ޓަޝްކެންޓް، އުޒްބެކިސްތާން (އޮކްޓޫބަރު 6) - އުޒްބެކިސްތާންގައި ކުރިއަށްދިޔަ ފީފާ ފުޓްސަލް ވޯލްޑް ކަޕްގެ ފައިނަލުގައި އާޖެންޓީނާގެ މައްޗަށް 2-1 ގެ ނަތީޖާ އަކުން ކުރިހޯދާ ބްރެޒިލް އިން ޗެމްޕިއަންކަން ހޯދައިފި އެވެ.
މިއީ، ފުޓްސަލް ވޯލްޑް ކަޕްގެ ތަށި ބްރެޒިލުން ހޯދި ހަ ވަނަ ފަހަރެވެ. ފުޓްސަލް ވޯލްޑް ކަޕްގެ އެންމެ ކާމިޔާބު ޓީމަކީ، ބްރެޒިލް އެވެ. ސްޕެއިނުން ދެ ފަހަރު ހޯދާފައިވާއިރު، އާޖެންޓީނާ އާއި ޕޯޗުގަލް އިން ވަނީ އެއް ފަހަރު ހޯދައިފަ އެވެ.
ގިނަ ކާޑުތަކެއް ފެނިގެންދިޔަ މި މެޗުގެ ހަވަނަ މިނެޓުގައި ބްރެޒިލް އިން ވަނީ ގޯލު ޖަހައި ލީޑު ނަގާފަ އެވެ. މި ގޯލް އެ ޓީމަށް ކާމިޔާބު ކޮށްދިނީ ފެރާރޯ އެވެ. މިއީ މާޗީނޯ މުޅިން ހުސްކޮށްލާފަ ދިން ބޯޅަ އަކުން ފެރާރޯ ކާމިޔާބުކުރި ގޯލެކެވެ.
މި ލަނޑަށް ފަހު ވެސް ބްރެޒިލްގެ އެޓޭކުތައް ފެނިގެންދިޔައީ ވަރުގަދަ ކޮށެވެ. އެ ގޮތުން މެޗުގެ 13 ވަނަ މިނެޓުގައި ބްރެޒިލް އިން ވަނީ އިތުރު ގޯލެއް ޖަހައި ލީޑު ފުޅާ ކޮށްފަ އެވެ. އެންހެލް ކްލާޑިނިއޯ ނަގައިދިން ކޯނަރެއްގެ ބޭނުން ހިފައި މި ގޯލް ބްރެޒިލް އަށް ކާމިޔާބު ކޮށްދިނީ ރަފާ ސަންޓޯސް އެވެ.
މެޗުގައި އާޖެންޓީނާ އިން ކާމިޔާބުކުރި ހަމައެކަނި ގޯލް އެ ޓީމަށް ޖަހާދިނީ މެޗު ނިމެން މިނެޓަކަށް ވެފައި ހުއްޓަ މަތިއަސް ރޯސާ އެވެ.
މީގެ ކުރިން ބްރެޒިލްއާ އާޖެންޓީީނާ ކުރިމަތިލުންތަކަށް ބަލާއިރު, ހަތަރު މެޗުން ބްރެޒިލް ވަނީ ކުރި ހޯދައިފަ އެވެ. އަދި ފަސް މެޗު އެއްވަރުވެގެން ނިމުނުއިރު, އާޖެންޓީނާ ވަނީ އެއް މެޗުން މޮޅުވެފަ އެވެ.
