ސްވިމިން އެސޯސިއޭޝަން އޮފް މޯލްޑިވްސްގެ ޖެނެރަލް ސެކްރެޓަރީގެ މަގާމަށް އިތުރު ދައުރަކަށް މުހައްމަދު ޝާރިފް އައްޔަންކުރަން އެސޯސިއޭޝަންގެ އެންމެ ފަހުގެ ހިންގާ ކޮމިޓީން ފާސްކޮށްފި އެވެ.
ކުރީގެ ގައުމީ ފެތުންތެރިޔާ، ޝާރިފް އަންނަނީ، 2013 ވަނަ އަހަރުން ފެށިގެން ސްވިމިން އެސޯސިއޭޝަންގެ ސެކްރެޓަރީ ޖެނެރަލްގެ ޒިންމާ އުފުއްލަވައި، ދުވަހުން ދުވަހަށް އެސޯސިއޭޝަން ހިންގުމުގެ ޒިންމާ އިސްކޮށް އަދާކުރައްވަމުންނެވެ.
މިދިޔަ މަހުގެ އެއް ވަނަ ދުވަހު، ސްވިމިން އެސޯސިއޭޝަންގެ ރައީސަކަށް މުހައްމަދު އަބްދުއްސައްތާރު (ޗަމްޕީ) ހަތަރު ވަނަ ދައުރަކަށް އިންތިހާބުވިއިރު، އަލަށް އިންތިހާބުވި، ހިންގާ ބޯޑުގެ ހަތަރު އަަހަރުގެ ދައުރު ފެށޭނީ މި މަސް ތެރޭގަ އެވެ.
ސްވިމިން އެސޯސިއޭޝަނުން މިއަދު މީޑިއާ އަށް ފޮނުވި މެސެޖެއްގައި ބުނެފައިވަނީ، ސްވިމިން އެސޯސިއޭޝަންގެ ޖެނެރަލް ސެކެޓްރީގެ މަގާމުގައި ޝާރިފް ކުރިއަށް އޮތް 4 އަހަރުގެ ދައުރުގައި ބަހައްޓަން އެސޯސިއޭޝަންގެ އައު ހިންގާ ކޮމިޓީން މިއަދު ވަނީ ނިންމާފައިވާ ކަމަށެވެ. އަދި ޝާރިފް ޖެނެރަލް ސެކްރެޓަރީގެ މަގާމަށް އައްޔަނުކުރަން ނިންމީ ހިންގާ ކޮމިޓީގެ އިއްތިފާގުން ކަމަށާއި މި ޖަލްސާގެ ރިޔާސަތު ބެލެހެއްޓެވި އެސޯސިއޭޝަންގެ ރައީސް ސައްތާރު ކަމަށެވެ.
މާސްޓާސް އިން އޮލިމްޕިކް ސްޓަޑީސް، އޮލިމްޕިކް އެޑިއުކޭޝަން އެންޑް މެނޭޖްމަންޓް އޮފް އޮލިމްޕިކް އިވެންޓްސް ހާސިލްކުރައްވާފައިވާ ޝާރިފް އަކީ، އޭޝިއާ އެކުއަޓިކްސްގެ ސޮލިޑާރިޓީ އެންޑް ޑިވެލޮޕްމަންޓް ކޮމިޓީގެ މިހާރު ހިނގަމުން އަންނަ ދައުރުގެ ވައިސް ޗެއާމަން އެވެ. އަދި އޭނާ އަކީ 2019 ވަނަ އަހަރުން ފެށިގެން، މޯލްޑިވްސް ޕެރަލިމްޕިކް ކޮމިޓީގެ ސްޓިއަރިން ކޮމިޓީގެ މެމްބަރެކެވެ.
ވޯލްޑް އެކުއަަޓިކްސްގެ އޯޕަން ވޯޓާ ސްވިމިން އޮފިޝަލެއްގެ ގޮތުގައި މަސައްކަތްކުރަމުން އަންނަ، ޝާރިފް ވަނީ މި އަހަރު މިސްރުގައި ކުރިއަށްދިޔަ އޯޕަން ވޯޓާ ސްވިމިން ވޯލްޑް ކަޕްގެ ޓެކްނިކަލް އޮފިޝަލެއްގެ ގޮތުގައި މަސައްކަތް ކުރައްވައިފަ އެވެ.
ގައުމީ ޔޫތު އެވޯޑް 2016 ވަނަ އަހަރު ހާސިލްކުރި، ޝާރިފް ވަނީ މިދިޔަ އަހަރުގެ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އާއި އޭޝިއަން ގޭމްސްގައި ޓީމް މޯލްޑިވްސް ކޮންޓިންޖެންޓްގެ ކޯޑިނޭޓަރެއްގެ ގޮތުގައި ވެސް މަސައްކަތް ކުރައްވައިފަ އެވެ.
ގައުމީ ކުޅިވަރު އެސޯސިއޭޝަންތަކުގެ ތެރެއިން، ޖެހިޖެހިގެން އެންމެ ގިނަ އަހަރުތަކެއް ވަންދެން، ސެކްރެޓަރީ ޖެނެރަލްގެ ޒިންމާ އުފުލާފައިވަނީ، ދާދި ފަހުން އޮލިމްޕިކް ކޮމިޓީގެ ނައިބު ރައީސަކަށް އިންތިހާބުވި، އެތުލެޓިކްސް އެސޯސިއޭޝަންގެ ޖެނެރަލް ސެކްރެޓަރީ، އަހުމަދު މުންތަގިމް (މުންތޭ) އެވެ. މުންތަގިމް އަންނަނީ ފަސް ވަނަ ދައުރަކަށް އެތުލެޓިކްސް އެސޯސިއޭޝަންގެ ސެކްރެޓަރީ ޖެނެރަލްގެ މަގާމު ފުރުއްވަމުންނެވެ.
