12 ދުވަސް ތެރޭ ވަނީ ބާއްވައިފަ އެވެ. ދެ މުބާރާތުގެ ނިންމުމުގެ ރަސްމިއްޔާތު އިއްޔެ ޝަރަފްވެރިކޮށްދެއްވީ މިނިސްޓަރު ރާފިއު އެވެ.
ހާޒިރުވެ ތިބި، ޓެނިސް އެސޯސިއޭޝަންގެ އިސް ފަރާތްތަކާއި މުބާރާތުގައި ވާދަކުރި ދިވެހި އާއި ބިދޭސީ ކުޅުންތެރިން އަދި އެ ކުޅުންތެރިންގެ އާއިލާ މެމްބަރުންނާ މުހާތަބުކޮށް ދެއްކި ވާހަކައިގައި މިނިސްޓަރު ރާފިއު ވަނީ، އިނގިރޭސި ބަހުންނާއި ދިވެހި ބަހުން ވާހަކަ ދައްކަވައި، މި މުބާރާތްތައް ބޭއްވުމުގެ މުހިންމު ކަމާއި މީގެ ސަަބަބުން ކުރާ ފައިދާތަކުގެ ވާހަކަ ހިއްސާކޮށްފަ އެެވެ.
އެ ގޮތުން، މިނިސްޓަރު ރާފިއު ވިދާޅުވީ، ޓެނިސް އެސޯސިއޭޝަނުން މުޅި ރާއްޖެ އަށް މި ކުޅިވަރު އިތުރަށް ފުޅާކުރަން ކުރާ މަސައްކަތާއި އާ އިންފްރާސްޓްރަކްޗާ ބިނާ ކުރުމަށް ކުރާ ކަންކަމާއި އިންޓަނޭޝަނަލް މުބާރާތް ބާއްވައި ކުރާ މަސައްކަތުން ޓެނިސް ދެން އޮތް ލެވަަލަށް ދާ މަންޒަރު ފެންނަ ކަމަށެވެ.
"ވަރަށް މުހިންމު ވަރަށް ބޮޑު ބޭނުމެއް އަޅުގަނޑުމެންނަށް ވެސް ފުދިގެން ދިޔަ މުބާރާތަކަށް ވެގެން މި ދިޔައީ އަޅުގަނޑުމެންގެ ތިބި ޔަންްގް ޓެލެންޓް އަޅުގަނޑުމެންނަށް އައިޑެންޓިފައި ވެ އެ ކަމަށް ޑިވެލޮޕްކުރަން ކުރެވޭނެ ގިނަ ކަންތައްތަކެއް ވެސް އަޅުގަނޑުމެންގެ ތެރޭގައި ޑިސްކަސް ކުރެވިގެން ހިނގައްޖެ،" މިނިސްޓަރު ވިދާޅުވި އެވެ.
"އިރާދަކުރެއްވިއްޔާ މިނިސްޓްރީގެ ފަރާތުން ޓެނިސް ކުރިއެރުވުމަށް ކުރަން ޖެހޭ ހުރިހާ މަސައްކަތެއްގައި މިނިސްޓްރީގެ އެއްބާރުލުން ލިބޭނެ ވާހަަކަ ވެސް މި ފުރުސަތުގައި ދަންނަވަން. އެސޯސިއޭޝަނުން ކުރަމުންގެންދާ ބުރަ މަސައްކަތަށް ފަށްފަށުން ޝުކުރު ދަންނަވަން، ދުއާ އަކީ ރާއްޖޭގެ ކުޅިވަރު ކުރިއެރުވުމަށް އަޅުގަނޑުމެން އެންމެން ގުޅިގެން މި ކުރާ މަސައްކަތުގައި މާތް ﷲ ބަރާކާތްލެއްވުން،"
އޭޓީއެފް ދެ މުބާރާތުގެ އަންހެން ސިންގަލްސް ޗެމްޕިއަންކަން ހޯދީ ރާއްޖޭގެ އާރާ އާސާލް އާޒިމް އެވެ. އަދި އާރާ އާއި ނަޔާރާ އުސާމާ އަލީގެ ޕެއާ އިން ފުރަތަމަ މުބާރާތުގެ އަންހެން ޑަބަލްސް ޗެމްޕިއަންކަން ހޯދި އެވެ. އޭޓީއެފް ދެ ވަނަ މުބާރާތުގެ އަންހެން ޑަބަލްސް ޗެމްޕިއަންކަން ހޯދީ ރާއްޖޭގެ ކެރީން އާއި ކަޒަކްސްތާންގެ އަރްޒާން ބަޔަލީނާގެ ޕެއާ އިންނެވެ.
