ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ބާއްވާ ވީއޭއެމް ކަޕްގެ ފައިނަލްގެ ފަހު ޖާގަ ޕޮލިސް ކުލަބުން ހޯދައިފި އެވެ.
ޕޮލިހުން މި މުބާރާތުގެ ފައިނަލުން ޖާގަ ހޯދީ ރޭ ކުޅުނު ސެމީ ފައިނަލް ދެ ވަނަ މެޗުގައި އެސޯސިއޭޝަން ފޯ ދަރަނބޫދޫ ޑިވެލޮޕްމަންޓްގެ މައްޗަށް ސީދާ ތިން ސެޓުން ކުރިހޯދައިގެންނެވެ.
މުޅި މެޗުގައި ވެސް ޕޮލިހުގެ ފަރާތުން ތަފާތު މޮޅު ކުޅުމެއް ފެނިގެންދިޔަ މި މެޗުގެ ފުރަތަމަ ސެޓުގައި ޕޮލިސް ކުލަބްގެ ޝަހާ ޝާމިން އާއި ހައްވާ ރާޝިދާ (ހައްވަ) ގެ ފަރާތުން މޮޅު އެޓޭކުތަކެއް ފެނިގެންދިޔަ އެވެ. އެއާ އެކު މި ސެޓު ޕޮލިހުން ކާމިޔާބުކުރީ 25-11 އިންނެވެ.
މި މެޗުގެ ދެ ވަނަ ސެޓު ފަށައިގެން ދަރަނބޫދޫ ޑިވެލޮޕްމަންޓްގެ ކުޅުން ރަނގަޅުކޮށް ސެޓުގެ ކުރީކޮޅުގައި ތިން ޕޮއިންޓްގެ ލީޑަކާ އެކު ކުޅުނެވެ. އެކަމަކު, ސެޓުގެ ފުރަތަމަ ދިހަ ޕޮއިންޓް ދަރަނބޫދޫ ޑިވެލޮޕްމަންޓް އިން ހޯދިނަމަވެސް, ޕޮލިހުން ކުޅުން ރަނގަޅު ކޮށް ފުލުފުލުގައި ޕޮއިންޓް ހޯދާ 25-14 އިން ސެޓު ކާމިޔާބުކުރީ އެވެ.
ފަހު ސެޓުގައި ދަރަނބޫދޫ ޑިވެލޮޕްމަންޓްގެ ފަރާތުން ފެނިގެންދިޔައީ އާދައިގެ ކުޅުމެކެވެ. އަމިއްލަ ގިނަ ގޯސްތަކެއް އެ ޓީމުގެ ފަރާތުން ފެނިގެންދިޔަ މި ސެޓު ޕޮލިހުން ވަނީ ފަސޭހަކަމާ އެކު 25-08 އިން ކާމިޔާބު ކޮށްފަ އެވެ.
މި މޮޅާއެކު, މިރޭ ކުޅޭ މުބާރާތުގެ ފައިނަލުގައި ޕޮލިހުން ނުކުންނާނީ އެންމެ ފަހުގެ ޗެމްޕިއަން ވެމްކޯ އާ ދެކޮޅަށެވެ. އަދި ތިން ވަނަ ހޮވާ މެޗުގައި މާދަމާ ހަވީރު ދަރަނބޫދޫ ޑިވެލޮޕްމަންޓް ނުކުންނާނީ ސެމީ ފައިނަލް ފުރަތަމަ މެޗުގައި ވެމްކޯ އަތުން ބަލިވި، ވޮލީބޯލް ޔޫތު ނިއު ޖެނެރޭޝަންއާ ދެކޮޅަށެވެ.
ވެމްކޯ އިން މި މުބާރާތް ކާމިޔާބުކުރި ތިން ފަހަރު ވެސް ފައިނަލުގައި މޮޅުވީ ޕޮލިސް އަތުންނެވެ. އެހެންކަމުން، މިރޭގެ ފައިނަަލަކީ ޕޮލިހަށް އެކަން ބަދަލުކުރަން ލިބޭ ފުރުސަތެކެވެ.
