ޑޯޓްމަންޑް (ޖުލައި 11) ބަދަލު ކުޅުންތެރިއެއްގެ ގޮތުގައި ނުކުތް އޮލީ ވަޓްކިންސް އިތުރު ވަގުތުގައި ޖެހި ގޯލާ އެކު، ފަހަތުން އަރައި، 2-1 އިން ނެދަލެންޑްސް ބަލިކޮށް އިންގްލެންޑުން ޔޫރޯ ފުޓްބޯޅަ މުބާރާތުގެ ފައިނަލުން ޖާގަ ހޯދައިފި އެވެ.
އެންމެ ފަހުން، ޔޫރޯގެ ފައިނަލުގައި އިޓަލީ އަތުން ޕެނަލްޓީ ޖަހައިގެން ބަލިވި އިންގްލެންޑުން މި ފަހަރުގެ ފައިނަލުގައި އަންނަ އާދިއްތަ ދުވަހުގެރޭ ކުޅޭނީ ސްޕެއިނާ ދެކޮޅަށެެވެ.
މިއީ ގައުމުން ބޭރުގައި ކުޅޭ ބައިނަލްއަގުވާމީ މުބާރާތެއްގެ ފައިނަލުން އިންގްލެންޑް ޖާގަ ހޯދި ފުރަތަމަ ފަހަރެވެ. އަނެއްކޮޅުން، މިއީ އިންގްލެންޑްގެ ފުޓްބޯޅަ ތާރީހުގައި އެ ޓީމުން ބައިނަލްއަގުވާމީ މުބާރާތެއްގެ ފައިނަލުގައި ޖެހިޖެހިގެން ކުޅޭ ދެ ވަނަ ފަހަރެވެ.
މީގެ އިތުރުން، 1988 ވަނަ އަހަރުގެ ޔޫރޯގެ ޗެމްޕިއަން، ނެދަލެންޑްސް މި ވަނީ ޖެހިޖެހިގެން ހަތަރު ސެމީ ފައިނަލުގައި ބަލިވެފަ އެވެ. އެއީ، 1992، 2000 އަދި 2004 ވަނަ އަހަރަށް ފަހު، މި ފަހަރުގެ މުބާރާތުގަ އެވެ.
ނެދަލެންޑްސްގެ ޒަވީ ސިމޯންސް ގޯލަށް ބޯޅަ ފޮނުވާލަނީ.---- ފޮޓޯ: އޭއެފްޕީ
ޖަރުމަނުގެ މަޝްހޫރު ސިގްނަލް އިޑޫނާ ޕާކުގައި މިރޭ ކުޅުނު މެޗު ފަށައިގެން ހަތް ވަނަ މިނިޓްގައި ނެދަލެންޑްސް އިން ލީޑުނެގި އެވެ. މިއީ، އޭރިއާބޭރުން ޒަވީ ސިމޯންސް ޖެހި މޮޅު ގޯލެކެވެ. އެ ގޮތުން، ސިމޯންސް ޖެހި ޝޮޓް ގޯލުގެ މަތީ ކަނަށް އަމާޒުވީ އިންގްލެންޑްގެ ކީޕަރު، ޖޯޑަން ޕިކްފޯޑް އަތްމަތިންނެވެ.
ލީޑުނެގި ނަމަވެސް، ނެދަލެންޑްސް އަށް މާ ގިނައިރު ހިފަހައްޓައިނުލެވުނެވެ. އެ ގޮތުން، މެޗުގެ 18 ވަނަ މިނިޓްގައި އިންގްލެންޑްގެ ހެރީ ކޭން ވަނީ ޕެނަލްޓީ އެއް ކާމިޔާބުކޮށް ނަތީޖާ ހަމަހަމަކޮށްދީފަ އެވެ.
މިއީ، އިންގްލެންޑްގެ ކޭން އަށް ނެދަލެންޑްސްގެ ޑެންޒެލް ޑަމްފްރީސް ކުރި ފައުލަކަށް ވީޑިއޯ އެސިސްޓަންޓް ރެފްރީ (ވީއޭއާރް) އިން އަންގައިގެން، ދަނޑުގައި ބަހައްޓާފައި ހުރި މޮނީޓަރުން ބެލުމަށް ފަހު، ރެފްރީ، ފީލިކްސް ޒްވޯޔާ ދިން ޕެނަލްޓީ އެކެވެ.
އިންގްލެންޑްގެ ކޭން ލަނޑު ޖެހުމަށް ފަހު އުފާާފާޅުކުރަނީ.--
ފުރަތަމަ ހާފުގައި ނަތީޖާ އަނބުރާލަން، އިންގްލެންޑުން ރަނގަޅު ދެ ހަމަލާއެއް ފޮނުވާލި އެވެ. މި ދެ އެޓޭކް ވެސް ކުރި އިނގިރޭސި މިޑްފީލްޑަރު، ފިލް ފޯޑެން އެވެ. އޭރިއާބޭރުން ފޯޑެން ޖެހި ބޯޅަ ގޯލުގެ ދަނޑީގައި ޖެހިފައި ބޭރުވިއިރު، އޭރިއާތެރެއިން ފޯޑެން ޖެހި ބޯޅަ ހުއްޓުވީ ގޯލު ރޮނގުމައްޗަށް ރަނގަޅު ވަގުތުގައި ދިޔަ ޑަމްފްރީސް އެވެ.
މި މެޗުގައި ނެދަލެންޑްސްގެ އެޓޭކުގައި މައްސަަލަ ދިމާވި އެއް ކަމަކީ، އަނިޔާގެ ސަބަބުން އެ ޓީމުގެ މެމްފިސް ޑިޕާއި ބަދަލުކުރަން ޖެހުމެވެ.
ނެދަލެންޑްސް އަށް އަލުން ލީޑުނަަގައިދިނުމާ ގާތަށް ޖެހިލީ ވެސް ޑަމްފްރީސް އެވެ. ކޯނަރަކުން ހުރަސްވި ބޯޅައެއް ޑަމްފްރީސް ބޮލުން ފޮނުވާލި ނަމަވެސް، ބޭރުވީ ހުރަސްދަނޑީގައި ޖެހިފަ އެވެ.
ދެ ވަނަ ހާފުގައި ނެދަލެންޑްސް އަށް ލީޑުނަަގައިދޭން ވާޖިލް ވެން ޑައިކް ޖެހި ބޯޅައެއް އިންގްލެންޑްގެ ކީޕަރު ޕިކްފޯޑް ވަނީ މަތަކޮށްފަ އެވެ.
ނެދަލެންޑްސް މޮޅުވީ ބަަދަލަކަށް ކުޅެން އެރި ދެ ކުޅުންތެރިންގެ ކޮމްބިނޭޝަނުން ފެނުނު ގޯލަކުންނެވެ. އެ ގޮތުން، އިތުރު ވަގުތުގެ ފުރަތަމަ މިނިޓްގައި، އިންގްލެންޑްގެ ކޯލް ޕާމާ ދިން ބޯޅައެއް ކޮންޓްރޯލް ކޮށްލުމަށް ފަހު ވަޓްކިންސް ވަނީ ގޯލުގެ ދުރު ކަނަށް ބޯޅަ ފޮނުވާލައިފަ އެވެ.
