ތަކުރާރުކޮށް ފަސް ކުރަން ޖެހިފައިވާ ސައުތު އޭޝިއަން ގޭމްސް އަންނަ އަހަރުގެ ފެބްރުއަރީ މަހު ބާއްވަން ޕާކިސްތާން އޮލިމްޕިކް ކޮމިޓީން އެދިފައިވާ ގޮތަށް ކުރިއަށް ދިއުމަށް، ސައުތު އޭޝިއާގެ އޮލިމްޕިކް ކައުންސިލް (އެސްއޭއޯސީ) އިން އެއްބަސްވެފައިވާ ކަމަށް މީޑިއާ ރިޕޯޓްތައް ބުނެފި އެވެ.
ދި ނިއުސް އިން ރިޕޯޓްކުރާ ގޮތުގައި، ޕާކިސްތާން އޮލިމްޕިކް ކޮމިޓީން ނިންމާފައިވަނީ ފެބްރުއަރީ އެކެއް ނޫނީ ދެ ވަނަ ދުވަހު މުބާރާތް ފެށުމަށެވެ.
ޕާކިސްތާނުގައި މިދިޔަ އަހަރު ބާއްވަން ނިންމާފައި އޮތް ސައުތު އޭޝިއަން ގޭމްސް މި އަހަރަށް ފަސްކުރަން ނިންމީ، 2022 ވަނަ އަހަރު ބޭއްވި ސައުތު އޭޝިއަން އޮލިމްޕިކް ކައުންސިލް (އެސްއޭއޯސީ)ގެ ބައްދަލުވުމެއްގަ އެވެ.
ސާދަ ވަނަ ސައުތު އޭޝިއަން ގޭމްސް، ޕާކިސްތާންގައި ބާއްވަން ކުރާ މަސައްކަތުގައި އެއްބަސްނުވެވި އޮތް އެންމެ ބޮޑު ކަމަކީ، ގޭމްސްގެ މުބާރާތްތައް ކުޅޭނެ، ވެނިއުސްތަކެއް ކަނޑައަޅުމާއި ސަރުކާރާ ގުޅިގެން، ފަންޑް ހޯދައި، ގޭމްސްގެ މައިގަނޑު ހަބްތަކެއްގެ ގޮތުގައި ކަނޑައަޅާނެ ސިޓީތަކެއް ނިންމުމުގަ އެވެ. އެކަމަށް އެއްބަސްވުންތަކަކާ ހަމައަށް އާދެވުނީ މި އަހަރު ކުރީކޮޅުގަ އެވެ. އެ ގޮތުން، ގޭމްސްް ކުރިއަށްދާނެ މައިގަނޑު ދެ ސިޓީ އަކީ، އިސްލާމްއާބާދާއި ލާހޯރް އެވެ. ލާހޯރްގައި 18 އިވެންޓެއް ކުރިއަށްދާއިރު، އިސްލާމްއާބާދާއި ރާވަލްޕިންޑީގައި ނުވަ އިވެންޓެއް ބާއްވާނެ އެވެ. އަދި ހޭންޑްބޯލް އިވެންޓް ރާވާފައި އޮތީ، ފައިސަލްއާބާދުގައި ކުރިއަށްދާ ގޮތަށެވެ.
"ފެބްރުއަރީ ކުރީކޮޅުގައި ގޭމްސް ބާއްވަން ގައުމުތަކުގެ ރުހުން ލިބިފައި ވަނީ، މިހާރު ފުރުސަތު ބޮޑީ، ފެބްރުއަރީ 1 ނޫނީ 2 އިން ފެށިގެން 12 ވަނަ ދުވަހުގެ ނިޔަލަށް ގޭމްސް ކުރިއަށް ގެންދިއުން. އެކަމަކު، ތާރީހުތައް ސީދާ ފައިނަލް ވެގެންދާނީ، ޕާކިސްތާން ސަރުކާރާ މަޝްވަރާ ކުުރުމަށް ފަހު،" ޕާކިސްތާން އޮލިމްޕިކް ކޮމިޓީގެ އޮފިޝަލަކާ ހަވާލާދީ ރިޕޯޓްކޮށްފައިވެ އެވެ.
ގޭމްސް ހޯސްޓްކުރަން، ތިން މިލިއަން ޑޮލަރުގެ ބަޖެޓެއް ޕާކިސްތާން އޮލިމްޕިކް ކޮމީޓީން އެ ގައުމުގެ ސަރުކާރަށް ހުށަހެޅި ނަމަވެސް، ސަރުކާރުން ވިސްނާފައި އޮތީީ، 2.5 މިލިއަން ޑޮލަރުގެ ބަޖެޓެއް ދޭ ގޮތަށެެވެ.
މީގެ ކުރިން، ޕާކިސްތާނުގައި ސައުތު އޭޝިއަން ގޭމްސް ބޭއްވީ 1989 ވަނަ އަހަރާއި 2004 ވަނަ އަހަރު އެވެ. އެންމެ ފަހުން ސައުތު އޭޝިއަން ގޭމްސް ބޭއްވީ 2019 ވަނަ އަހަރު ޑިސެމްބަރު މަހު ނޭޕާލުގެ ކަތުމަންޑޫ އާއި ޕޮކާރާގަ އެވެ. އޭގެ ކުރިން ބޭއްވީ 2016 ވަނަ އަހަރު، ފެބްރުއަރީ މަހު، އިންޑިއާގެ ޝިލޯން އާއި ގުވަހާޓީގަ އެވެ. އެ ދެ ފަަހަރު ވެސް ގޭމްސް ބޭއްވުނީ އެކި ފަހަރު މަތިން ޝެޑިއުލްކޮށްގެންނެވެ. އެންމެ ފަހުން ދެ ފަހަރު ވެސް ސައުތު އޭޝިއަން ގޭމްސް ބޭއްވުނީ ކަނޑައެޅި މުއްދަތަށް ވުރެ ފަހުންނެވެ.
