އަންހެން ގައުމީ ވޮލީބޯލް ޓީމުގެ ކެޕްޓަން ހައްވާ ރާޝިދާ (ހައްވަ)، އައިޝަތު މާޖިދާ (މާޖީ) އަދި އައިމިނަތު އަރީޝާ (އަރީ) ކުރިއަށް އޮތް ކާވާ ވިމެންސް ނެޝަނަލް ލީގު (އިންޑޯ މުބާރާތް) އަދި ބޫޓާންގައި ފަށާ ކާވާގެ ބީޗް ވޮލީބޯޅަ މުބާރާތުގައި ކުޅޭނެ ކަމަށް ސީނިއާ އަންހެން ގައުމީ ވޮލީބޯޅަ ޓީމުގެ ކޯޗު ސޮފްވާން އަހުމަދު ބުނެފި އެވެ.
އިންޑޯ ވޮލީބޯޅަ ޓީމު ކުޅޭ ނޭޝަންސް ލީގު ފެށުމަށް ހަމަޖެހިފައި ވަނީ އަންނަ މަހުގެ އެއް ވަނަ ދުވަހު ނޭޕާލުގެ ވެރިރަށް ކަތުމަންޑޫގަ އެވެ. އެ މުބާރާތައް ގައުމީ ސީނިއާ ޓީމު ފުރާނީ މި މަހުގެ 28 ވަނަ ދުވަހު އެވެ. އޭގެ ކުރިން، ބީޗްވޮލީ ޓީމުން ބޫޓާނުގައި ކުރިއަށްދާ ބީޗް ވޮލީބޯޅަ މުބާރާތައް ފުރާނެ އެވެ. އެ މުބާރާތް ނިމޭނީ އަންނަ މަހުގެ އެއް ވަނަ ދުވަހު އެވެ.
ބީޗް މުބާރާތް ނިންމުމަށް ފަހު ސީނިއާ އަންހެން ޓީމުގެ މުހިންމު ތިން ކުޅުންތެރިންކަމަށްވާ ހައްވަ, މާޖިދާ އަދި އަރީޝާ ޓީމާ ގުޅޭނީ ނޭޕާލުން ކަމަށް ގައުމީ ޓީމުގެ ކޯޗުކަމާ ދާދި ފަހުން ހަވާލުވެ، ފުރަތަމަ މުބާރާތަށް ތައްޔާރުވަމުން އަންނަ ސޮފްވާން ވަނީ ބުނެފަ އެވެ.
"އަރީ, މާޖި އަދި ހައްވަ ފުރަތަމަ ކުޅޭނީ ބީޗް މުބާރާތުގައި. އެ މީހުން އެ މުބާރާތައް ކުރީބައިގައި ދަތުރުކުރާނެ. އަދި އިންޑޯ މުބާރާތް ފެށޭ ދުވަހު އިންޑޯ ޓީމާ ޖޮއިން ކުރާނެ. ބޫޓާން އާ ނޭޕާލާ މި އޮންނަނީ ކައިރީގަތާ." ސޮއްޕެ ބުންޏެވެ.
"އަދަދު" އަށް އެނގިފައިވާ ގޮތުން ސީނިއާ އަންހެން ވޮލީ ޓީމުން ނޭޝަންސް ލީގު ކުޅެނީ ތަޖުރިބާ ހޯދުމުގެ ގޮތުންނެވެ. އެއީ، ސެޕްޓެމްބަރު މަހު ރާއްޖޭގައި ކުރިއަށް ދާ ސެންޓްރަލް ޒޯން ވޮލީބޯލް މުބާރާތައް ތައްޔާރުވުމުގެ ގޮތުން ރާއްޖެ އިން ބައިވެރިވި މުބާރާތެކެވެ.
ވީއޭއެމްގެ އޮފިޝަލަކު "އަދަދު" އަށް ބުނީ، ޓްރެއިނިންގް ކޭމްޕެއް ކުރުމަށް ވުރެ މި ކަހަލަ މުބާރާތެއްގައި ބައިވެރިވުން އެއީ ވީއޭއެމުން ދެކޭ ގޮތުގައި ޓީމަށް މާ ފައިދާ ބޮޑު ގޮތެއް ކަމަށެވެ.
ނޭޕާލުގައި އޮތް ކާވާ ވިމެންސް ނޭޝަންސް ލީގުގައި ވާދަކުރާ ޓީމުތަކަކީ، އިންޑިއާ، އީރާން، ނޭޕާލް އަދި ސްރީ ލަންކާ އެވެ. މީގެއިން ކޮންމެ ޓީމަކީ ވެސް، ރޭންކިން އަށް ބަލާއިރު، ރާއްޖެ އަށް ވުރެ ރަނގަޅު ޓީމުތަކެވެ.
