ހުސްވެފައިވާ މޯލްޑިވްސް އޮލިމްޕިކް ކޮމިޓީ (އެމްއޯސީ)ގެ ނައިބު ރައީސްގެ މަގާމަށް، އެތުލެޓިކްސް އެސޯސިއޭޝަން އޮފް މޯލްޑިވްސްގެ ޖެނެރަލް ސެކްރެޓަރީ، އަހުމަދު މުންތަގިމް (މުންތޭ) އިންތިހާބުކޮށްފި އެވެ.
އޮލިމްޕިކް ކޮމިޓީގެ ނައިބު ރައީސެއްގެ މަގާމު ހުސްވީ، މިހާރު އޮތް ސަރުކާރުގެ ކޮމިޝަނާ އޮފް ސްޕޯޓްސްގެ މަގާމަށް، އޮލިމްޕިކް ކޮޮމިޓީގެ ނައިބު ރައީސަކަށް ހުންނެވި، މުހައްމަދު ތޮލާލް އައްޔަނުކުރެއްވުމުންނެވެ.
އެ ގޮތުން، މޯލްޑިވްސް އޮލިމްޕިކް ކޮމީޓީން މިރޭ ބޭއްވި އެކްސްޓްރާއޯޑިނަރީ ޖެނެރަލް އެސެމްބްލީގައި ވަނީ ހުސްވެފައިވާ، އޮލިމްޕިކް ކޮމިޓީގެ ނައިބު ރައީސްގެ މަގާމަށް މުންތަގިމް ހޮވައިފަ އެވެ. މުންތަގިމް އަކީ މި މަގާމަށް ކުރިމަތިލެއްވި ހަމައެކަނި ކެންޑިޑޭޓް ކަމަށް ވެސް އޮލިމްޕިކް ކޮމިޓީން ވަނީ މައުލޫމާތު ދީފަ އެވެ.
ފަސް ވަނަ ދައުރަކަށް އެތުލެޓިކްސް އެސޯސިއޭޝަންގެ ޖެނެރަލް ސެކްރެޓަރީއެއްގެ ޒިންމާ އަދާކުރަމުން އަންނަ މުންތަގިމް އަކީ ރާއްޖޭގެ ކުޅިވަރު އެސޯސިއޭޝަންތަކުގެ ތެރެއިން ޖެހިޖެހިގެން އެންމެ ގިނަ ދައުރު އެ ޒިންމާ އަދާކުރަމުން އަންނަ ފަރާތެވެެ.
އޮލިމްޕިކް ކޮމިޓީގެ އިސްވެރިން މިރޭގެ އެކްސްޓްރާ އޯޑިނަރީ ޖެނެރަލް އެސެމްބްލީގެ ތެރެއިން.--- ފޮޓޯ: މޯލްޑިވްސް އޮލިމްޕިކް ކޮމިޓީ
ޖަޕާނުގެ ޖިފޫގައި 2018 ވަނަ އަހަރު ބޭއްވި ޖޫނިއާ އެތުލެޓިކްސް މުބާރާތުގައި ސްޓާޓް ރެފްރީކަންކޮށް މުންތަގިމް ވެފައިވަނީ އޭޝިއާގެ މުބާރާތެއްގައި އެފަދަ ޒިންމާއެއް ނެގި ފުރަތަމަ ދިވެއްސަށެވެ. އަދި ނޭޕާލުގައި 2019 ވަނަ އަހަރު ކުރިއަށްދިޔަ ސައުތު އޭޝިއަން ގޭމްސްގެ އެތުލެޓިކްސް އިވެންޓްތަކުގެ އިންޓަނޭޝަނަލް ޓެކްނިކަލް އޮފިޝަލް (އައިޓީއޯ) އަކަށް މުންތަގިމް މަސައްކަތް ކުރިއިރު، އޭނާ އަކީ ގޭމްސް އެއްގެ އެތުލެޓިކްސްގެ އެ ފަދަ ޒިންމާއެއް އަދާކުރި ރާއްޖެ އަށް ނިސްބަތްވާ ފުރަތަމަ މީހާ އެވެ.
އެންމެ ފަހުން، 2021 ވަނަ އަހަރު ބޭއްވި އޮލިމްޕިކްސްގައި ރާއްޖޭގެ ޝެފް ޑި މިޝަނަރަކަށް މަސައްކަތް ކުރި މުންތަގިމް ވަނީ މިދިޔަ އަހަރު ވިއެޓްނާމްގެ ހަނޯއިގައި ބޭއްވި 31 ވަނަ ސައުތު އީސްޓް އޭޝިއަން ގޭމްސް (ސީގޭމްސް) ގައި ޓެކްނިކަލް އޮފިޝަލުންގެ ތެރޭގައި މަސައްކަތް ކޮށްފަ އެވެ. ޑާކާ މެރަތަން އާއި އޭޝިއަން ކްރޮސް ކަންޓްރީ ޗެމްޕިއަންޝިޕްގައި ވެސް ރެފްރީ އަކަށް މަސައްކަތްކުރި މުންތަގިމް، ވަނީ އޭޝިއާގެ 20 އަހަރުން ދަށުގެ އެތުލެޓިކްސް މުބާރާތުގައި ވެސް ޓެކްނިކަލް އޮފިޝަލެއްގެ ގޮތުގައި މަސައްކަތް ކޮށްފަ އެވެ.
ގައުމީ ކުޅިވަރު މަޖިލީހާއި ކޮމިޝަނާ އޮފް ސްޕޯޓްސް އިން އޮބްޒާވް ކުރި އެކްސްޓްރާ އޯޑިނަރީ ޖެނެރަލް އެސެމްބްލީގައި 16 މެމްބަރު އެސޯސިއޭޝަންގެ ތެރެއިން 15 އެސޯސިއޭޝަން ވަނީ ބައިވެރިވެފަ އެވެ.
އޮލިމްޕިކް ކޮމިޓީގެ މިރޭގެ އެކްސްޓްރާއޯޑިނަރީ ޖެނެރަލް އެސެމްބްލީގައި ވަނީ މިއަދު ނިޔާވި، ގައުމީ ފުޓްބޯޅަ ޓީމުގެ ކުރީގެ ކެޕްޓަން، މުހައްމަދު އާރިފް (ބަކާ)ގެ ހަނދާނުގައި ސުކޫތެއް ގެނެސްފަ އެވެ.
