ޕެރިސް (އޮގަސްޓް 2) - ޕެރިހުގައި މިހާރު ކުރިއަށްދާ އޮލިމްޕިކްސްގެ ޓެނިސް އިވެންޓްގެ ޑަބަލްސް ކެޓަގަރީގެ ކުއާޓާ ފައިނަލުން، އެންޑީ މަރީ އާއި ޑޭން އެވާންސްގެ ޕެއާ ކެޓުމާ އެކު، މަރީގެ ޕްރޮފެޝަނަލް ޓެނިސް ކެރިއަރު ނިމުމަކަށް އަތުވެއްޖެ އެވެ.
މިއީ، މަރީ، 37، ގެ ފަސް ވަނަ އޮލިމްޕިކްސް އެވެ. މި ފަހަރުގެ ގޭމްސްގައި އޭނާ ސިންގަލްސް އާއި ޑަބަލްސް ކުޅެން ފުރަތަމަ ނިންމި ނަމަވެސް، ފަހުން ހަމައެކަނި ކުޅޭނީ ޑަބަލްސް ކަމަށް ނިންމި އެވެ. މަރީ އާއި އެވާންސްގެ ޕެއާ، ފިރިހެން ޑަބަލްސް ކުއާޓާ ފައިނަލުން ކެޓީ، އެމެރިކާގެ ޓޭލާ ފްރިޓްޒް އާއި ޓޮމީ ޕޯލް އަތުން، 6-2، 6-4 އިން ބަލިވުމުންނެވެ.
"ކޮންމެ ގޮތަކަށް ނިންމާލަން ޖެހުނު ނަމަވެސް، މި ކުޅިވަރަށްޓަކައި އަހަންނަށް ކުރެވުނު ކޮންމެ ކަމަކާ މެދު ފަހުރުވެރިވަން،" ރޭގެ މެޗަށް ފަހު މަރީ ބުންޏެވެ.
ސަޕޯޓަރުންގެ ތަރުހީބާ އެކު، ރޮވިފައި ހުރި މަރީ، އޭގެ ފަހުން ދިން އިންޓަވިއުއެއްގައި ބުނީ މިއީ އޭނާ އަށް ވަރަށް ޖަޒުބާތީ ވަގުތެއް ކަމަށެވެ. އެކަމަކު، ރިޓަޔާކުރަން ނިންމީ އެކަމަށް ވަރަށް ރަނގަޅަށް ތައްޔާރުވެގެން ކަމަށާއި ޓެނިސް ކެރިއަރުގައި ކުރެވުނު ގިނަ ކަންކަމާ މެދު ފަހުރުވެރިވާ ކަމަށެވެ.
އޮލިމްޕިކްސްގައި މަރީ އެންމެ ފުރަތަމަ ވާދަކުރީ 2008 ވަނަ އަހަރު ޗައިނާގެ ބެއިޖިންގައި ބޭއްވިއިރު އެވެ. އެ ފަހަރު ފުރަތަމަ ބުރުން، ޗައިނާގެ ލޫ ޔެން ސުން އަތުން ބަލިވެ ކެޓީ އެވެ. އޭގެ ހަތަރު އަހަރު ފަހުން، ލަންޑަން އޮލިމްޕިކްސްގައި މަރީ ވަނީ އިންގަލްސް އިން ރަން މެޑަލް ހޯދައިފަ އެވެ. އެއީ ފައިނަލުގައި، ރޮޖާ ފެޑެރާ ބަލިކުރުމަށް ފަހު އެވެ. އޭގެ ފަހުން، 2016 ވަނަ އަހަރު ބްރެޒިލްގެ ރިއޯގައި، ފައިނަލުގައި ހުއާން މާޓިން ޑެލް ޕޮޓްރޯ ބަލިކޮށް، މަރީ ވަނީ އޮލިމްޕިކް ރަން މެޑަލް ދިފާއުކޮށް، ޓެނިހުގެ ތާރީހުގައި އެ ކާމިޔާބު ހޯދި ހަމައެކަނި ފިރިހެން ކުޅުންތެރިޔާގެ ޝަރަފް ހޯދައިފަ އެވެ.
"އެންމެ އުފާ ކުރެވޭ ކަމަކީ، ފަހު ހަނދާންތައް ގުޅިފައި މި އޮތީ އެންމެ ކާމިޔާބު މުބާރާތާ އަހަރެންގެ، އޮލިމްޕިކްސް އިން ނިންމާލެވޭތީ އުފާވޭ،" މަރީ ބުންޏެވެ.
އޮލިމްޕިކްސްގައި މަރީގެ އެހެން ކާމިޔާބުތަަކަށް ބަލާއިރު، 2012 ވަނަ އަހަރުގެ އޮލިމްޕިކްސްގެ މިކްސް ޑަބަލްސް އިން ރިހި މެޑަލް ހޯދި އެވެ.
ޓެނިހުގެ އެންމެ ބޮޑު މުބާރާތްތައް ކަމަށްވާ ގްރޭންޑް ސްލޭމް ތިން މުބާރާތް ކާމިޔާބުކުރި މަރޭ، 2019 ވަނަ އަހަރު އުނަގަނޑުގެ އޮޕަރޭޝަނެއް ކުރި ފަހުން، އޭނާ އަށް އަނިޔާގެ ގިނަ މައްސަލަަަތަކެއް އަންނަނީ ކުރިމަރތިވަމުންނެވެ. އެ ގޮތުން، ގިނަ މުބާރާތްތަކަކުން ނަން ނަގަން ޖެހުނެވެ. ރިޓަޔާކުރި އެންމެ ބޮޑު އެއް ސަބަބަކީ ވެސް އަނިޔާގެ މައްސަލަތަކެވެ.
މަރީ ކެރިއަރު ރަަސްމީކޮށް ފެށީ 2005 ވަނަ އަހަރު އެވެ. އޭނާ ވަނީ 1001 ސިންގަލްސް މެޗާއި ގިނަ އަދަދެއްގެ ޑަބަލްސް މެޗުތަކެއް ކުޅެފަ އެވެ. އޭނާ، 46 އޭޓީޕީ މުބާރާތް ކާމިޔާބުކުރިއިިރު، އިނގިރޭސިން 2015 ވަނަ އަހަރު ޑޭވިސް ކަޕް ކާމިޔާބުކުރިއިރު، އިސް ރޯލެއް ކުޅެފައިވެ އެވެ.
