މިހާރު ކުރިއަށްދާ ވީއޭއެމް އެސޯސިއޭޝަން ކަޕްގެ އަންހެން ޑިވިޝަންގެ ސެމީ ފައިނަލުގައި ޔޫތު ނިއު ޖެނެރޭޝަންގެ މައްޗަށް 3-1 ސެޓުން ކުރިހޯދައި، ކްލަބް ވެމްކޯ އިން ފައިނަލުގެ ފުރަތަމަ ޖާގަ ކަށަވަރުކޮށްފި އެވެ.
ޒުވާނުންގެ މަރުކަޒު އެތެރޭ ކޯޓުގައި މިއަދު ހަވީރު ކުޅުނު މެޗު ވެމްކޯ އިން ކާމިޔާބުކުރީ ފަހަތުން އަރާ 3-1 ސެޓުންނެވެ. މި މެޗުގެ ސެޓުތައް ދިޔައީ, 23-25, 25-23, 25-17 އަދި 25-17 އިންނެވެ.
މި މެޗުގެ ފުރަތަމަ ސެޓު ވެމްކޯ އިން ރަނގަޅަށް ފަށާ ފަސް ޕޮއިންޓްގެ ލީޑެއް ނެގި އެވެ. އެކަމަކު، މަޑުމަޑުން މެޗުގެ ތެރެއަށް ވަދެ ޔޫތު ނިއުޖެނެރޭޝަނުން ވަނީ އެ ޓީމު ކޮޅަށް ނަތީޖާ އަނބުރާލައިފަ އެވެ. އަދި ސެޓުގެ މެދު ތެރެއިން ޔޫތު ނިއު ޖެނެރޭޝަނުން ވަނީ ހަ ޕޮއިންޓްގެ ލީޑެއް ނަގައިފަ އެވެ. މި ސެޓުގެ ފަހު ކޮޅު ވެމްކޯ އިން ޓައިމް-އައުޓްގެ ބޭނުންހިފައި ނަތީޖާ އަނބުރާލެވޭތޯ ބެލި ނަމަވެސް މި ސެޓު ޔޫތު ނިއު ޖެނެރޭޝަނުން ވަނީ 25-23 އިން ކާމިޔާބު ކޮށްފަ އެވެ.
ވެމްކޯ ޓީމުގެ އަރީޝާ ބޯޅަ ފޮނުވާލަނީ.-- ފޮޓޯ: އަތޫފް އާތިފް / އަދަދު
ދެ ވަނަ ސެޓު ވެސް ވެމްކޯ އިން ފެށީ ރަނގަޅަށެވެ. މި ސެޓުގައި ވެމްކޯ އަށް މާ ބޮޑު ލީޑެއްގައި އޮވެގެން ކުޅެވޭ ގޮތް ނުވި އެވެ. އެކަމަކު، އެ ޓީމުން ވަނީ ސެޓު ފަށައިގެން ވެސް ދެ ޕޮއިންޓްގެ ލީޑަކާ އެކު ކުޅެފަ އެވެ. މި ސެޓު ވެމްކޯ އިން ކާމިޔާބުކުރީ 25-23 އިންނެވެ.
ޖެހިގެން އައި ދެ ސެޓުގައި ވެސް ވެމްކޯ ޓީމުގެ ފަރާތުން ފެނިގެންދިޔައީ އެ ޓީމުގެ ތަޖުރިބާކާރު ކުޅުންތެރިންގެ ތަފާތު މޮޅު ކުޅުމެވެ. އެ ގޮތުން، ވެމްކޯގެ ސެޓަރު ޖޫޒާން ޒަރީރް, އައިޝަތު މާޖިދާ (މާޖި) އަދި އައިމިނަތު އަރީޝާގެ މޮޅު ކުޅުން މި ދެ ސެޓުގައި ތަފާތުކޮށް ފެނިގެންދިޔަ އެވެ. އެއާ އެކު ވެމްކޯ އިން މި ދެ ސެޓު ކާމިޔާބުކުރީ 25-17 އިންނެވެ.
ވެމްކޯއާ އެކު ފައިނަލުގައި ކުޅޭނެ ޓީމެއް އެނގޭނީ މިރޭ ކުޅޭ ދެ ވަނަ ސެމީގެ މެޗަށް ފަހުގަ އެވެ. ދެ ވަނަ ސެމީގައި ޕޮލިސް ކުލަބުން ނުކުންނާނީ އެސޯސިއޭޝަން ފޯ ދަރަނބޫދޫ ޑިވެލޮޕްމަންޓްއާ ދެކޮޅަށެވެ.
