މިއުނިކް (ޖޫން 23) - ފްރާންސްގެ ތަރި ކީލިއަން އެމްބާޕޭގެ ނޭފަތުގެ ކަށިގަނޑަށް ލިބުނު އަނިޔާއަކާ ހެދި އެންމެ ފަހުން ކުޅުނު މެޗުގައި ނުކުޅެވުނުއިރު، ގްރޫޕްގެ ފަހު މެޗުގެ ތައްޔާރީތަކުގެ ތެރެއިން ފްރާންސުން ޖަރުމަނުގެ ޕަޑެބޯންގެ 21 އަހަރުން ދަށުގެ ޓީމާ ދެކޮޅަށް ކުޅުނު މެޗުގައި އެމްބާޕޭ ކުޅެފި އެވެ.
އެ ގޮތުން، އެމްބާޕޭ، 25، ވަނީ ޕަޑެބޯންއާ ދެކޮޅަށް ފްރާންސް އިން ކުޅުނު މެޗުގެ 60 މިނިޓް ކުޅެފަ އެވެ.
ފްރާންސް އިން މި މެޗުގައި، ޕަޑެބޯންގެ ޔޫތު ޓީމާ ދެކޮޅަށް ކުޅުވީ، ގްރޫޕްގެ ދެ ވަނަ މެޗުގައި، ނެދަލެންޑްސްއާ 0-0 އިން އެއްވަރުވި މެޗުގައި ބޭނުންނުކުރާ ކުޅުންތެރިންނެވެ.
ފްރާންސް އިން ގްރޫޕްގެ ފަހު މެޗުގައި، ޕޮލެންޑާ ކުޅޭއިރު، އެ ޓީމު ވަނީ ކަޓައިފަ އެވެ. އެހެންކަމުން، މި މެޗުގައި ފްރާންސް އިން ގިނަ ކުޅުންތެރިންނަށް ކުޅުމުގެ ފުރުސަތު ދޭނެ އެވެ.
މި ފަހަރުގެ ޔޫރޯގެ ފުރަތަމަ މެޗުގައި އެމްބާޕޭގެ ނޭފަތު ކަށިގަނޑަށް ލިބުނު އަނިޔާއާ ހެދި އެ މެޗުގައި އޭނާ ބަދަލުކުރި އެވެ. ގިނަ ޓެސްޓްތަކެއް ހެދިއިރު، އެމްބާޕޭގެ ނޭފަތު ކަށިގަނޑުގެ އޮޕަރޭޝަނެއް ކުރަން ޖެހޭކަން ކަށަވަރުވި ނަމަވެސް އޭނާ ވަނީ ޔޫރޯ އަށް ފަހު އެކަން ކުރަން ނިންމައިފަ އެވެ.
ދާދި ފަހުން ރެއާލަށް ބަދަލުވި އެމްބާޕޭ، ކުޅުމަށް އެނބުރި އަންނަން މާސްކެއް އަޅަން ނިންމިއިރު، އޭނާ ބޭނުންކުރަން ފުރަތަމަ ފަރުމާކުރި މާސް އަޅަން ހުއްދަ ނުލިބުނެވެ. ޔުއެފާގެ ގަވާއިދު ބުނާގޮތުން މެޑިކަލް ކަމެއްގައި ކުޅުންތެރިއަކު ބޭނުންކުރާ މާސްކް ފަދަ އެއްޗެއް ހުންނަން ޖެހޭނީ އެއް ކުލައެއްގަ އެވެ. އެކަމަކު، އެމްބާޕޭ މާސްކް ހެދީ ފްރާންސްގެ ދިދައިގެ ތިން ކުލަޔާއި އޭނާގެ ބްރޭންޑް ނަން ހިމަނައިގެންނެވެ. އެ މާސްކް ބޭނުންކުރަން ޔުއެފާ އިން ހުއްދަ ނުދިނުމުން، އެމްބާޕޭ އެޅީ އެއްކޮށް ކަޅު ކުލައިގެ މާސްކެކެވެ.
ގްރޫޕް ފަހު މެޗުގައި، އެމްބާޕޭ އަށް ކޮންމެ ވެސް ވަރަކަށް ކުޅުމުގެ ފުރުސަތު ދޭން ފްރާންސްގެ ކޯޗު ޑިޑިއޭ ޑެޝޯމްޕްސް ނިންމައިފައިވާ ކަމަށް މީޑިއާ ރިޕޯޓްތައް ބުނެ އެވެ.
