ލަންޑަން (އޮގަސްޓް 26) - އިނގިރޭސި ގައުމީ ޓީމަށް ފަސް އަހަރު ކޯޗުކޮށްދިން ސްވިޑެންގެ ކޯޗު ސްވެން ގޯރަން އެރިކްސަން، ކެންސަރު ބަލީގައި މަރުވެއްޖެ އެވެ.
ފުރަމޭގެ ކެންސަރަށް ފަރުވާ ހޯދަމުންދިޔަ، އެރިކްސަން މަރުވިއިރު އުމުރަކީ، 76 އަހަރެވެ.
އިންގްލެންޑަށް، 2001-2006 އަށް ކޯޗުކޮށްދިން އެރިކްސަން އަށް ކެންސަރު ޖެހިފައިވާކަން އެނގުނީ، މީގެ އަހަރެއްހާ ދުވަސް ކުރިންނެެވެ. އިންގްލެންޑް ޓީމުގެ ރަން ޖީލަށް ކޯޗުކޮށްދިނުމުގެ ޝަރަފް ލިބުނު، އެރިކްސަން އަށް އެ ޓީމާ އެކު ތަށްޓެއް ނުލިބުނު ކަމުގައި ވިޔަސް އޭނާ އަކީ އިންގްލެންޑް ގޮވައިގެން، ތިން ކުއާޓާ ފައިނަލުގައި ވާދަކޮށްފަ އެވެ. މިއީ، އިންގްލެންޑަށް އުފަން ނޫން ކޯޗަކަށް އެ ޓީމާ ހަވާލުވެ، ހުރެ ހާސިލްކުރެވުނު އެންމެ ރަނގަޅު ރެކޯޑެވެ.
މި އަހަރު ޖެނުއަރީ މަހު، ސްވިޑެންގެ މީޑިއާ އަކަށް ދިން އިންޓަވިއުއެއްގައި އެރިކްސަން ވަނީ ކެންސަރު ބަލީގައި އުޅުނު ކަމުގައި ވިޔަސް ފަރުވާ ތެރޭގައި ވެސް ލިބޭ އެންމެ ބޮޑު ހިތްހަމަޖެހުމަކީ، ހަޔާތުގައި ވަރަށް ގިނަ އުފާވެރި އަހަރުތަކެއް އުޅެވިފައިވުން ކަމަށެވެ.
އެރިކްސަން ވަނީ 40 އަހަރަށް ވުރެ ގިނަ އަހަރު ކޯޗިންގައި މަސައްކަތްކޮށްފައި.
އެރިކްސަން ވަނީ 12 ކްލަބަށް ކޯޗުކޮށްދިންއިރު، 18 ތަށި ހޯދައިފަ އެވެ. އެރިކްސަން، ކޯޗުކޮށްދިން ކްލަބްތަކުގެ ތެރޭގައި، މެންޗެސްޓާ ސިޓީ، ލާޒިއޯ، ރޯމާ އަދި ލެސްޓާ ސިޓީ ހިމެނެ އެވެ. ގައުމީ ޓީމުތަކަށް ބަލާއިރު، އިންގްލެންޑްގެ އިތުރުން، ފިލިޕީންސް، މެކްސިކޯ އަދި އައިވަރީ ކޯސްޓަށް ކޯޗުކޮށްދީފައިވެ އެވެ.
އުމުރުން 27 އަހަރުގައި ކުޅުމުން ރިޓަޔާކުރި، އެރިކްސަންގެ ކޯޗިން ކެރިއަރު 42 އަހަރަށް ދިގުދެމިގެންދެ އެވެ. ސްވިޑެންގެ ޑެގެފޯސް އާއި ގޮތެންބާގް އަށް ކޯޗުކޮށްދިން އެރިކްސަން ވަނީ އިޓަލީ ލީގުގައި ފިއޮރެންޓީނާ، ލާޒިއޯ، ސަމްޕްޑޯރިއާ އަދި ރޯމާ އަށް ކޯޗުކޮށްދީފަ އެވެ. އިނގިރޭސި ޕްރިމިއާ ލީގުގައި މެންޗެސްޓާ ސިޓީ އާއި ލެސްޓާ ސިޓީ އަށް އިރުޝާދުދިން އެރިކްސަން ވަނީ ޕޯޗުގަލްގެ ބެންފީކާ އަށް ވެސް އިރުޝާދުދީފަ އެވެ.
ކެންސަރު ބަލީގައި ފަރުވާ ހޯދަމުން އައިއިރު، އެރިކްސަން އަށް ހާއްސަ ޗެރިޓީ އިވެންޓްތައް އޭނާގެ ކުރީގެ ކްލަބްތަކުން ބޭއްވި އެވެ. އެ އިވެންޓްތަކަށް އެރިކްސަން ވަނީ ގޮސްފަ އެވެ. ލިވަޕޫލަށް ސަޕޯޓްކުރި އެރިކްސަން އަށް އެ ކްލަބުން ވަނީ، މިދިޔަ މާޗް މަހު ލެޖެންޑުންގެ މެޗެއްގައި ކޯޗުކޮށްދޭން ފުރުސަތު ދޭން ނިންމައިފަ އެވެ.
