ލަންޑަން (އޮގަސްޓް 27) - ޒުވާން ފޯވާޑް، މޭސަން ގްރީންވުޑް، އިންގްލެންޑްގެ ގައުމީ ޓީމަށް ކުޅުން ހުއްޓާލައި، ޖެެމެއިކާ އަށް ކުޅެން ފަށަން ކުރަން ޖެހޭ ކަންކަމުގެ މަސައްކަތްތައް ކުރަމުން އަންނަ ކަމަށް އިނގިރޭސި މީޑިއާ ރިޕޯޓްތައް ބުނެފި އެވެ.
ގެވެށި އަނިޔާގެ މައްސަލައެއްގެ ސަބަބުން ޔުނައިޓެޑްގައި ގްރީންވުޑްގެ ކެރިއަރު ކުރިއަށްނުދިޔަ އެވެ. ޖަލުން ސަލާމަތްވުމުން ވެސް ޔުނައިޓެޑުން ގްރީންވުޑަށް ފުރުސަތު ނުދިނެވެ. މިދިޔަ ސީޒަނުގައި ގެޓަފޭ އަށް ގްރީންވުޑް ދޫކޮށްލީ ލޯނަކަށެވެ. އަދި ޔުނައިޓެޑާ އެކު ކެެރިއަރު ކުރިއަށް ނުގެންދެވޭނެތީ، މި ފަހަރުގެ ޓްރާންސްފާ މާކެޓްގައި، ގްރީންވުޑް، 22، ޔުނައިޓެޑް ދޫކޮށް މާސޭ އަށް ސޮއިކުރީ 33 މިލިއަން ޑޮލަރުގެ ޑީލެއްގަ އެެވެ.
މާސޭގައި ކެރިއަރު ރަނގަޅަށް އަލުން ފަށައި، ދެ މެޗުން ތިން ގޯލު ޖަހައިދީފައިވާ، ގްރީންވުޑް އަކީ ޖެމެއިކާ ދަރިކޮޅަށް ނިސްބަތްވާ ކުޅުންތެރިއެކެވެ.
އޭނާ ލައްވައި ޖެމެެއިކާ އަށް ކުޅުވަން އެ ގައުމުގެ ފުޓްބޯޅަ ފެޑެރޭޝަނުން މީގެ ކުރިން ވެސް މަސައްކަތްކުރި އެވެ. އެކަމަކު، އެކަން ހާސިލެއްނުވި އެވެ. މި ފަހަރު ގްރީންވުޑްއާ ޖެމެއިކާ އަށް ކުޅެން މަޝްވަރާ ކުރަމުން އަންނަނީ އެ ޓީމަށް ދާދި ފަހުން ހަމަޖެއްސި ކޯޗު ސްޓީވް މެކްލަރެން އެވެ. އޭނާ އަކީ މިދިޔަ ސީޒަނުގައި، ޔުނައިޓެޑްގެ އެސިސްޓަންޓް ކޯޗެވެ.
ގްރީންވުޑް ވަނީ، އިންގްލެންޑަށް ރަސްމީ އެއް މެޗު ކުޅެފަ އެވެ. އެއީ، 2020 ވަނަ އަހަރު، ނޭޝަންސް ލީގުގައި އައިސްލެންޑާ ދެކޮޅަށެެވެ.
ފީފާ އިން 2020 ވަނަ އަހަރު ގައުމީ ޓީމުގެ ކުޅުންތެރިން އެއް ގައުމުން އަނެއް ގައުމަށް ބަދަލުވުމުގެ އުސޫލަށް ވަނި ލުޔެއް ދީފަ އެވެ. އެ ގޮތުން 21 އަހަރުން މަތީގެ ކުޅުންތެރިއަކު އެއް ގައުމަށް ތިން މެޗަށް ވުރެ އިތުރަށް ނުކުޅެ ހުއްޓައި، އޭނާއާ އާއިލީ ގޮތުން ގުޅުން އޮތް އެހެން ގައުމެއްގެ ގައުމީ ޓީމަށް ކުޅެން ބަދަލުވެވޭނެ އެވެ. އެކަމަކު، އެކަން ފުރިހަމަކުރަން، ކުރިން ކުޅުނު ގައުމީ ޓީމުގެ ފުޓްބޯޅަ އެސޯސިއޭޝަންގެ ލިޔުމެއް ބޭނުންވާނެ އެވެ.
ޖެމެއިކާ ފުޓްބޯޅަ ފެޑެރޭޝަނުން އަންނަނީ އިނގިރޭސި އެފްއޭއާ މަޝްވަރާކޮށް އެ ލިޔުން ހޯދަން މަސައްކަތް ކުރަމުންނެވެ.
ގްރީންވުޑް ވަނީ އިންގްލެންޑްގެ 15 އަހަރުން ދަށާއި 17 އަހަރުން ދަށާއި 18 އަހަރުން ދަށުގެ އިތުރުން 21 އަހަރުން ދަށުގެ ޓީމަށް ވެސް ކުޅެފަ އެވެ.
