ބާލިން (ޖޫން 29) - ޔޫރޯ ފުޓްބޯޅަ މުބާރާތުގެ ގަދަ 16 ބުރުގައި މިރޭ އިޓަލީއާ ދެކޮޅަށް ކުޅޭ މެޗުގެ ކުރިން ސްވިޒަލެންޑްގެ ކޯޗު، މުރާތު ޔަކިން އިޓަލީ އަށް ވަރަށް ބޮޑަށް ތައުރީފުކޮށްފި އެވެ.
ގަދަ 16 ބުރުގެ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން، ޔަކިން ބުނީ އިޓަލީގެ މެޗުތައް ވަރަށް ރަނގަޅަށް ބަލާފައިވާނެ ކަމަށެވެ.
"އަހަރެމެން ވަރަށް ރަނގަޅަށް ހޯމްވޯކް ހަދައިފިން، އަހަރެމެން ހަމައެކަނި ބެލީ އިޓަލީގެ ގްރޫޕް ސްޓޭޖު ތިން މެޗެއް ނޫން. އެ މީހުންގެ ތައްޔާރީތަކުގެ ގިނަ ކަންކަން ބަލައިފިން،" ޔަކިން ބުންޏެވެ.
ޔަކިން ވަނީ އިޓަލީ އަކީ ފުޓްބޯޅައިގެ ބޮޑު ސަގާފަތެއް އޮތް ގައުމެއްކަން ފާހަގަކޮށް، ފުޓްބޯޅައިގައި އެ ގައުމު ގެންނަ ތަފާތުތަކުގެ ވާހަކަ ބުނެ، ވަރަށް ބޮޑަށް ތައުރީފުކޮށްފަ އެވެ.
"އިޓަލީގެ ހާއްސަ ކަމަކީ، ތަފާތު އެކި ސިސްޓަމަށް އެންމެ މޮޅަށް ކުޅުމުގެ ގާބިލުކަން އެ މީހުންގެ އެބަހުރި. ޓެކްޓިކަލް ފުޓްބޯޅައިގެ ހޯމް އަކީ އިޓަލީ، އަހަރެން ވަރަށް ބޮޑަށް ގަޔާވޭ އިޓަލީގެ މި ކަންކަމާ. އެކުއެކީގައި ތިބެގެން ޑިފެންސް ކޮށްފައި، މީހަކަށް މީހަކު އަރައި، އެޓޭކް ކުރާ ކަހަލަ ގޮތަކަށް ވެސް ކުޅޭ، މިއީ، އެޓަލަންޓާ އިން މި ފަހަރު ފެނުނު މިސާލެއް،" ޔަކިން ބުންޏެވެ.
"އަހަރެމެން މި ތައްޔާރުވަނީ އިޓަލީ އަށް ސަޕްރައިޒެއް ދޭން،"
އިޓަލީ އާއި ސްވިޒަލެންޑްގެ އެންމެ ފޯރިގަދަ ކުރިމަތިލުންތަކެއް މި ފަހުން ފެނުނީ، 2022 ވަނަ އަހަރުގެ ވޯލްޑް ކަޕް ކޮލިފައިންގަ އެވެ. ދެ މެޗުން ވެސް އިޓަލީ އަށް ސްވިޒަލެންޑް ބަލިނުކުރެވި، އިޓަލީ އަށް ވޯލްޑް ކަޕްގެ ފުރުސަތު ގްރޫޕުން ގެއްލުނީ، ސްވިޒަލެންޑް އެއް ވަނަ ހޯދުމުންނެވެ.
ޔަކީން ބުނީ ކޮލިފައިންގެ އެ މެޗުތަކުގެ ހަނދާންތައް ކުރަނީ ފުޓްބޯޅައިގެ އެންމެ ހާއްސަ ކަންކަމުގެ ގޮތުގައި ކަމަށެވެ. އޭނާ ބުނީ ފޭވަރިޓަކީ ވަކި ޓީމެކޭ ބުނެގެން މެޗުގެ ކުރިން އިތުރު ވާހަކަތަކެއް ދައްކަން ބޭނުންނުވާ ކަމަށެވެ.
"އަހަރެމެންނަށް އެނގޭ އިޓަލީގެ ފެންވަރު. އަހަރެމެން މަސައްކަތް ކުރާނީ މޮޅުވެވޭތޯ، ނަސީބުގެ އެހީވެސް ލިބޭނީ މަސައްކަތް ކުރާ ބަޔަކަށް، އަހަރެމެން އެންމެ ފަހުން ޓްރެއިނިން ތަކުގައިވާނީ ޕެނަލްޓީ އަށް ވެސް ފަރިތަކޮށްފައި،" ޔަކިން ބުންޏެވެ.
މިއީ އިޓަލީ އާއި ސްވިޒަލެންޑުން ބޮޑު މުބާރާތެއްގައި ވާދަކުރާ ފަސް ވަނަ ފަހަރެވެ. އެ ގޮތުން، 1954 ވަނަ އަހަރުގެ ވޯލްޑް ކަޕްގައި އިޓަލީއާ ކުޅުނު ދެ މެޗުން ސްވިޒަލެންޑް މޮޅުވިއިރު، އިޓަލީ ވަނީ 1962 ވަނަ އަހަރުގެ ވޯލްޑް ކަޕާއި 2020 ވަނަ އަހަރުގެ ޔޫރޯގެ ގްރޫޕް ސްޓޭޖުގައި ސްވިޒަލެންޑް ބަލިކޮށްފަ އެވެ.
މި ދެ ޓީމު މިރޭ ކުޅޭ މެޗު ފަށާނީ 9 ޖަހާއިރު އެވެ.
