މި މަހު ފްރާންސްގެ ޕެރިހުގައި ކުރިއަށްގެންދާ ޕެރަލިމްޕިކްސްގައި ރާއްޖެ ތަމްސީލް ކުރުމުގެ ފުރުސަތު ފާތިމަތު އިބްރާހިމް (ފާތުން) އާއި އަބްދުލްރައްޒާގު އަބްދުއްސަމަދު ހޯދައިފި އެވެ.
އެންމެ ފަހުން، ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގައި ރާއްޖޭގެ ފަރާތުން ބައިވެރިވެ، ރައްޒާގާއި ފާތުން ވަނީ ލޯ މެޑަލް ހޯދައިފަ އެވެ. ލޮލުގެ ފެނުމުން މަހުރޫމުވެފައިވާ، މި ދެ އެތުލީޓުންނަށް، ޕެރިހުގައި ކުރިއަށްދާ ޕެރަލިމްޕިކްސްގެ ފުރުސަތު ލިބުނީ، ރާއްޖޭގެ ރޭންކިން އަށް ބަލާއިރު ކުރީގައި އޮތުމުންނެވެ.
މިއީ، ފާތުންގެ ދެ ވަނަ ޕެރަލިމްޕިކްސް އެވެ. އެ ގޮތުން، މީގެ ކުރިން، ޖަޕާނުގެ ޓޯކިޔޯގައި 2021 ގައި ބޭއްވި ޕެރަލިމްޕިކްސްގައި ފާތުން ވާދަކޮށް، ރާއްޖޭގެ ކުޅިވަރު ތާރީހުގައި، ފުރަތަމަ ފަަހަރަށް ޕެރަލިމްޕިކްސްގައި ވާދަކުރި ޓީމުގައި ހިމެނުމުގެ ޝަރަފް ހޯދި އެވެ.
މީގެ ދެ އަހަރެއްހާ ދުވަސް ކުރިން، އެތުލެޓިކްސްގެ ޓްރެއިނިން ހަދަން ފެށި، ރައްޒާގު ފުރަތަމަ ފަހަރަށް ގޭމްސްއެއްގައި ވާދަކުރީ، މިދިޔަ އަހަރު މަޑަގަސްކަރާގައި ބޭއްވި އައިއޯއައިޖީގަ އެވެ.
އައިއޯއައިޖީގައި ވާދަކޮށް ހޯދި ކާމިޔާބީ އަށް ފަހު، ރައްޒާގާއި ފާތުން ވަނީ މުޖުތަމައު އަށް މުހިންމު މެސެޖެއް ދީފަ އެވެ. އެއީ، އެ ދެ އެތުލީޓުން ފަދަ އިތުރު ހުނަރުހުރި އެތުލީޓުން އެކިއެކި ކުޅިވަރުތަކަށް ނެރެ، ބައިނަލްއަގުވާމީ ލެވަލްގައި ރާއްޖެ ތަމްސީލްކުރުމުގެ ފުރުސަތު ދޭ މިންވަރު އިތުރުކޮށްދިނުމަށެވެ.
ޕެރިހުގައި މި ފަހަރުގެ ޕެރަލިމްޕިކްސް ކުރިއަށްދާނީ އޮގަސްޓް 28 އިން ސެޕްޓެމްބަރު 8 އަށެވެ. ރާއްޖޭގެ ކޮންޓިންޖެންޓް ފުރަން ހަމަޖެހިފައިވަނީ، މި މަހުގެ 20 ވަނަ ދުވަހު ކަމަށް މައުލޫމާތު ލިބިފައިވެ އެވެ.
