ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ބާއްވާ އެސޯސިއޭޝަން ކަޕްގެ އަންހެން ޑިވިޝަނުގެ މެޗުތައް އިއްޔެ ފެށިއިރު, މި މުބާރާތުގެ ކުޅުމުގެ ގަވާއިދަށް ބޮޑު ބަދަލުތަކެއް ވަނީ ގެނަސްފަ އެވެ.
މި އަހަރުގެ މުބާރާތުގެ ގަވާއިދަށް ގެނައި ބަދަލުތަކުގެ ތެރެއިން އެންމެ ފާހަގަ ކޮށްލެވޭ ބަދަލަކީ އިންޑިއާގައި ކުޅެމުން އަންނަ ޕްރައިމް ވޮލީބޯލް ލީގާ އެއްގޮތައް މި މުބާރާތުގެ ގަވައިދު ބައްޓަން ކުރުމެވެ.
އެއީ، ޕަވާ ޕޮއިންޓް ރެލީ ސިސްޓަމް އަށެވެ.
އެހެންވެ, މިހާރު އޮތް ގޮތުން މެޗުތައް ކުޅޭނީ 18 ޕޮއިންޓްގެ ފަސް ސެޓަށެވެ. އަދި ސީދާ ތިން ސެޓުން މޮޅުވާ ޓީމަކަށް ތިން ޕޮއިންޓް ލިބޭއިރު, އެ ނޫން ގޮތަކަށް މޮޅުވާ ޓީމަކަށް ލިބޭނީ ދެ ޕޮއިންޓެވެ. އަދި ޕޮއިންޓްގެ ގޮތުން ޓޭބަލް އެއްވަރުވެއްޖެ ހާލަތުގައި ބަލާނީ އެންމެ ގިނަ ސެޓު ގެންގޮސްފައިވާ ޓީމަށެވެ.
މިދިޔަ މަހު 12 ވަނަ ދުވަހު ގެޒެޓްކޮށްފައިވާ މުބާރާތުގެ ގަވާއިދުގައިވާ ގޮތުން، ފަސް ވަނަ މާއްދާގައި ބުނެފައިވަނީ، މުބާރާތް ޕަވާޕޮއިންޓް ރެލީ ސިސްޓަމަށް ކަމަށެވެ.
ޕަވާޕޮއިންޓް ރެލީ އަކީ އެ ރެލީ ކާމިޔާބުކުރާ ޓީމަކަށް ދެ ޕޮއިންޓް ލިބޭ ރެލީއެކެވެ.
މީގެ އިތުރުން މުބާރާތުގެ ގަވާއިދުގައި ހިމެނޭ ހިމެނޭ ފަސް ބައެއް:
1. ހުރިހާ ސެޓެއް ކުޅޭނީ 18 ޕޮއިންޓަށް، ސެޓް ނިމޭނީ ދެ ޕޮއިންޓްގެ ތަފާތުން.
2. ޕަވާޕޮއިންޓް ރެލީ އަށް ދެވޭނީ، އެ ޓީމަކަށް 15 ޕޮއިންޓް ލިބުމުގެ ކުރިން.
3. ޕަވާޕޮއިންޓް ރެލީ އަށް ރިކުއެސްޓްކުރަންޖެހޭނީ ޓީމެއްގެ ހެޑް ކޯޗު.
4. ޕަވާޕޮއިންޓް ރެލީ އަށް ރިކުއެސްޓްކުރަންވާނީ ސާވިސް އަށް އޮތޮރައިޒް ކުރުމުގެ ކުރިއަށް އެކަމަށް ކަނޑައަޅާފައިވާ އާލާތަކުން.
5. ޕަވާޕޮއިންޓް ރެލީ އަށް ސެޓެއްގައި ޓީމަކަށް ދެވޭނީ އެއް ފަހަރު.
ސުޕަ ޕޮއިންޓް އާއި ސުޕަ ސާވް
ސުޕަ ޕޮއިންޓަކީ ކޮންމެ ޓީމަކަށްވެސް އެ ޓީމެއްގެ ޕޮއިންޓް ޑަބަލް ކުރުމަށް ލިބޭ ފުރުސަތެކެވެ. މި ފުރުސަތުގެ ބޭނުން ހިފަން ޖެހޭނީ އާންމުކޮށް، 11 ޕޮއިންޓް ޓީމުން ހޯދުމުގެ ކުރިންނެވެ. އެެހެން ނަމަވެސް، ރާއްޖޭގައި ގަވާއިދު އޮތީ 15 ޕޮއިންޓްގެ ކުރިން ނެގޭ ގޮތަށެވެ.
ސުޕަ ޕޮއިންޓް ނަގާފައި އެ ރެލީ އެ ޓީމަކަށް ކާމިޔާބު ނުވެއްޖެ ނަމަ ދެ ޕޮއިންޓް އިދިކޮޅު ޓީމަށް ލިބޭނެ އެވެ. ސުޕަ ސާވް ނަގާއިރު އިދިކޮޅު ޓީމެއްގެ ކުޅުންތެރިއެއްގެ އަތުގައި ނުޖެހި ކޯޓުގެ ތެރެއަށް ބޯޅަ ވައްޓާލާފި ނަމަ ދެ ޕޮއިންޓް ސުޕަ ސާވް ނަގާ ޓީމަށް ލިބޭނެ އެވެ.
މި ފޯމެޓަކީ އިންޑިއާގެ ވޮލީ ލީގުތަކުގައި ބޭނުން ކުރަމުން އަންނަ ފޯމެޓެކެވެ. އެކަމަކު، މިއީ އިންޓަނޭޝަނަލް މުބާރާތްތަކުގައި ބޭނުން ކުރާ ފޯމެޓެއް ނޫނެވެ. ބައިނަލްއަގްވާމީ މުބާރާތްތަކުގައި ކުޅޭނީ ކުރިންވެސް ރާއްޖޭގައި ކުޅެމުން އައި ފޯމެޓަށެވެ. އެއީ 25 ޕޮއިންޓުން ސެޓު ލިބޭ ފޯމެޓެވެ.
މި ފޯމެޓާއެކު ވޮލީބޯޅަ ގިނަ ކުޅުންތެރިން ވަނީ ފޯމެޓަށް ފާޑުކިޔައިފަ އެވެ. އެ ގޮތުން ނަން ނުޖެހުމަށް ޝަރުތުކޮށް "އަދަދު" އާ ވާހަކަ ދެއްކި ކުޅުންތެރިއަކު ބުނީ މި ފޯމެޓުން ރާއްޖޭގެ ވޮލީ އަށް ލިބޭނެ ކުރިއެރުމެއް ނެތް ކަމަށެވެ. އަދި މިއީ ކުދި މުބާރާތްތައް ނޫނީ އަވަސް އަރުވާލައިގެން ބާއްވާ މުބާރާތްތަކަށް ކަމުދާ ފޯމެޓެއް ކަމަށެވެ.
"އަސްލު މި ފޯމެޓުން ލިބޭނެ އެއްވެސް ފައިދާ އެއް އަހަރެމެން އަކަށް ނެތް. މީތި މި ކުޅެނީ 18 ޕޮއިންޓަށް ދެން މި ފޯމެޓުގައި ކުޅެ ކުޅެފަ އަހަރެމެން މިދާން ޖެހެނީ އިންޓަނޭޝަނަލް މުބާރާތްތައް ކުޅެން. އޭރަށް މި ކުޅެން ޖެހެނީ ހަމަ ކުރީގެ ފޯމެޓަށް" އެ ކުޅުންތެރިޔާ ބުންޏެވެ.
