މި ފަހަރުގެ ޔޫރޯ ފުޓްބޯޅަ މުބާރާތުގެ ކުއާޓާ ފައިނަލުގައި ސްވިޒަލެންޑް އަތުން ޕެނަލްޓީ ޖަހައިގެން އިންގްލެންޑް މޮޅުވި މެޗުގައި، އިންގްލެންޑްގެ ކީޕަރު ޖޯޑަން ޕިކްފޯޑްގެ ފެންފުޅީގައި ސްވިޒަލެންޑް ކުޅުންތެރިން ޕެނަލްޓީ ޖަހާގޮތުގެ ރިސާޗެއް ލިޔެފައިވާ ލިޔުމެއް ހިމަނާފައިވާއިރު، އެ އަށް ގިނަ ބަޔެއްގެ ސަމާލުކަން ވަނީ ހުއްޓިފަ އެވެ.
އެންމެ ފަހުން ބޭއްވި، ޔޫރޯގެ ފައިނަލުން ޕެނަލްޓީ ޖަހައިގެން ބަލިވި އިންގްލެންޑުން މި ފަހަރުގެ ޔޫރޯގެ ސެމީ އަށް ޕެނަލްޓީގައި ދަތުރުކުރީ، ސްވިޒަލެންޑާ ދެކޮޅަށް ކުޅުނު މެޗުގެ ފުރިހަމަ ވަގުތާއި އިތުރު ވަގުތުގެ ދެ ހާފު ނިމުނުއިރު، 1-1 އިން އެއްވަރުވެގެންނެވެ.
އެ މެޗުގައި، އިންގްލެންޑުން ވަނީ ޕެނަލްޓީގައި ފޮނުވާލި ފަސް ޕެނަލްޓީ ވެސް ވައްދާލައިފަ އެވެ. ސްވިޒަލެންޑުން ފަސް ޕެނަލްޓީ ޖެހިއިރު، ނާކާމިޔާބުވި ޕެނަލްޓީ އަކީ އެ ޓީމުގެ މެނުއަލް އަކަންޖީ ފޮނުވާލި ޕެނަލްޓީ، ކީޕަރު ޕިކްފޯޑް މަތަކުރުމުންނެެވެ.
އަކަންޖީ ބޯޅަ ފޮނުވާލާނެ ކަން ޕިކްފޯޑްގެ ފެންފުޅީގައި ލިޔެފައިވާއިރު، މިއީ މެޗަށް ރަނގަޅަށް ތައްޔާރުވުމުގެ ނަތީޖާގެ ސަބަބުން އިންގްލެންޑަށް ލިބުނު މޮޅެއް ކަމަށް ތަޖުރިބާކާރުން ބުނެ އެވެ.
ސްވިޒަލެންޑް މެޗުގެ ތެރެއިން ޕިކްފޯޑްގެ ފުޅީގައި ލިޔެފައިވާ ޕެނަލްޓީ ރިސާޗް.
މަތަނުކުރެވުނު ހަތަރު ޕެނަލްޓީގެ ތެރެއިން ދެ ޕެނަލްޓީގައި ވެސް ޕިކްފޯޑް ހަރަކާތްކޮށްފައިވަނީ ރަނގަޅު ކަނަށެވެ. އެކަމަކު، ނަސީބު އެހީނުވުމާ ވެސް އެކުގައި ޕިކްފޯޑަށް އިތުރު ޕެނަލްޓީއެއް މަަތަނުކުރެވުނެވެ. އެހެން ނަމަވެސް، ނޮކައުޓް ބުރަށް ޕިކްފޯޑާއި އިންގްލެންޑް ޓީމުގެ ގޯލްކީޕަރުންގެ ޑިޕާޓްމަންޓުން ތައްޔާރުވާ މިންވަރަށް އެ ގައުމުގެ ފުޓްބޯޅަ ތަޖުރިބާކާރުން އަންނަނީ ތައުރީފުކުރަމުންނެވެ.
އެ ގޮތުން، ދުރާލާ އިދިކޮޅަށް ނުކުންނަ ޓީމުގެ މައުލޫމާތުތައް ހޯދައި، އެ ކުޅުންތެރިން ކުރިން ޕެނަލްޓީ ޖަހާފައިވާ ގޮތް ބަލައި، އެ ކުޅުންތެރިންނާ އެކުގައި ކްލަބް ލެވަލްގައި ކުޅޭ އިނގިރޭސި ކުޅުންތެރިން ގާތުން ކަންކަން އޮޅުންފިލުވައި، ލިޔުމަކާ ހަމައަށް ގެނެ އެވެ.
އިނގިރޭސި ގޯލްކީޕަރުންގެ ޑިޕާޓްމަންޓުން އިދިކޮޅު ޓީމުގެ ޕެނަލްޓީ ޖަހާނެ ކުޅުންތެރިންގެ ހަރަކާތްތައް ވެސް ދިރާސާކުރެ އެވެ. ބޮޑީ ފެއިންޓަކަށް ފަހު ޕެނަލްޓީ ޖަހާ ކުޅުންތެރިންނާއި ވަކި ފަރާތަކަށް ހަރަކާތްކުރާ ކުޅުންތެރިންނާ މި ކަމުގެ އެކި ތަފްސީލްތައް ހޯދައި ބަލަ އެވެ.
ސްވިޒަލެންޑް މެޗަށް ފަހު، ޕިކްފޯޑް ބުނީ، ކޮންމެ ޕެނަލްޓީއެއްގެ ކުރިން ބޯޅައިގައި އަތްލުމަކީ އޭނާ ކުރަމުން އައި ކަމެއް ކަމަށެވެ. އެކަމަކު، ގަވާއިދު ބަދަލުވެފައި އޮތުމުން، މި ފަހަރު، ރެފްރީ އެ ފުރުސަތު ނުދިން ކަމަށް ޕިކްފޯޑް ވަނީ ބުނެފަ އެވެ.
އިންގްލެންޑްގެ އެއް ވަނަ ކީޕަރުކަން ޕިކްފޯޑަށް ދިން ފަހުން، އެ ޓީމުން އަންނަނީ ޕެނަލްޓީތަކުގައި ރަނގަޅު ކުރިއެރުންތަކެއް ހޯދަމުންނެވެ.
