މިއުނިކް (ޖުލައި 9) - ޔޫރޯ ފުޓްބޯޅަ މުބާރާތުގެ ސެމީ ފައިނަލްގައި މިރޭ ސްޕެއިން އާއި ފްރާންސް ކުރިމަތިލާއިރު، ފްރާންސްގެ ކެޕްޓަން ކިލިއަން އެމްބާޕޭ މުޅިން ފިޓުނުވިޔަސް، އޭނާގެ ނުރައްކާ ބޮޑުވާނެ ކަމަށް ސްޕެއިންގެ ކޯޗު ލުއިސް ޑެ ލަ ފުއެންޓޭ ބުނެފި އެވެ.
މި އަހަރުގެ ޔޫރޯގައި ކުޅުނު ފުރަތަމަ މެޗުގައި އެމްބާޕޭގެ ނޭފަތަށް ލިބުނު އަނިޔާއަކާ ގުޅިގެން އޭނާ ކުޅެމުންދަނީ މާސްކެއް އަޅައިގެނެވެ.
މި މުބާރާތުގައި އެމްބާޕޭ ޖެހީ އެންމެ ލަނޑެކެވެ. އެއީ ގުރޫޕް ސްޓޭޖުގައި ޕޮލެންޑާ ދެކޮޅަށް ކުޅުނު މެޗުގައި ލިބުނު ޕެނަލްޓީއަކުންނެވެ.
އެކަމަކު، އެމްބާޕޭ މުޅިން ފިޓުނުވިޔަސް، އޭނާއަށް ދުލެއް ނުދޭނެ ކަމަށް ސްޕެއިންގެ ކޯޗު ޑެލަ ފުއެންޓޭ ވަނީ ބުނެފައެވެ.
"އެމްބާޕޭ 50 ޕަސެންޓްގައި ކުޅުމާއި އެހެން ކުޅުންތެރިން 100 ޕަސެންޓްގައި ކުޅުމާ އެއްވަރުވާނެ،" ޑެލަ ފުއެންޓޭ ބުންޏެވެ. "އަހަރަމެން އެމްބާޕޭއަށް ސަމާލުވާނަން. ގޮތްނެނގޭ ކުޅުންތެރިއެއް އެމްބާޕޭއަކީ."
ސްޕެއިން އަކީ މި އަހަރުގެ ޔޫރޯގައި ސައްތަައިން ސައްތަ ރެކޯޑަކާ އެކު އޮތް ހަމައެކަނި ޓީމެވެ. އަދި މުބާރާތުގެ ކުއާޓާ ފައިނަލްގައި ސްޕެއިން ވަނީ މުބާރާތުގެ ހޯސްޓް ޖަރުމަން ކަޓުވާލައިފަ އެވެ.
ޑެ ލަ ފުއެންޓޭ ބުނީ ސްޕެއިންގެ ޓީމުގެ ފެންވަރާ މެދު އިތުބާރު އެބައޮތް ކަމަށާއި، ފައިނަލަށް ދެވޭނެ ކަމުގެ ޔަގީންކަން އެބައޮތް ކަމަށެވެ. އަދި މެޗުން ބަލިވިޔަސް، ސްޕެއިން އަކީ އެންމެ މޮޅު ޓީމުކަމަށް އޭނާ ގަބޫލްކުރާނެ ކަމަށެވެ.
"އަހަރެންގެ ނަޒަރުގައި ސްޕެއިންއަކީ އެންމެ މޮޅު ޓީމު. އިދިކޮޅަށް މި އޮތީވެސް ހަމަ އަހަރަމެންނާ އެއް ފެންވަރެއްގެ ޓީމެއް،" ޑެލަ ފުއެންޓޭ ބުންޏެވެ.
މި މެޗަށް ނުކުންނައިރު ސްޕެއިންގެ ދެ ޑިފެންޑަރުން ކަމަށްވާ ޑެނީ ކާވަހާލް އާއި ރޮބިން ލެ ނޯމަންޑް ވަނީ ދެ ރީނދޫ ކާޑާ އެކު ސަސްޕެންޑްވެފަ އެވެ.
