މި ހުކުރު ދުވަހު ފުޓްބޯޅައިން ރިޓަޔާކުރަން ކްރޫސް ނުވިސްނާ

މިއުނިކް (ޖުލައި 4) - މި ފަހަރުގެ ޔޫރޯ ފުޓްބޯޅަ މުބާރާތަށް ފަހު، ފުޓްބޯޅަ އިން ރިޓަޔާކުރަން ނިންމާފައިވާކަން އިއުލާނުކޮށްފައިވާ ޖަރުމަނުގެ މިޑްފީލްޑަރު، ޓޯނީ ކްރޫސްގެ ކެރިއަރުގެ ފަހު މެޗަކީ ހުކުރު ދުވަހު ސްޕެއިނާ ދެކޮޅަށް ކުޅޭ ޔޫރޯގެ ކުއާޓާ ފައިނަލް ކަމަށްވާނެ ކަމާ މެދު ނުވިސްނާ ކަމަށް އޭނާ ބުނެފި އެވެ.

ކްރޫސް، 34، މީގެ މަހެއް ކުރިން ވަނީ ފުޓްބޯޅަ އިން އޭނާގެ ރިޓަޔާމަންޓް އިއުލާނުކޮށްފަ އެވެ. އެއީ މި ފަހަރުގެ ޔޫރޯ އަށް ފަހު އެވެ.

ކްލަބް ކެރިއަރުގައި އޭނާ ފަހު މެޗު ކުޅުނީ، ޗެމްޕިއަންސް ލީގުގެ ފައިނަލުގައި ރެއާލް މެޑްރިޑަށް ތަަށި ހޯދައިދީގެންނެވެ. ކްރޫސްއާ އެކު، ރެއާލަށް ކުޅުނު ސްޕެއިންގެ ފޯވާޑް، ހޮސޭލޫ ވަނީ، ޔޫރޯ ކުއާޓާ ފައިނަލުން ކްރޫސް ރިޓަޔާކުރާނެ ކަމަށް ބުނެފަ އެވެ. އެއީ، ސްޕެއިނުން ޖަރުމަނު ބަލިކޮށްފިނަމަ އެވެ.

އެކަމަކު، ކްރޫސް ބުނީ، އޭނާ އެ ގޮތަށް ނުދެކޭ ކަމަށެެވެ.

"ފުޓްބޯޅައިގެ ކަންކަން އަބަދުވެސް ހަނދާން ހުންނާނެ. އަހަރެން ގަބޫލުކުރަން ވެސް ހީކުރަން ވެސް ބޭނުމެއް ނޫން، ހުކުރު ދުވަހު މި އޮތް މެޗަކީ (ސްޕެއިން މެޗަކީ) އަހަރެންގެ ކެރިއަރުގެ ފަހު މެޗަށް ވާނެ ކަމަށް،" ކްރޫސް ބުންޏެވެ.

ޖަރުމަނު ފުޓްބޯޅަ ޓީމުން މީގެ ކުރިން ރިޓަޔާކުރި، ކްރޫސް އަލުން އެނބުރި ޓީމަަށް އައީ މި އަހަރު އެވެ. އެއީ މި އަހަރުގެ ޔޫރޯއާ ދިމާކޮށެވެ. ކްރޫސްގެ ކާމިޔާބު ފުޓްބޯޅަ ކެރިއަރުގައި ނުލިބި އޮތް ބޮޑު ތަށްޓަކީ، ޔޫރޯ އެވެ. އެހެންކަމުން، މި ފަހަރުގެ ޔޫރޯ ކާމިޔާބުކުރަން އެންމެ ބޮޑަށް ބޭނުންވެފައި ހުރި އެއް ކުޅުންތެރިއަކީ ކްރޫސް އެވެ.

"އަހަރެމެންނަށް މި ހިސާބަށް ނާދެވޭނެ ކަމަށް ދެކުނު މީހުން ވެސް އެބަތިބި. އެކަމަކު، މިއީ ފުޓްބޯޅަ އުންމީދާ އެކު މަސައްކަތް ކުރާނަމަ ކުރިއަށް ދެވޭނެ. އަހަރެން ދެކެނީ އެހެން،" ކްރޫސް ބުންޏެވެ.

ކްރޫސް ބުނީ ފުޓްބޯޅައިން ރިޓަޔާކުރަން ޖެހުމުގެ ބިރު ނެތް ކަމަށާއި ބޭނުންވަނީ ކުޅޭ ކޮންމެ މެޗެއްގައި ތަފާތު ދެއްކުމަށް ކަމަށެވެ.

ޖަރުމަނާ ދެކޮޅަށް ކުއާޓާ ފައިނަލުގައި ނުކުންނައިރު، ސްޕެއިނަށް ކަންބޮޑުވުމެއް އެބައޮތެވެ. އެއީ ތާރީހާ ގުޅިފައިވާ ކަމެކެވެ. ސްޕެއިނުން މީގެ ކުރިން ޔޫރޯ އާއި ވޯލްޑް ކަޕްގެ މެޗެއްގައި މުބާރާތް ބާއްވާ ގައުމާ ކުޅެން ޖެހިއްޖެނަމަ މޮޅުވެފައިނުވެ އެވެ. އެ ގޮތުން، މުބާރާތް ބާއްވާ ގައުމާ މިހާތަނަށް ކުޅުނު ނުވަ ފަހަރުގެ ތެރެއިން ސްޕެއިން ބަލިވި އެއް މެޗަކީ، 1988 ވަނަ އަހަރުގެ ޔޫރޯގެ ގްރޫޕް ސްޓޭޖުގައި 2-0 އިން ޖަރުމަނު އަތުންނެވެ.