ސްޓުޓްގާޓް (ޖޫން 28) - ޔޫރޯ ފުޓްބޯޅަ މުބާރާތުގައި މި ފަހަރު ބެލްޖިއަމުން ކުޅުނު ގްރޫޕް ސްޓޭޖުގެ ފަހު މެޗުގައި، ހިނގައިދިޔަ ކަންތައްތަކާ ހެދި ބެލްޖިއަމްގެ ކޯޗު ޑޮމެނިކޯ ޓެޑެސްކޯ ވަނީ ހިތްހަމަނުޖެހުން ފާޅުކޮށްފި އެވެ.
ޔޫކްރެއިނާ 0-0 އިން ބެލްޖިއަމް އެއްވަރުވި މެޗަށް ފަހު، ޓެޑެސްކީ ވަނީ ޓްރެފިކް ޑިލޭ އާއި އަމިއްލަ ސަޕޯޓަރުންގެ މައްސަލަތަކެއް ފާހަގަކޮށްފަ އެވެ.
ޓެޑެސްކޯ ބުނީ، މެޗު ކުޅެން ދަނޑަށް އާދެވުނީ ވަރަށް ލަހުން ކަމަށާއި ޓީމާ ވާހަކަ ދައްކާލަން ވެސް އެކަށީގެންވާ ވަގުތު ނުލިބުނު ކަމަށެވެ.
"އަހަރެމެންނަށް ދަނޑަށް އާދެވުނީ މީގެ ކުރިން ދުވަހަކު ވެސް އަހަރެން ތަޖުރިބާކުރަން ޖެހުނު ފަދަ ގޮތަކަށް ނޫން،" ކަންބޮޑުވުންތައް ހިއްސާކުރަން ފެށުމުގެ ގޮތުން ޓެޑެސްކޯ ބުންޏެވެ.
"ޕޮލިސް އެސްކޮޓްގައި ހޮޓަލުން ފެށިގެން ދަނޑަށް އަންނަން ގަޑިއިރެއް ނެގި. މަގު އޮތީ މުޅިން ހުސްކޮށް، ވަރަށް މަޑުން ދުއްވީ، ކޮންމެ ޓްރެފިކް ލައިޓެއް ހުރީ ރަތް ކުލައިގައި. މެޗުގެ ކުރިން ޓީމާ ވާހަކަ ދައްކާލަން ލިބުނީ ދެ މިނިޓް، ވޯމްއަޕަށް ދޭން ޖެހުނު ވަގުތު މަދުކުރަން ޖެހުނު، މިއީ އެއްގޮތަކަށް ވެސް ގަބޫލުކުރެވޭނެ ކަމެއް ނޫން،"
ޓެޑެސްކޯ ބުނީ، ފުރަތަމަ މެޗުން ފެށިގެން ވެސް އެކި ދަތިތައް ކުރިމަތިވި ކަމަށާއި އެންމެ ފަހުން އަމިއްލަ ސަޕޯޓަރުންގެ ފާޑުކިޔުންތައް ވެސް އަމާޒުވި ކަމަށެވެ. އަދި ބެލްޖިއަމް ކުޅުންތެރިންގެ މޫނަށް ލޭޒާ އަޅުވައި، ސަޕޯޓަރުން ނުރުހިގެން އަޑުގަދަކޮށް ހެދުން އެއީ ޓީމަށް އަސަރުކުރި ކަމެއް ކަމަށް ޓެޑެސްކޯ ފާހަގަކުރި އެވެ.
"އެންމެ މުހިންމު ކަމަކީ މި ހުރިހާ ދަތިތަކާ އެކު ވެސް އަހަރެމެން ކޮލިފައިވެއްޖެ. ކުޅުން ދަށްވިއްޔާ ފާޑުކިޔަންވީ، އެކަމަކު ޓީމުގެ ހިތްވަރު އެލޭ ގޮތަށް ކަންތައް ނުކުރަންވީ،" ޓެޑެސްކޯ ބުންޏެވެ.
ޔޫކްރެއިނާ އެއްވަރުވި މެޗަށް ފަހު، ބެލްޖިއަމްގެ ކެޕްޓަން، ކެވިން ޑި ބްރޭނާ، ކުޅުންތެރިން ގޮވައިގެން ސަޕޯޓަރުންނަށް ތަރުހީބު ދޭން ދިޔަ ވަގުތު ސަޕޯޓަރުން ނުރުހިގެން އަޑުގަދަކުރަން ފެށުމުން ޑި ބްރޭނާ ވަނީ ކުޅުންތެރިން އަނބުރާލައިފައި، ޗޭންޖިން ރޫމަށް ދާން އިރުޝާދުދީފަ އެވެ.
މި ފަހަރުގެ ޔޫރޯ އަށް ފުރިހަަމަ ރެކޯޑަކާ އެކު ކުރިމަތިލި، ބެލްޖިއަމް ގްރޫޕް ސްޓޭޖުގައި ކުޅުނު ތިން މެޗުގެ ތެރެއިން ފުރަތަމަ މެޗުން 1-0 އިން ސްލޮވާކިއާ އަތުން ބަލިވިއިރު، ދެ ވަނަ މެޗުން ބެލްޖިއަމް ވަނީ 2-0 އިން ރުމޭނިއާ ބަލިކޮށްފަ އެެވެ. ތިން ވަނަ މެޗުގައި ބެލްޖިއަމް، 0-0 އިން ޔޫކްރެއިނާ އެއްވަރުވެ، ގަދަ 16 .ބުރަށް ބެލްޖިއަމް ދިޔައީ، ގްރޫޕްގެ ދެ ވަނައިގެ ގޮތުގަ އެވެ.
ގަދަ 16 ބުރުގައި ބެލްޖިއަމް ކުޅެން ޖެހުނީ ފްރާންސާ އެވެ.
