ޑޯޓްމަންޑް (ޖުލައި 12) - އެމެރިކާގެ ގައުމީ ފުޓްބޯޅަ ޓީމުގެ ކޯޗުކަމާ ހަވާލުވާން ދާދި ފަހުން ލިވަޕޫލްގެ ކޯޗުގެ ވަޒީފާ ދޫކޮށްލި ޖަރުމަނުގެ ކޯޗު ޔާގަން ކްލޮޕަށް ލިބުނު ފުރުސަތު ދޫކޮށްލައިފި އެވެ.
ލިވަޕޫލްގެ ކޯޗުކަމާ 2015 ވަނަ އަހަރު ހަވާލުވެ، ކްލޮޕް ވަނީ ޔޫރަޕްގެ ގަދަ ޓީމަކަށް އެ ޓީމުން އަލުން ހަދައިފަ އެވެ. އެ ޓީމަށް 491 މެޗުގައި އިރުޝާދުދިން، ކްލޮޕް މިދިޔަ ސީޒަނަށް ފަހު، އެ ޓީމު ދޫކޮށްލީ ކޯޗިންގައި ކުރިއަށްދާން "ހަކަތަ" ނެތް ކަމަށް ބުނެ، ބްރޭކެއް ނެގުން މުހިންމު ކަމަށް ފެންނާތީ އެވެ.
ކްލޮޕް އަށް ޖަރުމަނުގެ ގައުމީ ކޯޗުކަން ވެސް ހުށަހެޅި އެވެ. އެއީ، މި ފަހަރުގެ ޔޫރޯ ފަހު ހަވާލުވާ ގޮތަށެވެ. އެކަމަކު، އެ އަށް ކްލޮޕް ނޫނެކޭ ބުނުމުން، ޔޫރޯގެ ކުރިން ޖަރުމަނުން ވަނީ އެ ޓީމުގެ ކޯޗަކަށް ހުރި ހޫލިއަން ނާގަލްސްމަންގެ ކޮންޓްރެކްޓް އާ ކޮށްފަ އެވެ.
އެމެރިކާ އިން މި ފަހަރުގެ ކޮޕަ އެމެރިކާ ފުޓްބޯޅަ މުބާރާތުގައި ނެރުނު ދަށް ނަތީޖާތަކަށް ފަހު، އެ ޓީމުގެ ކޯޗުގެ މަގާމުން ގްރެގް ބާހޯލްޓާ ވަނީ ވަކިކޮށްފަ އެވެ. އެ އަށް ފަހު، އެމެރިކާ އިން އާ ކޯޗެއް ހޯދުމުގެ މަސައްކަތް ފެށީ 2026 ވަނަ އަހަރު އެ ގައުމު ހިމެނޭ ގޮތަށް ހޯސްޓްކުރާ ފީފާ ވޯލްޑް ކަޕަށެވެ. އެ ގޮތުން، އެމެރިކާ އިން ފުރަތަމަ ވެސް ޓާގެޓް ކުރީ ކްލޮޕް އަށެވެ.
އެކަމަކު، އިނގިރޭސި އަދި ޖަރުމަނުގެ މީޑިއާތަކުން ރިޕޯޓްކޮށްފައިވާ ގޮތުގައި، ކްލޮޕް ވަނީ މަޝްވަރާއެއް ވެސް ކުރުމެއް ނެތި އެމެެރިކާ އިން ހުށަހެޅި ޕްރޮޕޯސަލް މި ވަގުތަށް ދޫކޮށްލައިފަ އެވެ.
ކުރިން މައިންޒާއި ޑޯޓްމަންޑަށް ކޯޗުކޮށްދިން ކްލޮޕް ދިން އިންޓަވިއުއެއްގައި ވަނީ، ދެން ކޯޗިންގައި އިތުރަށް ނުފެނުމުގެ ފުރުސަތު ވެސް އެބައޮތް ކަމަށް ބުނެފަ އެވެ.
