އެސްޓީއޯ މަކިޓާ ޖޫނިއާ އެތުލެޓިކްސް ޗެމްޕިއަންޝިޕްގެ އެންމެ މޮޅު ފިރިހެން އެތުލީޓަކަށް އައްޑޫ ހައި ސްކޫލްގެ އަހުމަދު އަބްސަލް މުހައްމަދު ޖަލީލް ހޯދިއިރު، އެންމެ މޮޅު އަންހެން އެތުލީޓަކަށް އައްޑޫ ހައި ސްކޫލްގެ ހައްވާ މުޒުނާ ފާއިޒް ހޮވިއްޖެ އެވެ.
މުބާރާތުގެ 20 އަހަރުން ދަށުގެ މޮޅު އެތުލީޓުގެ މަގާމު ހޯދީ ވެސް މުޒުނާ އާއި އަބްސަލް އެވެ.
މި މަހުގެ 19 އިން އިއްޔެގެ ނިޔަލަށް ފުވައްމުލަކު ސިޓީގައި ކުރިއަށްދިޔަ މަކިޓާ ޖޫނިއާ އެތުލެޓިކްސް ޗެމްޕިއަންޝިޕްގެ މޮޅު ދެ އެތުލީޓުންނަށް އައްޑޫ ހައި ސްކޫލްގެ ދެ އެތުލީޓުން ހޮވުނުއިރު، މުބާރާތުގެ ފިރިހެން ޗެމްޕިއަން ޓީމަކީ، ގދ. ތިނަދޫ އަށް ނިސްބަތްވާ ރައުހަތު ސްޕޯޓްސް އެވެ. އަދި އެންމެ މޮޅު އަންހެން ޓީމަކީ، ޓްރެކް އެންޑް ފީލްޑް އެސޯސިއޭޝަން އެވެ.
ވިހި އަހަރުން ދަށުގެ ޗެމްޕިއަންކަން ލިބުނު އަންހެން އަދި ފިރިހެން ޓީމަކީ އައްޑޫ ހައި ސްކޫލް އެވެ.
މުބާރާތުގެ 15 އަހަރުން ދަށް ފިިރިހެން އެންމެ މޮޅު އެތުލީޓަކީ މުހައްމަދު ޖަމާލުއްދީން ސްކޫލްގެ ހަސަން އަކުމަލް ލުޖަައިން އެވެ. މި އުމުރުފުރާގެ އެންމެ މޮޅު އަންހެން އެތުލީޓަކީ ޝަރީފް ސްޕޯޓްސްގެ އައިމިނަތު އައުހާ އަބްދުއްރަހުމާން އެވެ. ސަތާރަ އަހަރުން ދަށުގެ މޮޅު ފިރިހެން އެތުލީޓަކަށް ކަނޑުހުޅުދޫ ސްކޫލްގެ ޔޫސުން މުހައްމަދު މޫސާ ހޮވުނުއިރު، އެ އުމުރުފުރާގެ އަންހެން މޮޅު އެތުލީޓަކީ، ޝަރަފުއްދީން ސްކޫލްގެ އައިމިނަތު އައިކާ އަހުޔަދު އެވެ.
ތޭރަ އަހަރުން ދަށުގެ ފިރިހެން އަދި އަންހެން ޗެމްޕިއަން ޓީމުގެ މަގާމާއި 15 އަހަރުން ދަށުގެ މޮޅު ފިރިހެން ޓީމަކަށް ހޮވުނީ މުހައްމަދު ޖަމާލުއްދީން ސްކޫލް އެވެ. އަދި 15 އަހަރުން ދަށުގެ މޮޅު އަންހެން ޓީމަކީ، ޝަރީފް ސްޕޯޓްސް އެެވެ.
ސަތާރަ އަހަރުން ދަށުގެ މޮޅު ފިރިހެން ޓީމަކަށް ޓްރެކް އެންޑް ފީލްޑް އެސޯސިއޭޝަން ހޮވުނުއިރު، އެ އުުމުރުފުރާގެ މޮޅު އަންހެން ޓީމަކީ، ޝަރަފުއްދީން ސްކޫލް އެވެ.
މި ފަހަރުގެ ޖޫނިއާ މުބާރާތުގައި، 29 ޓީމަކުން 868 އެތުލީޓުން ވާދަކުރެ އެވެ. ޖޫނިއާ މުބާރާތުގެ ގިނަ ރެކޯޑްތަކެއް ވެސް މުގުރާލައިފައިވެ އެވެ. އެ ގޮތުން ޖޫނިއާ މުބާރާތުގެ 30 ރެކޯޑް ވަނީ އެކި އެތުލީޓުންގެ ހިތްވަރާ އެކު އާ ކޮށްފަ އެވެ.
