މެޑްރިޑް (ޖުލައި 25) - ސްޕެއިންގެ ރެއާލް މެޑްރިޑްގައި ކާމިޔާބު 23 އަހަރު ހޭދަކުރުމަށްފަހު، ސްޕެއިންގެ ޑިފެންޑަރު ނަޗޯ ފެނާންޑޭޒް އެ ކްލަބަށް އަލްވަދާއު ކިޔައިފި އެވެ.
ނާޗޯގެ ކެޕްޓަންކަމުގެ ދަށުން ރެއާލް ވަނީ މިދިޔަ ސީޒަންގައި ލަ ލީގާ އާއި ޗެމްޕިއަންސް ލީގު ކާމިޔާބުކޮށްފައެވެ. އަދި މި މަހު ނިމުނު ޔޫރޯ މުބާރާތް ކާމިޔާބުކުރި ޓީމުގައިވެސް ނަޗޯ ހިމެނެ އެވެ.
ރެއާލްއާ އެކު ހަދާފައިވާ ކޮންޓުރެކްޓް މިދިޔަ ސީޒަނަށް ފަހު ހަމަވުމާ އެކު، ނަޗޯ ،34، އެ ކްލަބާ ދުރަށް ދާނެކަން އޮތީ އެނގިފަ އެވެ. އަދި ދެން ފެންނާނީ ސައުދީ އަރަބިއްޔާގެ އަލް ގަދްސިއާ އިން ކަމަށް އޭނާ ވަނީ މި މަހު ބުނެފަ އެވެ.
އެހެން ނަމަވެސް، ނަޗޯ އަށް އަލްވަދާއު ކިއުމުގެ ގޮތުން ރެއާލް އިން ވަނީ މިއަދު ހާއްސަ ރަސްމިއްޔާތެއް ބާއްވައިފަ އެވެ. މި ރަސްމިއްޔާތުގައި ރެއާލްގެ ރައީސް ފްލޮރެންޓީނޯ ޕެރޭޒް އާއި ރެއާލްގެ އެހާރާއި މިހާރުގެ ކުޅުންތެރިން ބައިވެރިވިއެވެ.
މި ރަސްމިއްޔާތުގައި އަސަރާ އެކު ވާހަކަދައްކަމުން ނަޗޯ ބުނީ ރެއާލް އިން އޭނާ ވަކިވާނީ، "އަހަންނަށް ކްލަބަށްޓާކައި ކުރެވެން އޮތް ހުރިހާ ކަމެއް ކޮށްދީފައި،" ކަމަށެވެ.
"އަހަރެން މި ކްލަބުން މި ވަކިވަނީ ކެޕްޓަންގެ ގޮތުގައި، އަދި (ރެއާލްގެ) 15 ވަނަ ޗެމްޕިއަންސް ލީގު ތަށި އުފުލާލި ކެޕްޓަންގެ ޝަރަފާއެކު،" ނަޗޯ ބުންޏެވެެ.
"އަހަރެން މި ކްލަބާ މި ދުރަށް ދަނީ އާ ކަމެއް ތަޖުރިބާކުރަން ބޭނުންވާތީ. އަހަންނަށް މޮޅުވުމާއި ބަލިވުމާއި، ދިރިއުޅެން ދަސްކޮށްދިނީ ރެއާލް މެޑްރިޑް އިން."
އުމުރުން 10 އަހަރުގައި ރެއާލްއާ ގުޅުނު ނަޗޯ އެ ކްލަބުން ވަކިވަނީ ޖުމްލަ 26 ތަށި ހޯދުމަށްފަހު އެވެ. ރެއާލްގެ ހުރިހާ ޓީމުތަކަށް ކުޅުނު ނަޗޯ ރެއާލްގެ ސީނިއާ ޓީމަށް އޭނާ ކުޅެން ފެށީ 2012 ވަނަ އަހަރެވެ.
