ލަންޑަން (އޮގަސްޓް 25) - އިނގިރޭސި ޕްރިމިއާ ލީގުގައި ރޭ މެންޗެސްޓާ ސިޓީ އާއި އާސެނަލް ކުޅުނު މެޗުތަކުން މޮޅުވެ، އެ ދެ ޓީމުގެ ވަރުގަދަ ފެށުން ދަމަހައްޓައިފި އެވެ.
ސިޓީން އަމިއްލަ ދަނޑުގައި ފަހަތުން އަރައި އިޕްސްވިޗް ޓައުން، 4-1 އިން ބަލިކުރިއިރު، އާސެނަލުން ވަނީ ރަށުންބޭރުގައި އެސްޓަން ވިލާ އަތުން 2-0 އިން މޮޅުވެފަ އެވެ.
އެންމެ ފަހުން ހަތަރު ފަހަރު ލީގުގެ ޗެމްޕިއަންކަން ހޯދި ސިޓީ ދަނޑުގައި އިޕްސްވިޗުން ވަނީ ލީޑުނަގައިފަ އެވެ. އެ ގޮތުން ހަތް ވަނަ މިނިޓްގައި އިޕްސްވިޗުގެ ސޭމީ ސްޒްމޯޑިކްސް ވަނީ އެ ޓީމަށް ލީޑުނަގައިދީފަ އެވެ. އެކަމަކު، މާގިނައިރަކު ލީޑު ހިފަހައްޓައިނުލެވުނެވެ. ސިޓީން ވަނީ ދެން ކުޅުނު އަށް މިނިޓް ތެރޭ ތިން ލަނޑު ޖަހައިފަ އެވެ.
ސިޓީން އެއްވަރުކުރީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި ދިން ޕެނަލްޓީ އަކުން ހާލަންޑް ޖެހި ގޯލުންނެވެ. ލީޑުނެގީ އިޕްސްވިޗުގެ ކީޕަރު، އަރިޖަނެޓް މުރިޗް ހެދި ގޯހަކުން، ސިޓީގެ ކެޕްޓަން، ކެވިން ޑި ބްރޭނާ ޖެހި ގޯލުންނެވެ. އަދި ޑި ބްރޭނާ ދިން ބޯޅައަކުން ހާލަންޑް ވަނީ ސިޓީގެ ތިން ވަނަ ލަނޑު ޖަހައިފަ އެވެ.
ހާލަންޑް، ހެޓްރިކް ފުރިހަމަކުރީ މެޗުގެ ފުރިހަމަ ވަގުތު ހަމަވާން ދެ މިނިޓަށް ވެފައި ހުއްޓަ އެވެ. މިދިޔަ ދެ ސީޒަނުގައި، 36 ގޯލާއި 27 ގޯލު ލީގުގައި ޖަހައިގެން، ރަން ބޫޓު ހޯދި ހާލަންޑް މި ސީޒަނުގެ ފުރަތަމަ ދެ މެޗުން މި ވަނީ ހަތަރު ލަނޑު ޖަހައިފަ އެވެ. ސިޓީ އަށް 100 ގޯލު ހަަމަކޮށްދޭން ހާލަންޑް ބޭނުންވަނީ ހަ ލަނޑެވެ. އޭނާ މިހާތަނަށް ސިޓީ އަށް ކުޅެދިނީ 101 މެޗެވެ.
އާސެނަލްގެ ޓްރޮސާޑް ލަނޑު ޖެހުމަށް ފަހު އުފާފާޅުކުރަނީ.
ލީގުގައި ރޭ އާސެނަލުން ރަށުންބޭރުގައި އެސްޓަން ވިލާ އަތުން މޮޅުވިއިރު، އާސެނަލްގެ ކީޕަރު، ޑޭވިޑް ރާޔާ ވަނީ މޮޅު ސޭވްތަކެއް ކޮށްފަ އެވެ. އެ ގޮތުން، ވިލާގެ އޮލީ ވަޓްކިންސް އަށް ލިބުނު ހުސް ފުރުސަތުގައި ރާޔާގެ ހުށިޔާރުކަން ރަނގަޅަށް ފެނިގެންދިޔަ އެވެ.
އާސެނަލް އިން މެޗު ކާމިޔާބުކުރި ލަނޑުތައް ޖެހީ، ދެ ވަނަ ހާފުގަ އެވެ. އެ ޓީމުން ލީޑުނެގީ ލެއަންޑްރޯ ޓްރޮސާޑް ޖެހި ލަނޑުންނެވެ. އަދި މޮޅު ކަށަވަރުކުރީ، ތޯމަސް ޕާޓޭ ކާމިޔާބުކުރި ލަނޑުންނެެވެ.
ލީގުގައި ރޭ ކުޅުނު އެހެން މެޗުތަކުގެ ނަތީޖާ އަށް ބަލާއިރު، މެންޗެސްޓާ ޔުނައިޓެޑް ވަނީ 2-1 އިން ބްރައިޓަން އަތުން ބަލިވެފަ އެވެ. އަމިއްލަ ދަނޑުގައި ޓޮޓެންހަމް ހޮޓްސްޕާސް އިން ވަނީ 4-0 އިން އެވަޓަން ބަލިކޮށްފަ އެެެވެ. ކްރިސްޓަލް ޕެލަސް ދަނޑުގައި 2-0 އިން ވެސްޓް ހޭމް ޔުނައިޓެޑް މޮޅުވިއިރު، ފުލަމް ވަނީ އަމިއްލަ ދަނޑުގައި 2-1 އިން ލެސްޓާ ސިޓީ ބަލިކޮށްފަ އެވެ. އަދި ސައުތެމްޓަން ދަނޑުގައި ނޮޓިންހަމް ފޮރެސްޓް މޮޅުވީ 1-0 އިންނެވެ.
