ބ. އޭދަފުށީގައި މިހާރު ކުރިއަށްދާ ކްލަބް ކޮމްބިނޭޝަން (ސީސީ) އިންޓަ ރިސޯޓް ކްރިކެޓް މުބާރާތުގެ ސެމީ ފައިނަލުގައި އެންމެ ފަހުގެ ޗެމްޕިއަން، ސޮނޭވާފުށްޓާއި އަމިއްލަ މޯލްޑިވްސް ބައްދަލުކުރަން ޖެހުނުއިރު، އަނެއް ސެމީގައި ދުސިތު ތާނީ މޯލްޑިވްސް ކުރިމަތިލާނީ ފިނޮޅު މޯލްޑިވްސްއާ އެވެ.
އިއްޔެ ވަނީ ގްރޫޕް އޭގެ ފަހު މެޗާއި ގްރޫޕް ބީގެ ފަހު މެޗު ކުޅެފަ އެވެ.
އޭދަފުށީ ވެލި ދަނޑުގައި ކުރިއަށްދާ މި މުބާރާތުގައި އިއްޔެ ހަވީރު ފުރަތަމަ މެޗުގައި ބައްދަލުކުރީ، ފުރަތަމަ މެޗުތަކުން ބަލިވެ، ކުރިއަށްދިއުމުގެ ފުރުސަތު ގެއްލިފައިވާ އަނަންތަރާ އާއި މިލައިދޫ އެވެ. މި މެޗު، 67 ލަނޑުން ކާމިޔާބުކުރީ އަނަންތަރާ އެެވެ.
އަށް އޯވަރަށް ކުޅޭ މި މުބާރާތުގައި، މިލައިދޫން ފުރަތަމަ ކުޅެން އަރައި، އަށް އޯވަރުގެ ތެރޭގައި، ހަ ވިކެޓަށް ވަނީ 100 ލަނޑު ހަދައިފަ އެވެ. ޖަވާބުގައި، އަނަންތަރާ އިން ކުޅެން އަރައި އަށް އޯވަރުގެ ތެރޭ އެއް ވިކެޓަށް ވަނީ 167 ލަނޑު ހަދައިފަ އެވެ. މެޗުގެ މޮޅު ކުޅުންތެރިއަކީ، އަނަންތަރާގެ އަބޫ ހުސެއިން އެވެ.
އިއްޔެގެ ދެ ވަނަ މެޗުން ދުސިތު ވަނީ އަވަނި+ފަރެސް މޯލްޑިވްސް އަތުން ބަލިވެފަ އެވެ. މެޗަށް ނުކުތްއިރު ވެސް ދުސިތު އަށް ވަނީ ސެމީގެ ފުރުސަތު ލިބިފަ އެވެ. އަވަނިން މެޗުން މޮޅުވީ، 36 ލަނޑުންނެވެ. އަވަނިން އަށް އޯވަރުގެ ތެރޭގައި، ތިން ކުޅުންތެރިން ނުބައިވިއިރު، 128 ލަނޑު ހެދި އެވެ. ދުސިތުން އަށް އޯވަރު ތެރޭ ހަ ކުޅުންތެރިން ނުބައިވެގެން ހެދުނީ 92 ލަނޑެވެ.
ސެމީ ފައިނަލް މެޗުތައް ކުޅޭނީ މާދަމާ އެވެ. ސޮނޭވާފުށްޓާއި އަމިއްލަ ބައްދަލުކުރާ މެޗު 15:00 ގައި ފަށާއިރު، ދުސިތުން ފިނޮޅާ ދެކޮޅަށް ކުޅޭނީ، 16:30 ގަ އެވެ. ފައިނަލް މެޗު އޮންނާނީ އަންނަ އާދިއްތަ ދުވަހު ހަވީރު އެވެ.
