ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން ކުރިއަށް ގެންދާ ވީއޭއެމް ކަޕްގެ އަންހެން ޑިވިޝަން މުބާރާތުގެ މެދުތެރެއިން ގަވައިދަށް ބަދަލެއް ގެނެސްފި އެވެ.
މި ފަހަރުގެ މުބާރާތް ފެށީވެސް ގަވައިދަށް ބޮޑު ބަދަލެއް ގެނައުމަށް ފަހު ގަ އެވެ. މި އަހަރުގެ މުބާރާތުގެ ގަވާއިދަށް ގެނައި ބަދަލުތަކުގެ ތެރެއިން އެންމެ ފާހަގަ ކޮށްލެވޭ ބަދަލަކީ އިންޑިއާގައި ކުޅެމުން އަންނަ ޕްރައިމް ވޮލީބޯލް ލީގާ އެއްގޮތައް މި މުބާރާތުގެ ގަވައިދު ބައްޓަން ކުރުމެވެ. އެއީ، ޕަވާ ޕޮއިންޓް ރެލީ ސިސްޓަމް އަށެވެ.
އެކަމަކު, ވީއޭއެމް މިއަދު ވަނީ އިންޓާނަލް މެމޯ އެއް ނެރެ, މި މުބާރާތުގެ ސެމީ ފައިނަލުން ފެށިގެން މެޗުތައް ކުޅެމުން އަންނަ ގަވައިދަށް އިތުރު ބަދަލެއް ގެނަސްފަ އެވެ. އެއީ 25 ޕޮއިންޓަށް ކުޅުމަށެވެ.
މި މެމޯގައި ވަނީ 25 ޕޮއިންޓަށް މެޗުތައް ކުޅުނު ނަމަވެސް, "ސުޕަ ޕޮއިންޓް" ނެގޭނެ ކަމަށް ބުނެފަ އެވެ. މިހާރު ގަވައިދަށް ގެނަސްފައިވާ ބަދަލާއެކު, ސުޕަ ޕޮއިންޓް ނެގޭނީ 21 ޕޮއިންޓާ ހަމައަށެވެ. އަދި ފަސް ވަނަ ސެޓުގައި ސުޕ ޕޮއިންޓް ނެގޭނީ 11 ޕޮއިންޓާ ހަމައަށެވެ.
މުބާރާތުގެ ތެރެއިން ގަވައިދަށް ބަދަލުގެނައީ ކީއްވެ ކަމެއް ވީއޭއެމުން ހާމައެއް ނުކުރެ އެވެ. އެކަމަކު, މިހާރު ކުޅެމުން އަންނަ ގަވައިދަށް ވޮލީގެ ގިނަ ބަޔަކު އަންނަނީ ފާޑު ކިޔަމުންނެވެ.
އެ ގޮތުން ނަން ނުޖެހުމަށް ޝަރުތުކޮށް "އަދަދު" އާ ވާހަކަ ދެއްކި ކުޅުންތެރިއަކު ބުނީ މި ފޯމެޓުން ރާއްޖޭގެ ވޮލީ އަށް ލިބޭނެ ކުރިއެރުމެއް ނެތް ކަމަށެވެ. އަދި މިއީ ކުދި މުބާރާތްތައް ނޫނީ އަވަސް އަރުވާލައިގެން ބާއްވާ މުބާރާތްތަކަށް ކަމުދާ ފޯމެޓެއް ކަމަށެވެ.
ވީއޭއެމް ކަޕްގެ ފުރަަތަމަ މެޗަށް، އަލްމާ ސްޕޯޓްސް ކްލަބް ހާޒިރެއްނުވެ އެވެ. އެހެންވެ، އެ މެޗު ފޯފެއިޓްކުރުމަށް ފަހު، އިދިކޮޅަށް އޮތް، އެންމެ ފަހުން ތިން ފަހަރުގެ ޗެމްޕިއަން ވެމްކޯ އަށް ވަނީ މެޗު ލިބިފަ އެވެ. މެޗު ހާޒިރުނުވި، އަލްމާ ސްޕޯޓްސް ކްލަބާ މެދު ފިޔަވަޅެއް އަޅާ ކަމަށް ވީއޭއެމް އިން ހާމައެއް ނުކުރެ އެެވެ.
