ސާއިދު ސްޕޯޓްސް އަށް އަލަށް ވަންނަން ބޭނުންވާ ކުދިން އަށް އެ ފުރުސަތު އެ އެކަޑަމީން ހުޅުވާލައިފި އެވެ.
ރާއްޖޭގައި އުފެދުނު އެންމެ ބާރު ދުވުންތެރިޔާ، ހަސަން ސާއިދުގެ ހިއްސާ އޮންނަ ސާއިދު ސްޕޯޓްސް އިން އަންނަނީ އެތުލެޓިކްސް އަށް ޝައުގުވެރިކަން ހުންނަ ކުދިން ތަމްރީނުކޮށް އެ ކުދިން އަށް ފުރުސަތުތައް ފަހިކޮށްދެމުންނެވެ.
އަންނަ އަހަރަށް ސާއިދު ސްޕޯޓްސްއަށް އަލަށް ގުޅެން ބޭނުންވާ ކުދިން އަށް އެ ފުރުސަތު ހުޅުވާލާފައިވާއިރު, އަންނަ އަހަރު ސާއިދު ސްޕޯޓްސް އިން ތަމްރީނުތައް ކުރިއަށް ގެންދާނީ ހަތް ސެޝަން އަކަށް ބަހާލައިގެންނެވެ. އެއީ، މާލޭގައި ފަސް ސެޝަން އަދި ހުޅުމާލޭގައި ދެ ސެޝަން އެވެ.
އެ ގޮތުން މާލޭގެ ސެޝަންތައް ކުރިއަށްދާނީ އާދީއްތަ, އަންގާރަ އަދި ބުރާސްފަތި ދުވަހެވެ. ހުޅުމާލޭގައި ކުރިއަށްދާ ދެ ސެޝަން ކުރިއަށްދާނީ ހޯމަ, ބުދަ އަދި ބުރާސްފަތި ދުވަހު އެވެ.
ސާއިދު ސްޕޯޓްސް އިން މި ފަހަރު ފުރުސަތު ހުޅުވާލާފައިވާ އުމުރުތަކަކީ 4-6 އަހަރު އުމުރުފުރާ, 7-9 އަހަރު އުމުރުފުރާ އަދި 10 އަހަރުން މަތީގެ އުމުރުފުރާތަކެވެ.
ކ. ގާފަރަށް އުފަން، ރާއްޖޭގެ އެންމެ ކާމިޔާބު އިންޑިވިޖުއަލް އެތުލީޓު، ސާއިދުގެ އިސްނެގުމާ އެކު، އޭނާގެ ބެލުމުގެ ދަށުން، 2017 ވަނަ އަހަރުގެ އޮގަސްޓް އެއް ވަނަ ދުވަހު، ވުޖޫކުރި ކްލަބުން އަންނަނީ ގައުމީ ލެވަލްގައި އެތުލީޓުންނަށް ފުރުސަތު ހޯދައިދޭން ރަނގަޅު މަސައްކަތްތަކެއް ކުރަމުންނެވެ.
އެ ގޮތުން، ސާއިދު ސްޕޯޓްސް އިން ތަމްރީނުވި އެތުލީޓުން ވަނީ ގައުމީ ލެވަލްގައި ރަނގަޅުކުރިއެރުން ހޯދައި، ބައިނަލްއަގުވާމީ ލެވަލްގައި ވެސް ރާއްޖެ ތަމްސީލްކޮށްފަ އެވެ.
ސާއިދު ސްޕޯޓްސްގެ އެންމެ ބޮޑު ކާމިޔާބަކީ، މިދިޔަ އަހަރުގެ ގައުމީ މުބާރާތުގައި ފިރިހެން އެންމެ މޮޅު ޓީމުގެ މަގާމު ހޯދުމެވެ. ވޭތުވެދިޔަ 20 ވަރަކަށް އަހަރަށް ބެލިޔަސް، ދިވެހި ސިފައިންގެ ކްލަބް ފިޔަވައި، ގައުމީ މުބާރާތުގެ އެންމެ މޮޅު ފިިރިހެން ޓީމުގެ މަގާމު ލިބިފައިވަނީ ސާއިދު ސްޕޯޓްސް އަށެވެ.
