މި އަހަރުގެ ކްލަބް މޯލްޑިވްސް އިން ބާއްވާ މުބާރާތްތަކުގައި 64 ޓީމު ބައިވެރިވެފައިވާ ކަމަށް ކްލަބް މޯލްޑިވްސް އިން ހާމަކޮށްފި އެވެ.
މި ފަހަރުގެ ކްލަބް މޯލްޑިވްސް އިން ބާއްވާ މުބާރާތައް ފަށާނީ އަންނަ މަހުގެ 31 ވަނަ ދުވަހު އެވެ.
ކްލަބް މޯލްޑިވްސް އިން މިއަދު ހާމަކުރި ގޮތުގައި، މި ފަހަރު ބާއްވަން ނިންމާފައިވާ ތިން މުބާރާތުގައި މިހާތަނަށް ވަނީ 64 ޓިމު ބައިވެރިވެފަ އެވެ.
އަންނަ މަހު، 31 ގައި ކްލަބް މޯލްޑިވްސް ކްލަސިކާއި އެއިޓީންތާޓީ ފުޓްސަލް ފިއެސްޓާ ފަށާއިރު، ކްލަބް މޯލްޑިވްސް ކަޕް ފަށަނީ ސެޕްޓެމްބަރު 19 ގައި ކަމަށް ކްލަބް މޯލްޑިވްސް އިން ވަނީ ބުނެފަ އެވެ.
އެ ގޮތުން، އެންމެ ފުރަތަަމަ އަންނަ މަހު ފަށާ ކްލަބް މޯލްޑިވްސް ކްލަސިކް އާއި އެއިޓީންތާޓީ ފުޓްސަލް ފިއެސްޓާ، ކްލަބް މޯލްޑިވްސް ކަޕްގެ ކުރިން ނިންމާލުމަށް ވަނީ ހަމަޖެހިފަ އެވެ. އަދި ކްލަބް މޯލްޑިވްސް ކަޕްގެ ފައިނަލް ކުޅޭ ގޮތަށް މި ވަގުތު ތާވަލުކޮށްފައި އޮތީ، އޮކްޓޫބަރު 12 ވަނަ ދުވަހު އެވެ.
މިދިޔަ އަހަރު އެއިޓީންތާޓީ ފުޓްސަލް ފިއެސްޓާގެ ވެސް ކްލަސިކް މުބާރާތެއް ބޭއްވި ނަމަވެސް، ކްލަބް މޯލްޑިވްސް އިން މި ފަހަރު ބާއްވާނީ އަންހެން ޑިވިޝަނަށް އެންމެ މުބާރާތެކެވެ.
ކްލަބް މޯލްޑިވްސްގެ މިދިޔަ އަހަރުގެ މުބާރާތްތައް ކާމިޔާބުކުރި ޓީމުތަކަށް ބަލާއިރު، ރޯޑް ރެކްރިއޭޝަން ކްލަބް (އާރްއާރްސީ)ގެ މައްޗަށް 5-3 އިން ކުރިހޯދުމަށް ފަހު ކްލަބް ވެމްކޯ އިން ކްލަބް މޯލްޑިވްސް ކަޕްގެ ޗެމްޕިއަންކަން ހޯދި އެވެ. ކްލަބް މޯލްޑިވްސްގެ އަންހެން ޑިވިޝަން އެއިޓީންތާޓީ މުބާރާތުގެ ފައިނަލުގައި ޕޮލިސް ކްލަބް އަތުން 3-1 އިން މޮޅުވެ، ޗެމްޕިއަންކަން ހޯދީ ޓީމު ފެނަކަ އިންނެވެ.
ކްލަސިކް މުބާރާތްތަކަށް ބަލާއިރު، ކްލަބް މޯލްޑިވްސް ކަޕްގެ ކްލަސިކްގެ ޗެމްޕިއަންކަން، ފައިނަލުގައި ކްލަބް 220ގެ މައްޗަށް 7-2 އިން ކުރިހޯދައިގެން ކާމިޔާބުކުރީ ޓީމު ޑީޖޭއޭ އިންނެވެ. އަދި އެއިޓީންތާޓީ ކްލަސިކް މުބާރާތުގެ ފައިނަލުގައި ޓީމު އެމްއޭސީއެލް 3-0 އިން ބަލިކޮށް ކްލަބް ވެމްކޯ އިން ތަށި އުފުލާލި އެވެ.
ކްލަބް މޯލްޑިވްސް ކަޕަކީ 2006 ވަނަ އަހަރުން ފެށިގެން ގަވާއިދުން ބާއްވަމުން އަންނަ މުބާރާތެވެ. ކޮވިޑް-19ގެ ސަބަބުން އެކި ކަންކަމަށް އައި މެދުކެނޑުމާ ހެދި 2020 ވަނަ އަހަރު ކްލަބް މޯލްޑިވްސް ކަޕް ނުބޭއްވުނެވެ. އެކަމަކު، އަލުން ފަށައި ފާއިތުވި ތިން އަހަރު އެ މުބާރާތް ވަނީ ކާމިޔާބުކަމާ އެކު ބާއްވައިފަ އެވެ.
ކްލަބް މޯލްޑިވްސް އިން ބުނީ، ކުރިއަށް އޮތް މުބާރާތްތައް ވެސް ފޯރިގަދަ ކުުރުމުގެ ގޮތުން ކަންތައްތަކެއް ރޭވިފައިވާ ކަމަށާއި، މުބާރާތް ފެށުމުގެ ގޮތުން ހާއްސަ މެޗެއް ކުޅޭ ގޮތަށް ހަމަޖެހިފައިވާ ކަމަށެވެ.
