ކޮލޯން (ޖޫން 30) - ޔޫރޯ ފުޓްބޯޅަ މުބާރާތުގެ ގަދަ 16 ޓީމުގެ ބުރުގައި މިރޭ ކުޅޭ މެޗަށް ނުކުންނައިރު، ޖޯޖިއާ އަކީ ފަސޭހަ ޓީމެއްގެ ގޮތުގައި ދެކިގެން މެޗަށް ތައްޔާރުނުވާނެ ކަމަށް ސްޕެއިނުގެ ކޯޗު ލުއިސް ޑެ ލަ ފުއެންޓޭ ބުނެފި އެވެ.
ސްޕެއިނަކީ މި ފަހަރުގެ ޔޫރޯ ފުޓްބޯޅަ މުބާރާތުގެ ގްރޫޕް ސްޓޭޖުގައި ކުޅުނު ތިން މެޗުން މޮޅުވި ހަމައެކަނި ޓީމެވެ. އަނެއްކޮޅުން، ޖޯޖިއާ އަކީ މި ފަހަރުގެ ޔޫރޯގައި ވާދަކުރި އެންމެ ރޭންކިން އަށް ޓީމެވެ. އަދި މިއީ އެ ޓީމުން ބައިނަލްއަގުވާމީ ބޮޑު މުބާރާތެއްގައި ވާދަކުރާ ފުރަތަމަ ފަހަރެވެ.
އެކަމަކު، ޖޯޖިއާއާ މެދު ސަމާލުވާން ޖެހޭކަން އެ ގައުމުން ދައްކުވައިދިނީ، ގްރޫޕްގެ ފަހު މެޗުގައި، 2016 ވަނަ އަހަރުގެ ޗެމްޕިއަން، ޕޯޗުގަލް އަތުން 2-0 އިން މޮޅުވުމުންނެވެ. ޖޯޖިއާ އިން ގަދަ 16 އަށް ދަތުރުކުރީ ވާދަކުރި ގްރޫޕްގެ ތިން ވަނަ ހޯދައި، މުބާރާތުގެ ހަ ގްރޫޕްގެ ތިން ވަނަ ޓީމުތަކުގެ ރޭންކިން އިން ގަދަ ހަތަރެއްގައި ނިންމައިގެންނެވެ.
"އަހަރެމެން އެކަކަށް ވެސް ވާނެ ކަމެއް ނޫން، ފުޓްބޯޅައިގައި ސަޕްރައިޒިން ކަންކަން ހުއްޓުވުމަކީ، އެ ކަންކަން ހިނގާނެ. މީގެ ނޭނގޭނީ ވާނެ އިރެއް. ޖޯޖިއާ އިން އެ ވަނީ ޕޯޗުގަލް ބަލިކޮށްފައި. އެހެންވީމަ، އަހަރުމެން ވެސް އެބަޖެހޭ އެ މީހުންނަށް (ޖޯޖިއާ އަށް) އިހުތިރާމްކުރަން. އަހަރެމެންނަށް އެ ގޮތެއް ނުވާނެއޭ، މި ގޮތެއް ނުވާނެއޭ ނުބުނެވޭނެ،" ޑެ ލަ ފުއެންޓޭ ބުންޏެވެ.
ޖޯޖިއާ އާއި ސްޕެއިން ވާދަކުރީ ޔޫރޯ ކޮލިފައިންގެ އެއް ގްރޫޕްގަ އެެވެ. ޖޯޖިއާގައި ކުޅުނު މެޗުން ސްޕެއިން 7-1 އިން މޮޅުވިއިރު، ސްޕެއިންގައި ކުޅުނު މެޗުން ވަނީ 3-1 އިން މޮޅުވެފަ އެވެ.
ޑެ ލަ ފުއެންޓޭ ބުނީ، މުބާރާތެއްގެ ނޮކައުޓް ބުރުގައި ކުޅޭ މެޗަކީ ހުރިހާ މެޗަކާ ތަފާތު ކުރިމަތިލުމެއް ކަމަށެެވެ.
"އެ މީހުންނަކީ ކައުންޓަ އެޓޭކުގައި ކިހާ ނުރައްކާ ޓީމެއްކަން ފެނިގެންގޮސްފި، އަހަރެމެން ވިސްނަން ޖެހޭ ކަންކަން ގިނަ،" ޑެ ލަ ފުއެންޓޭ ބުންޏެވެ.
ޖޯޖިއާ އާއި ސްޕެއިން، މިރޭ 12 ޖަހާއިރު، ބައްދަލުކޮށް، މޮޅުވާ ޓީމެއް ކުއާޓާ ފައިނަލުގައި ކުޅޭނީ ޖަރުމަނާ އެވެ.
