ލަންޑަން (އޮގަސްޓް 20) - މިދިޔަ ސީޒަނުގައި ލޯން އެއްބަސްވުމެއްގެ ދަށުން ޗެލްސީ އަށް ކުޅުނު ޕޯޗުގީސް އެޓޭކަރު، ޖޮއާއޯ ފެލިކްސް ގަންނަން އެތުލެޓިކޯ މެޑްރިޑާ އެކު އަގަކަށް ޗެލްސީން އެއްބަސްވިއިރު، ޗެލްސީގެ ކޮނާ ގެލަގާ، އެތުލެޓިކޯ އަށް ވިއްކާލުމުގެ ޑީލް ނިންމަން ފުރުސަތު ފަހިވެއްޖެ އެެވެ.
މީގެ 10 ވަރަކަށް ދުވަސް ކުރިން، ގެލަގާ ވަނީ އޭނާގެ އޭޖެންޓާ އެކު، މެޑްރިޑަށް ދަތުރުކޮށްފަ އެވެ. އެއީ، 40 މިލިއަން ޑޮލަރުގެ ޑީލެއްގައި އެތުލެޓިކޯ އަށް ބަދަލުވާށެވެ. ފަސް ދުވަހު، މެޑްރިޑްގައި މަޑުކުރުމަށް ފަހު، ގެލަގާ، އެނބުރި ޗެލްސީ އަށް އަންނަން ޖެހުނީ، އެތުލެޓިކޯ އާއި ޗެލްސީގެ މެދުގައި އެއްބަސްވާން ޖެހޭ ކަންކަން ހަމަނުޖެހި ހުރުމުން ކަމަށް ރިޕޯޓްތައް ބުނެ އެވެ.
ސްޕެއިނުގެ މީޑިއާ ރިޕޯޓްތައް ބުނާގޮތުން، ގެލަގާ، އެތުލެޓިކޯ އަށް ބަދަލުވުމުގެ ކަންކަން ހުއްޓުނީ، ޗެލްސީން އެތުލެޓިކޯގެ ފޯވާޑް ސަމޫ އޮމޮރޮޑިއޯންގެ ގަންނަން ކުރި މަސައްކަތް ނާކާމިޔާބުވުމުންނެވެ. ޗެލްސީ އާއި އެތުލެޓިކޯ އިން ނިންމީ ގެލަގާ އާއި އޮމޮރޮޑިއޯންގެ ޑީލުގެ ލިޔެކިޔުންތައް އެކުއެކީގައި ނިންމަން ކަމުގައިވާއިރު، ފަހު ވަގުތު އޮމޮރޮޑިއޯން ބޭނުންވާ ކަންތައްތަކެއްގެ ޔަގީންކަން ޗެލްސީ އަށް ނުދެވުމުން އެ ޑީލް ހުއްޓުނީ އެވެ. އަދި އޭގެ އަސަރު ގެލަގާގެ ޓްރާންސްފާ އަށް ވެސް ކުރީ އެވެ.
ގެލަގާގެ ޑީލް ނިންމުމަށް އޮތް ފުރުސަތަކީ، ޖޮއާއޯ ފެލިކްސް ޗެލްސީ އަށް ވިއްކާލާ ޑީލްގެ ތެރެއިންނެވެ. ރިޕޯޓްތައް ބުނާގޮތުން، އެތުލެޓިކޯ އާއި ޗެލްސީން ވަނީ 40 މިލިއަން ޑޮލަރާ ގާތްކުރާ އަދަދެއްގެ ފީ އަކަށް ޖޮއާއޯ ފެލިކްސްގެ ޑީލް ކުރިއަށްގެންދަން ނިންމައިފަ އެވެ.
ލޯން އެއްބަސްވުމެއްގެ ދަށުން ޗެލްސީ އަށް މީގެ ކުރިން ކުޅުނު ޖޮއާއޯ ފެލިކްސް، ޗެލްސީއާ އެކު، ހަ އަހަރުގެ އެއްބަސްވުމެއްގައި ސޮއިކުރާނެ ކަމަށް ރިޕޯޓްތައް ބުނެ އެވެ. އަދި ގެލަގާ، އެތުލެޓިކޯއާ އެކު ފަސް އަހަރުގެ ކޮންޓްރެކްޓެއް ހަދަން ވަނީ ތައްޔާރުވެފަ އެވެ.
