ލަންޑަން (އޮގަސްޓް 12) - ވޯލްޑް އެތުލެޓިކްސްގެ ރައީސް ސަބެސްޓިއަން ލޯޑް ކޯ، އިންޓަނޭޝަނަލް އޮލިމްޕިކް ކޮމިޓީ (އައިއޯސީ)ގެ ރައީސްގެ މަގާމަށް ޝައުގުވެރިކަން ފާޅުކުރައްވައިފި އެވެ.
އިންޓަނޭޝަނަލް އޮލިމްޕިކް ކޮމިޓީ (އައިއޯސީ)ގެ ރައީސް ތޯމަސް ބަކް، އަންނަ އަހަރު މަގާމުން ވަކިވާނެ ކަމަށް އިއުލާނުކުރައްވައިފި އެވެ. ޖަރުމަނުގެ ވަކީލު، ބަކް، އަންނަނީ 2013 ވަނަ އަހަރުން ފެށިގެން އައިއޯސީގެ ރައީސްގެ މަގާމު ފުރުއްވަމުންނެވެ. އަންނަ އަހަރު މަގާމުގެ ޒިންމާތައް ދޫކޮށްލައްވާނެކަން އިއުލާނުކުރީ، މިހާރު ކުރިއަށްދާ ޕެރިސް އޮލިމްޕިކްސްގެ ސެޝަނެއްގެ ތެރެއިން، ވާހަކަ ދައްކަވަމުންނެވެ.
ކޯ ވަނީ މިދިޔަ އަހަރު ވޯލްޑް އެތުލެޓިކްސްގެ ރައީސްގެ މަގާމަށް މިދިޔަ އަހަރު ތިން ވަނަ ދައުރަކަށް އިންތިހާބުވެވަޑައިގެންފަ އެވެ.
"އަހަރެން އަބަދުވެސް ބުނަމުން އައީ، މި ފަދަ ފުރުސަތެއް (އައިއޯސީގެ ރައީސަކަށް ވުމަށް) ލިބިއްޖެނަމަ، ވަރަށް ސީރިއަސް ނަޒަރަކުން ވިސްނާނެ ކަަމަށް، މިއީ އެ ވަގުތު ކަމުގައި ދެކެނީ،" ކޯ ވިދާޅުވި އެވެ.
އައިއޯސީގެ އިންތިހާބު އޮންނާނީ އަންނަ އަހަރުގެ މާޗް މަހުގަ އެވެ. އަދި އެ ލީޑަޝިޕް މަގާމުގެ ޒިންމާތަކާ ހަވާލުވާނީ ޖޫން އިން ފެށިގެންނެވެ.
އައިއޯސީގެ ގަވާއިދު ބުނާގޮތުން، އިންތިހާބުގެ ތިން މަސް ކުރިން ލަސްވެގެން ކެންޑިޑެސީ އިއުލާނުކުރެވޭނެ އެވެ. މިހާތަނަށް އެއްވެސް ކެންޑިޑޭޓަކު އަދި ރަސްމީކޮށް ކުރިމަތިލާނެކަން ހާމައެއް ނުކުރެ އެވެ.
ކޯ އަކީ، 2012 ވަނަ އަހަރު ލަންޑަންގައި އޮލިމްޕިކްސް ބޭއްވުމުގެ ބިޑް ފަރުމާކުރުމުގައި އިސްކޮށް ހަރަކާތްތެރިވި ފަރާތެކެވެ. އަދި އެ ފަހަރު އޮލިމްޕިކްސް ފުރިހަމަކޮށް ކުރިއަށްގެންދިއުމުގައި އޭނާ އިސް ރޯލެއް ކުޅެފައިވެ އެވެ.
