މެޑްރިޑް (ޖުލައި 24) - އާމްދަނީއަށް އެއް ބިލިއަން ޔޫރޯ ހޯދައި، ސްޕެއިންގެ ރެއާލް މެޑްރިޑުން އާ ރެކޯޑެއް ހޯދައިފި އެވެ.
ރެއާލް އަކީ އެއް ބިލިއަން ޔޫރޯގެ އާމްދަނީއެއް ހޯދި ފުރަތަމަ ކްލަބެވެ.
ރެއާލް އިން ރޭ ނެރުނު ބަޔާނެއްގައި ބުނީ އެ ކްލަބަށް 2023/2024 ވަނަ މާލީ އަހަރުގައި އާމްދަނީގެ ގޮތުގައި 1.073 ބިލިއަން ޔޫރޯ ލިބިފައިވާ ކަމަށެވެ. ރެއާލް އިން ބުނީ މިއީ ކުޅުންތެރިންގެ ޓްރާންސްފާ ފީތައް ނުލައި އެ ކްލަބަށް ލިބުނު އާމްދަނީ ކަމަށެެވެ.
މިއީ 2022/2023 ވަނަ މާލީ އަހަރާ އަޅާބަލާއިރު، ރެއާލްގެ އާމްދަނީއަށް 27 އިން ސައްތަ ކުރިއެރުމެކެވެ.
ރެއާލް އިން ބުނީ 2023/2024 ވަނަ އަހަރުގެ މާލީ އަހަރުގައި އެ ކްލަބަށް ފައިދާގެ ގޮތުގައި 16 މިލިއަން ޔޫރޯ ލިބިފައިވާ ކަމަށެވެ.
ރެއާލްގެ މާލީ ހިސާބުތަކުން ފެންނަމުންދާ ކުރިއެރުމަކީ ފާއިތުވި ފަސް އަހަރުގައި މާލީ ގޮތުން އެ ކްލަބުން އަޅާފައިވާ ހަރުދަނާ ފިޔަވަޅުތަކުގެ ނަތީޖާއެވެ. ހާއްސަކޮށް ކޮވިޑް-19ގެ ޕެންޑަމިކްގެ ތެރޭގައިވެސް ކްލަބު މާލީ ކަންތައްތައް ބައްޓަންކުރުމުގައި އެ ކްލަބުން ކުރި މަސައްކަތްތަކާއި ގުޅިގެން، ޔޫރަޕްގެ އެހެން ކްލަބުތަކަށްވުރެ އެ ކްލަބު އަދިވެސް އޮތީ މާލީ ގޮތުން ރަނގަޅު ހާލާތެއްގައެވެ. ކޮވިޑް ތެރޭގައިވެސް އެ ކްލަބުން ފައިދާ ނެރުނެވެ.
ރެއާލްގެ އާމްދަނީ އިތުރުވުމުގެ އެންމެ ބޮޑު އެއް ސަބަބަކީ އެ ކްލަބުގެ ސްޓޭޑިއަމްކަމަށްވާ ސެންޓިއާގޯ ބާރްނަބެއޫ ސްޓޭޑިއަމް އިތުރަށް ތަރައްްޤީކުރުމެވެ. މި ޕްރޮޖެކްޓަށް ރެއާލް އިން 300 މިލިއަން ޔޫރޯ ހަރަދުކުރިއެވެ. ރެއާލްގެ ސްޓޭޑިއަމްގައި މިހާރު ކޮންސެޓްތަކާއި އިވެންޓްތައް ބޭއްވުމުގެ ސަބަބުން އެ ކްލަބުގެ އާމްދަނީ ވަނީ އިތުރުވެފައެވެ. ސްޓޭޑިއަމްގެ މަސައްކަތްތައް ފުރިހަމަ ވާނީ 2024/2025 ވަނަ އަހަރެވެ. ސްޓޭޑިއަމް އެއްކޮށް ނިމުމުން، އިތުރު ވިޔަފާރީތަކުން ރެއާލްގެ އާމްދަނީއަށް ކުރިއެރުން ލިބޭނެއެވެ.
